Salmo 73 - Maung a Balita Biblia (PnPV)(PnPV)

KUMATLON LIBRO(Saray Salmo 73—89)Say Inkatonung na Dios

1Peteg a say Dios maung so ipapanengneng tod Israel,

diad saray malinis so puso ra.

2Balet abalang ko lawari so panagmatalek ko;

ngalngalin naandi so pananisiak,

3ta angimon ak ed saray mapaatagey,

nen anengneng kon onaaligwas iray totoon maoges.

4Anggapoy ansakit a likliknaen da ra yan totoo;

maksil tan mabiskeg so kalamanan da.

5Aliwa ran singa arum a totoon maniirap;

aliwa ran singa arum a totoon nagugunigon.

6Kanyan say panagpaatagey da et singa kadinan akasolung ed saray beklew da

tan say panagduksa ra et singa kawes ya akakolibemben ed sikara;

7ompapaway so kaogsan ed kapusoan da,

tan ag ontotondan mamplano na kaogsan iray kanunotan da.

8Elek-elekan da ray arum a totoo tan totongtongen day nipaakar ed kaogsan;

mapaatagey ira tan iplaplano ray pamairap dad arum a totoo.

9Mansasalita ray maoges sumpad Dios a walad tawen

tan malastog iran mangigaganggan ed saray totoon walad tapew na dalin,

10et diad ontan anggan saray totooy Dios onsisingger irad sikara

tan mapalaloy pananisia rad amin ya ibabaga ra.

11Kuanda, Ag naamtaan na Dios,

ag nakabatan na Sankatageyan.

12Ontan iray totoon maoges.

Anta daakan lay walad sikara, mandakel lan mandakel niy kayaryan da.

13Anggapoy kakanaan sirin so impansiansiak a malinis tan anggapoy kasalanan?

14O Dios, impanirap mo ak lawas;

kapag kabwasan dinusa mo ak!

15No onya ray imbagak,

singa ak aliwan sakey ed saray totoom.

16Ginawak so anggaay nayaryan ko a talusan yan problima,

balet agaylay irap a talusan

17anggad linmoob ak ed Timplom.

Atalusan kod satan no antoy pansumpalan da ray totoon maoges.

18Andi-duaruwan iyakar mo rad andanglel iran pasen

tan ipatumbam iran naderal.

19Bigla ran naderal;

makapataktakot so pansumpalan da.

20Singa ra kogip a naandipat lad kabwasan;

no ombangon ka, O Katawan, naandi la ra.

21Nen agoloy isip ko,

tan apasakitay liknaan ko,

22nagmaliw ak ya ambagel a singa ayep

ag ta ka atalusan.

23Anggaman ontan siansian kaiba ta ka lawas,

tan itatabin mo ak.

24Iwawanwan ak na pananimbawam

et diad kaonuran, mapagalang ya awaten mo ak.

25Anto niy kayaryan kod tawen no ag say sika?

Bangta kayaryan ta ka anto niy pampilalekan ko diad tapew na dalin?

26Nayarin onkapoy so kanunotan tan laman ko,

balet say Dios so biskeg ko;

sikato labat so nakaukolan ko.

27Saray mangikakaindan ed sika et andi-saew ya ompatey ira;

deralen mo ray aliwan matoor ed sika.

28Balet para siak, agaylay abig so maasingger ed Dios,

say paiyagel ed Katawan a Dios;

say pangibawag na amin a ginagawa to!