1Inatey si Ari Abiam tan nipompon ed Siudad nen David. Sinmalat ed sikaton nanari si Asa a lakin anak to. Legan na impanoley nen Asa na samploy taon mareen so nanarian to.
2Lapud impanggawa nen Asa na kaptekan tan kamaungan akaliket so Katawan a Dios to.
3Ineekal to ray altar na arum a bansa tan saray paganon pasen a panangigalangan; inggegeba to ray masanton bato a lusek, tan binabatang to ray tanda na diosan Asera.
4Ingganggan to ray totoo ed Juda ya onuren day linawa na Katawan a Dios na saray lalaki ra, tan sumpalen da ray bangabangat tan saray ganggan to.
5Walay kareenan ed nanarian legan na impanoley to lapud inekal tod amin a siudad na Juda iray paganon pasen a panangigalangan tan saray altar a panagpoolay insinso.
6Legay impanoley to pinadir to ray siudad na Juda. Pigay taon ya anggapoy bakal, lapud initdan na Katawan si Asa na kareenan.
7Inkuantod saray totood Juda, Paletan ti ray siudad diad pamaalagey tayo na saray padir, saray tori, tan saray puirtan nayarin ikaput tan balewetan. Walad silong na pakayari tayo so dalin, lapud inonur tayoy linawa na Katawan a Dios tayo, kanyan inyagel to itayo tan inyarawi to itayod kaatapan ed amin a pasen. Impapaalagey da ra ya sirin et inmaligwas ira.
8Manlapud Juda talon lasus libo iray sondalo nen Ari Asa, a samper tan pika ray armas da. Manlapud Benjamin duan lasus walomplon liboy sondalo to a samper tan pana iray armas da. Masebeg iran amin tan maung so inkapasal da.
9Walay taga Etiopia a manngaran na Zera a nilooban toy Juda tan akasabi ya anggad Maresa. Sakey milyon iray sondalo to tan talon lasus iray karwahi to.
10Pinmaway a milaban ed sikato si Asa. Diad Patar na Sefata ya asingger ed Maresa so namparaanan dan dua a mambakal.
11Nampikasid Katawan a Dios to si Asa, O Katawan, anggapoy miparad sika; nayarian mon tulongan iray makapoy tan saray makapanyari. Tulongan mo kami pa natan, O Katawan a Dios mi, lapud manmamatalek kamid sika tan, diad ngaran mo, pinmaway kamin mibakal ed sarayan amayamay a sondalo. Katawan, sika so Dios mi; anggapoy makapanilalon manalod sika.
12Tinalo na Katawan iray taga Etiopia nen dinogpaan ira nen Asa tan saray sondalo na Juda. Batik iray taga Etiopia,
13tan inosilan ira nen Asa tan saray sondalo to ya anggad Gerar. Amayamay so apatey a taga Etiopia kanyan ag da la ayariay nantitipon lamet a mibakal. Tinalo ra na Katawan tan saray sondaloo to.
14Insan da dinederal iray siudad a walad kaliber-liber na Gerar, lapud ataktakot ed Katawan iray totood man. Sinasamsaman da ra yan siudad tan amayamay so nala ra.
15Dinogpaan da met iray kampo da ray pigaran pumapastol tan inaala da ray amayamay a karniro tan saray kamilyo. Insan la ra pinmawil ed Jerusalem.
Who We AreWhat We EelieveWhat We Do
2025 by iamachristian.org,Inc All rights reserved.
