1Insan inkuan na Katawan ed siak, Anggan manalagey ira di Moises tan Samuel diad arap ko a mikasi ed siak, ag ko kasian ira yan totoo. Paekal mo ra tan pataynan mo rad pakanengneng ko.
2No tepeten dad sika no iner so laen da, ibagam ed sikara a nibagak la:
Saray arum ompatey irad salot
diman so laen da!
Saray arum ompatey irad bakal
diman so laen da!
Saray arum ompatey irad eras
diman so laen da!
Saray arum nadakep ira
diman so laen da!
3Siak, say Katawan, ginetmak lan apatiran makapasinagem a segsegang so ondalan ed sikara: napatey ira; bingbingkasen na saray aso iray bangkay da; kanen na saray manok iray bangkay da, tan buagen na saray ayayep ed katakelan iray nakeraan.
4Pagmaliwen kon pakataktakotan ira na saray amin a katoowan ed intiron mundo, lapud samay ginagawad Jerusalem nen Manases a lakin anak nen Ezekias sanen sikatoy ari na Juda.
5Say Katawan kuanto,
Siopay mangasid sikayo, totood Jerusalem,
tan siopay manermen ed sikayo?
Siopay mambayag ya onsamar a
manepet no antoy kipapasen yo?
6Impolisay yo ak, sikayon totoo;
imbeneg yo ak.
Kanyan inyonat ko ray limak, tan kinabil ta kayo,
lapud naoputan ak lay anos ed sikayo.
7Diad kapag baley ed bansa,
imbantak ta kayod tagey a singa taep.
Dineral ta kayo, totook,
pinapatey ko ray anak yo
lapud ag yo tinondaan so maoges a kabibilay yo.
8Ginawak a dakel nen saray buer ed gilig na dayat
iray bibiin balo a kadalaan yo.
Pinatey ko ray anak yo nen kabisbiskegan da;
impanliknak na kairapan iray kainaan da.
Bengatbengat ko ran pinaermen tan pinatakot.
9Nalmay so inan naandi so pitoran anak to,
abot-aboten toy linawa to.
Nagmaliw a kabilongetan so liwawan walad sikato;
napnoy kababaingan tan kinmapoy so liknaan to.
Papatey kod saray kalaban yo
iray akeraan nid sikayon mabilay.
Siak, say Katawan, so nansalita.
Nanriklamod Katawan si Jeremias10Pangaskasiyay kipapasen ko! Akin et impaway ak ni na inak ed sayan mundo? Akin et nianak ak a mikolkol tan misangsangan ed balang sakey diad bansa? Ag ak mampapabayes na kuarta odino ombabayes ed siopaman; balet isasamba ak na balang sakey.
11Katawan, ontua komun ya amin iray samba ra no ag ta ka nanlingkuran a maung, no ag ko ra impikasid sika nen walay gunigon tan segsegang da. (
12Anggapoy siopaman a makapoter ed balatyang, nagkalalod balatyang a nanlapud baybay tan walay lauk ton gansa.)
13Inkuan na Katawan ed siak, Mangibaki ak na saray kalaban a mangibatik ed saray kayamanan tan pinablin kayaryan na saray totook, pian nadusak ira lapud saray ginagawa ran kasalanan ed intiron dalin.
14Gawaen ko ran aripen na saray kalaban da diad dalin ya ag da kabat, lapud singa apoy so pasnuk ko tan ondalang ya anggad angga.
15Insan inkuanko, Katawan, natatalusan mo. Nunot mo ak pa tan tulongan mo ak. Sika pa lay ombales ed saray mamapairap ed siak. Ag mo la ra aanosan, pian ag da ak napatey. Nunot mo a sikay makasengeg na panaakok na kababaingan.
16Nansalita kad siak et dinengel koy amin ya imbagam. Kayaryan mo ak, Katawan a Dios a Makapanyarin-amin, kanyan saray salitam pinano ray pusok na gayaga tan liket.
17Ag ko inarap so akiliket-liket tan akielek-elekan ed saray totoo. Lapud impangonur kod saray ganggan mo, nambukbukor ak tan napno ak na pasnuk.
18Akin et ag mansamput so paniirap ko? Akin et ag onabig iray sugat ko? Getmam ta ya ekalan ak na biskeg na linawa a singa kolus a nanaekatan no tiagew?
19Say Katawan inmebat, No ompawil ka, awaten ta ka, tan magmaliw kan aripen ko lamet. No mansalita kay makana-kana, aliwan say andi-kakanaan, magmaliw kan propitak lamet. Ompawil ed sika iray totoo, tan ag nakaukolan ya onla kad sikara.
20Diad sarayan totoo pagmaliwen ta kan singa puron gansan padir. Labanan da ka, balet ag da ka natalo. Wala ak a mangyagel ed sika tan mangyarawid sikad kaatapan.
21Iyagel ta kad pakayari na saray maoges tan maruksan totoo. Siak, say Katawan, so nansalita.
Who We AreWhat We EelieveWhat We Do
2025 by iamachristian.org,Inc All rights reserved.
