DEUTERONOMIO 19 - Maung a Balita Biblia (PnPV)(PnPV)

Saray Siudad a Salimbengan(Bil. 35:9-28; Jos. 20:1-9)

1Kayarin pateyen na Katawan a Dios yo iray totoon say dalin da et iiter tod sikayo tan no nala yo la ray siudad da tan saray kaabungan da tan panaayaman yo la ra,

2-3pankatlo yo so dalin. Kapag kakatlo na dalin nepeg a walay sakey a siudad a mainomay a laen. No walad satan so toon makapatey na siopaman, nayarian toy onsalimbeng ed sakey ed sarayan siudad.

4No walay toon makapatey ya ag to ginagala tan ag to kalaban nayarian toy ombatik ed sakey ed sarayan siudad et niyarawid kaatapan.

5Bilbilang, walay duaran toon linman mambatang na kiew ed takel, et diad pambabatang na samay sakey et naoyus imay oloy wasay to tan nakna to may sakey, insan inatey, nayarian toy ombatik ed sakey ed saramay siudad tan niyarawid kaatapan.

6No saksakey so siudad tan arawdawin tuloy a batikan, nayarin say kanayon a makaoley ya ombawid samay impakapatey naabot to may toon akapatey et, diad petang na olo to, napatey to so toon anggapoy kasalanan. Say katwaan to ag nepeg a pateyen imay toon akapatey ta ag to ginagalan pinatey so toon ag to kalaban.

7Sikato yay makasengeg ya igaganggan ta kayon mangibiig na taloran siudad.

8No apaawang la na Katawan a Dios yo so dalin yo, onung na insipan tod saray lalaki yo, tan niiter to lay amin a dalin ya insipan to,

9mamili kayo nid satan na taloran siudad. (Iter tod sikayo yan dalin no sumpalen yoy amin ya igaganggan kod sikayo diad sayan agew tan no aroen yo so Katawan tan mambilay kayo onung ed saray bangat to.)

10Gawa yoy onya pian ag ompatey iray anggapoy kasalanan. Diad ontan ag kayo mankasalanan ta ag yo ra pateyen ed dalin ya iiter ed sikayo na Katawan.

11Balet antoy gawaen no bilang say sakey a too et ginagala ton pinatey so kalaban to, insan ombatik ya onsalimbeng ed sakey ed sarayan siudad?

12Saray pangulo na baley to et paawit da, insan da ipalima ed kanayon a makaoley ya ombawid samay impamatey, ta pateyen to.

13Ag yo kakasian. Paandipat yo yan managpatey na too, pian maung lawas so kipapasen yo.

Say Kadaanan a Ketegan

14Ag yo iyaalis so ketegan na kaabay yo, ketegan ya abaybayag lan nipasen ed dalin ya iiter ed sikayo na Katawan a Dios yo.

Nipaakar ed saray Tasi

15Kulang so sakey a tasi a mamaneknek a nankasalanan so toon naakusa; duara odino taloran tasi so nakaukolan.

16No say sakey a too et iyakusa tod sakey a too so kasalanan ya ag to ginawa,

17nepeg ya onla ran dua ed samay pasen a panangigalangan, tan sintinsiaan ira na saray pari tan saray huis a peles dan manlilingkur.

18Salaysayen iran maung na saray huis; no nalmoan ya aliwan tua may iyaakusa na sakey a too ed kapara ton Israelita,

19nepeg ya awaten toy dusan awaten komun na samay naakusa. Diad onya napaandipat yo la yan kaogsan.

20Narengelan ed satan na amin a totoo so agawa; ontakot ira, tan anggapo lad satan so manggawa na onyan a kaogsan.

21Diad ontan a nagawa ag kayo mangiiter na panangasi; no antoy inutang sikatoy ibayar; say bilay bayaran na bilay; say mata bayaran na mata; say ngipen bayaran na ngipen; say lima bayaran na lima; tan say sali bayaran na sali.