SIRAC 29 - Maung a Balita Biblia (PnPV)(PnPV)

Piutang tan Pambayar

1Nepeg a diad panangasim mangipabayes kad kaabay mo no nakaukolan toy tulong. No tulongan mo, oonuren mo ray ganggan na Katawan.

2No walay nakaukolan to, ipabayes mo. Tan no walay utang mo, bayaran mon tampol.

3No bayaran mo ray utang mo, makabayes ka lawas na nakaukolan mo.

4Dakel iray totoon ipapasen day utang a singa bengatlan arumog tan nayarin isinup, et sikato yay panlalapwan na pakakabaingan na saray tinmulong ed sikara.

5Wala ray totoon marakep so pansalita ra tan ontuek ira ya anggad pakala ray uutangen da, balet no nasabi lay panaon na pambayar da palabasen da, ibaga ran aliwan manepeg a panaon, tan manggawa ray andi-kakanaan iran baraan.

6No ipasoot na angipabayes a sikatoy nabayaran, nipasen toy sikaton dili a mapalar no napapawil toy kapaldua. No ag to ipasoot, sikatoy tinakewan na inmutang tan nanggawa na ag nakaukolan a kalaban. Saray nagunggona labat na nampabayes ed toon binmayes et saray samba, panagleglemew, tan panagpaabeba, balet anggapon balut so pisasalamat.

7Dakel iray totoon ag da labay so mangipabayes a balut, aliwan lapud maigut ira, no ag ingen lapud ag da labay so nasaol no nayarian dan paliisan.

Inkabonluk

8Anggaman ontan, nepeg a natalusan mo ray mairap-bilay. Ag mo ra panaalagaren ed inkabonluk mo.

9Ingganggan na Katawan a tulongan tayo ray mairap-bilay; ag mo isisiblet so nakaukolan dan tulong.

10Magmaung nin nabalang mo so kuartam diad panamegley na panulong mod sakey ya agi odino kaaro nen say nabalang mo diad panamegley na pakalatian to ed silong na baton-dampay.

11Ikanam so kayamanan mo onung na ingganggan na Sankatageyan; dakel niy nagawaan to yad sika nen say isinup mon para sika so kuartam.

12Ibilang mon kabyangan na kayamanan mo so pangiiter mod saray mairap-bilay. Ipaliis to kayad amin a klasiy gunigon

13tan magmaung a tirinsira a sumpad saray kalaban mo nen say sankabiskegan a samper odino sankabalegan a pika.

Pangebat na Utang

14Say maung a too maabuloy ya ebatan toy utang na kaabay to. Say too labat ya abalang toy inkasimpit to so ag manlabay a manggawad saya.

15No walay toon manggawad sayan kaabigan para sika, ag mo lilingwanan so ginawa to; imposta toy maung a ngaran to lapud sika.

16Wala ray totoon makasalanan a lapud ag da amtay misalamat ikakaindan da ray totoon ontutulong ed sikara, tan sikaray makasengeg na pakababalang na kayaryan da.

17Say panangebat na utang et dineral to ray amayamay a totoon maaligwas tan sikatoy makasengeg na ag napatondan bagyoy gunigon.

18Lapud sayan gawa abalang na saray totoon gagalangen ed baley iray kaabungan da tan kinaukolan a mantawataw irad arum a bansa.

19Say makasalanan a maniilalon makatubo lapud panagebat tod utang et narumog toy sikaton dili a nalanur ed saray kasod korti.

20Kanyan tulongan moy kaabay mo ed anggaay nayarian mo, balet iyagel moy sikan dili sumpad saray kaatapan na pananulong.

Abung tan Pananangkaili

21Saray nakaukolan ed bilay et say danum, kakanen, kawes, tan abung a napanayaman mon anggapoy pibabali na arum.

22Magmaung niy mairap so bilay mo a manaayam kad silong na dilin abotaw-botaw ya atep na abung mo nen say manliket kad saray baleg a ponsia ed kaabungan na arum a totoo.

23Manliket ka ed antokaman a kayaryan mo, anggaman ya aliwan dakerakel, tan ag mo dedengelen so siopaman a manleglemew ed abung tan pamilyam.

24Makapasinagem a bilay so panayam ed nandoroman kaabungan. Inermay laen mo, ag ka mampapangayan mansalita.

25Maliket mon aawaten iray sangkaili tan ibabales iray alak, et anggapoy misasalamat ed sika. Ingen, leleglemewen ka na saray totoo diad pangibabaga ray onya:

26Sangkaili! Gala dia, ta isaklang moy lamisaan! Labay kon kanen so walad tan ed sika! Iyakar mo dia!

27Arawi ka, sankaili! Walay galgalangen a bisitak! Onsabi ya ombisita so agik a laki, et nakaukolan koy kuarto!

28Mairap ya itepel na siopaman a toon makalakal so ag nasangkaili odino tomtombuken na managpaabang na kuarta.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help