1 SARAY AWARAN 13 - Maung a Balita Biblia (PnPV)(PnPV)

Nialis Manlapud Kiryat-jearim so Kaban na Sipanan(2 Sam. 6:1-11)

1Si David angipanonan to ray amin a pangulo na tunggal libon tan tunggal lasus a sondalo.

2Insan inkuantod saray totood Israel a nantitipon diman, No abuloyan yo tan no sikatoy linaway Katawan a Dios tayo, pampabakian tayo ray arum nin kabansaan tayo, saray papari tan saray Levita diad saray baley da, tan paibaga tayod sikaran mitipon ira diad sikatayo.

3Insan tayo onlan mangalad Kaban na Sipanan na Dios ya apaolyan legan a manaari si Saul.

4Akaliket iray totoo lapud sayan imbaga nen David kanyan inmabubon ira.

5Si David impantitipon to sirin iray totood Israel a nanlalapu rad amin a pasen na bansa, manlapud ketegan ed Egipto diad abalaten ya anggad Dalan na Hamat diad baybay. Nantitipon iran mangalad Kaban na Sipanan ed Kiryat-jearim.

6Si David tan saray totood Israel linma rad siudad na Baala, say Kiryat-jearim a sakop na dalin na Juda, ta alaen day Kaban na Sipanan na Dios a natatawag onung ed ngaray Katawan ya akayurong ed trono diad tagey na saray kirubin.

7Impaway dad abung nen Abinadab so Kaban na Sipanan, insan da inlugan ed sakey a balon kariton. Di Uza tan Ahio so angiwanwan ed samay kariton.

8Si David balet tan saray amin a totood Israel nansasayaw ira ed anggaay nayarian da a pangigalang ed Dios. Nankakanta ra tan nantotogtog ira na saray arpa, tambul, piangpiang, tan trumpita.

9Kasabi rad pasen a panagilikan diad Kidon nipatakba ra may baka, kanyan inyonat nen Uza so lima to, tan binembenan toy Kaban na Sipanan.

10Akapasnuk a tampol so Katawan ed kinen Uza tan pinatey to lapud impaniwit tod Kaban na Sipanan. Inatey diman si Uza diad arapan na Dios,

11kanyan manlapud saya atawag iman a pasen na Perez-uza. Akapasnuk si David, ta diad sanuk na Katawan dinusa toy Uza.

12Insan tinmakot si David ed Dios tan kuanto, Panon ko natan ya isempet so Kaban na Sipanan?

13Kanyan ag la insempet nen David ed Jerusalem imay Kaban na Sipanan; ingen, intilak to la ed abung na sakey a toon manngaray Obed-edom a taga siudad na Gat.

14Say Kaban na Sipanan nanayam diman a taloy bulan, et binindisionan na Katawan so pamilya nen Obed-edom tan sa amin a kayaryan to.