2 SARAY AWARAN 11 - Maung a Balita Biblia (PnPV)(PnPV)

Say Propisiya nen Semaya(1 Ar. 12:21-24)

1Nen akasabid Jerusalem si Ari Roboam, impantitipon toy sanlasus tan walomplon libo a pinilin lalaki ed saray tribu di Juda tan Benjamin, ta mibakal ira pian nipawil tod sikaton dili so panagoley tod saray tribu na Israel a wala rad baybay.

2Balet imbaga na Dios ed kinen propita Semaya

3ya onlad kinen Ari Roboam na Juda, ta ibaga tod sikato tan amin a totood saray tribu di Juda tan Benjamin

4a say Katawan kuanto, Ag yo dodogpaan iray kapara yon Israelita. Sempet kayo la, balang sakey ed sikayo, ta siak so nanlapwan na samay agawa. Inonur da so ganggan na Katawan, kanyan sinmempet la ran amin ya ag da la nilabanan si Jeroboam.

Pinaliberan nen Roboam na Padir iray Siudad

5Nanayam ed Jerusalem si Roboam tan pinaliberan to na padir iray onggendan a siudad na Juda tan Benjamin:

6Betlehem, Etam, Tecoa,

7Bet-sur, Soco, Adullam,

8Gat, Maresa, Zif,

9Adoraim, Lakis, Azeca,

10Zora, Ayalon, tan Hebron.

11Mabiskeg so impamadir tod saray siudad tan anoro na sakey a pangulo na saray sondalo ed balang sakey a siudad. Kapag siudad angyan na saray abaston kakanen, larak na oliba, tan alak;

12angyan met na saray samper tan saray pika. Diad onya nansiansian walad silong na pakaoley to iray Juda tan Benjamin.

Linmad Juda iray Papari tan saray Levita

13Linmad Juda iray papari tan saray Levita ed intiron dalin na Israel.

14Tinaynan na saray Levita iray pastolan da tan saray arum nin dalin da, insan linma rad Juda tan Jerusalem, lapud si Ari Jeroboam na Israel tan saray sinmalat ed sikato et ag da ra panlingkuren a papari na Katawan.

15Anoro si Jeroboam na saray dilin papari to a manlingkur ed saray paganon pasen a panangigalangan tan mangigalang ed saray dimonyo tan saray ginagawa ton talintao na bakan kilaw.

16Saray totood amin a tribu na Israel a masimoon so panlabay da a mangigalang ed Katawan, say Dios na Israel, et tinombuk dad Jerusalem iray Levita pian makapangibagat irad Katawan, say Dios na saray lalaki ra.

17Lapud saya apabiskeg so nanarian na Juda, tan taloy taon a tinulongan day Roboam a lakin anak nen Solomon tan nambilay iran singa impanbilay da nen wala rad silong na pakaoley nen Ari David tan Ari Solomon.

Say Pamilya nen Roboam

18Inasawa nen Roboam si Mahalat a say ama to et si Jerimot ya anak nen David, tan say ina to et si Abigail ya anak nen Eliab tan apo nen Jesse.

19Walay taloran lalakin anak da a di Jeus, Samarias, tan Zaham.

20Ag abayag inasawa toy Maaca ya anak nen Absalom, tan walay apatiran lalakin anak da a di Abias, Atai, Ziza, tan Selomit.

21Labinwalon amin iray asawa nen Roboam tan anemaplo ray inyaamung ton bibii. Duamplo tan walon lalaki tan anemaplon bibii iray ilalak to. Si Maaca so sankainaroan to ed amin da ray asawa to.

22Si Abias so inararo tod amin da ray anak to, tan sikatoy pinili ton onsalat ed sikaton manari.

23Lapud inkarunong to initdan toy kanepegan iray anak ton lalaki, tan indatak to ran impasen ed intiron Juda tan Benjamin diad saramay pinadir a siudad. Daakan so iniiter ton nakaukolan da tan amayamay so iniiter ton asawa ra.