1 SARAY AWARAN 26 - Maung a Balita Biblia (PnPV)(PnPV)

Saray Guardia ed Timplo

1Sikara yay kimey a nipabetang ed saray Levitan guardia ed Timplo. Manlapud boleg nen Core, walay Meselemias a lakin anak nen Core tan kabyangay pamilya nen Asaf.

2Pitoray lalakin anak nen Neselemias, manlapud sankapangulowanan ya anggad sankayogtanan: di Zacarias, Jediael, Zebadias, Jatniel,

3Elam, Johanan, tan Elioenai.

4Wala met si Obed-edom a binindisionan na Dios na waloran lalakin anak a di Semaya, Jozabad, Joah, Sacar, Nataniel,

5Amiel, Isacar, tan Peulletai.

6Say pangulowan ya anak nen Obed-edom a si Semaya et wala ray lalakin anak to a bibirbiren irad boleg da lapud mapalaloy pakapanyari ra.

7Say kangaranan da et Otni, Refael, Obed, Elizabad, Eliu, tan Samakias. Nidoma-domay karunongan di Eliu tan Samakias.

8Manlapud pamilya nen Obed-edom, wala ray anemaplo tan duan lalaki a manepeg ed sayan kimey.

9Manlapud pamilya nen Meselemias wala ray labinwalon lalaki a manepeg ed sayan kimey.

10Manlapud pamilya nen Merari walay Hosa ya lalakin anak to a di Simri, (si ama to ginawa ton pangulo anggaman ya aliwan sikatoy pangulowan),

11Hilcias, Tebalias, tan Zacarias. Manlapud pamilya nen Hosa labintalon amin so guardiay Timplo.

12Naapag-apag ed nandoroman olup iray Timplo onung ed nanlapwan dan pamilya, tan naitdan ira na saray kimey ed Timplo a singa saray arum a Levita.

13Balang sakey a pamilya, baleg may melag, akipalaranan ira diad pangamta rad puirtan guardiaan da.

14Si Selemias apalaran to so puirtad bokig, tan si lakin anak to a si Zacarias a maung lawas so isisimbawa to et apalaran to so puirtad baybay.

15Si Obed-edom apalaran to so puirtad abalaten tan saray lalakin anak to apalaran da a guardiaan iray panagsinupan a kuarto.

16Di Supim tan Hosa apalaran da so puirtad sagur tan say puirtan tatawagey Salleket diad niatagey a dalan. Walay oras a nipabetang ed saray guardia tan nantotombukan so oras na panagguardia ra.

17Diad puirtad bokig anemiray nangguardian inagew-agew; diad baybay, apatina, tan diad abalaten, apatira met. Inagew-agew apatiray nangguardiad saray panagsinupan a kuarto, duara ed kapag sakey a panagsipunan.

18Diad asingger ed nisagur a paalagey diad gilig na dalan apatiray guardia, tan diad dilin paalagey duaray guardia.

19Sikara yay nipabetang a pangguardiaan na saray kabyangay pamilya nen Core tan saray kabyangay pamilya nen Merari.

Saray Arum a Kimey ed Timplo

20Saray arum a kapara ran Levita et makaoley irad pananginay kayamanan na Timplo tan saray kuarton panagsinupan na saray rigalon nisaklang ed Dios.

21Si Ladan a kabyangay boleg nen Gerson et laki na pigaran olup na pamilya; sakey ed saraya so pamilya nen Jehiel ya anak to.

22Saray duaran arum nin anak nen Ladan a di Zetam tan Joel et makaoley irad pananginay kayamanan na Timplo tan saray kuarton panagsinupan.

23Nipabetang met iray kimey ed saray kabyangay boleg di Amram, Izhar, Hebron, tan Uziel.

24Si Sebuel a kabyangay boleg nen Gersom a lakin anak nen Moises so manonan opisyal ed saray makaoley ed pananginay kayamanan na Timplo.

25Mankanayon si Sebuel tan si Zelomit diad panamegley nen Eliezer a lakin agi nen Gersom. Si Eliezer so ama nen Rehabias ya ama nen Jesaias. Si Jesaias so ama nen Joram ya ama nen Zicri. Si Zicri so ama nen Zelomit.

26Si Zelomit tan saray kabyangay pamilya to so makaoley ed amin da ray rigalon nisaklang ed Dios; saray angisaklang ed sarayan rigalo et di Ari David, saray pangulo da ray pamilya, saray pangulo da ray olup na boleg, tan saray opisyal da ray sondalo.

27Nanaala ra na pigara ed saray asamsamsam dad bakal, insan da ra insaklang ya ikana ed dalem na Timplo.

28Si Zelomit tan saray kabyangay pamilya to so makaoley ed saray amin a nisaklang ya ikana ed dalem na Timplo, pati saray rigalon inyaakar di propita Samuel, Ari Saul, Abner a lakin anak nen Ner, tan Joab a lakin anak nen Sarvia.

Saray Kimey na saray Arum a Levita

29Nipabetang ed saray kabyangay boleg nen Izhar, a si Kenanias tan saray lalakin anak to, so kimey a pangikorit na saray awaran tan panariglo ed saray kolkolan da ray totood Israel.

30Saray kimey a para Katawan tan saray kimey para gobirno diad sagur na Ilog na Jordan et nipabetang ed saray kabyangay boleg nen Hebron a si Hasabias tan saray sanlibo tan piton lasus a kakanayon ton matalonggaring.

31Si Jerias so pangulo da ray kabyangay boleg nen Hebron. Nen kumaapataploy taon a panaari nen David agaway sakey ya impanoysoy ed saray mikanayon ed kinen Hebron, et arumog ed Jazer a sakop na dalin na Galaad iray pigaran matalonan sondalo a kabyangan na sayan boleg.

32Amiliy Ari David na matalonan duan libo tan piton lasus a pangulo na saray pamilyan kakanayon nen Jerias, insan to ra impasen a makaoley ed kimey a para Dios tan saray kimey a para gobirno diad saray dalin na Ruben, Gad, tan kapalduay Manases.