ESTER 5 - Maung a Balita Biblia (PnPV)(PnPV)

Inimbitaan nen Ester so Ari tan si Haman ed sakey a Ponsia

1Diad kumatlon agew na panaayuno nen Ester, insolung toy kawes ton riyna, tan linman nanalagey ed dalem a patio na palasio diad arap na kuarton kawalaay trono. Wadman so ari ya akayorung ed trono tan akaarap ed lolooban.

2Nen anengneng na ari a manaalagey ed paway si Riyna Ester, aliketan tan inturo tod Riyna may balituk a sitro to. Inmasingger sirin si Riyna Ester tan diniwit toy ngoro na samay sitro.

3Akin, Riyna Ester? tepet na ari. Ibagam so labay mo, et iter ed sika, anggan say kapaldua na nanarian ko.

4Inmebat si Ester, No onabubon ka, Kagalang kon Ari, labay ta kan imbitaan tan si Haman ed ponsia ya ipaparaan kon para sikayo natad sayan labi.

5Ingganggan na ari ya ondagon tampol si Haman, ta sikaran duay bisita nen Ester. Kanyan linmay ari tan si Haman ed ponsia ya imparaan nen Ester.

6Legan ya oniinom iray alak tinepet na ari ed kinen Ester. Ibagam ed siak so labay mo, et iter ed sika. Iter kod sikay kerewen mo, anggan say kapalduay nanarian ko.

7Inmebat si Ester,

8No iter na Kagalang kon Ari so kerewen ko, labay ko a sika tan si Haman so bisitak lamet nabwas ed ponsia ya iparaan kon para sikayo. Ibagak lad satan no antoy labay ko.

Ginetma nen Haman a Pateyen si Mardokeo

9Nen nanlapud ponsia si Haman malikeliket tan masaysayaksak. Balet anengneng toy Mardokeo ed lolooban na palasio. Nen ag inmalagey si Mardokeo odino angipanengneng na pamatnagay pangigalang to nen onlalabas, mapalaloy pasnuk nen Haman ed sikato.

10Balet pinokpokan toy sikaton dili tan sinmempet la. Inimbitaan tod abung to iray kakaaro to tan kinerew tod asawa ton si Zeres a mibiang ed tongtongan da.

11Impanta nen Haman ed saray sangkaili to so ontan lan kayamanan to, karakel na anak ton lalaki, say impangitagey na ari ed betang to, tan say kipapasen ton sankatageyan ed amin da ray opisyal na ari.

12Aliwan saratan labat, intuloy nen Haman, si Riyna Ester angiparaan na panangan a para siak labat tan say ari, anggapo lay arum. Naimbitaan kami ni lamet nabwas.

13Balet anggapoy kabaliksan na saraya ed siak legan a nanenengneng koy Mardokeo, saman a Judio, a manyodyorung ed lolooban na palasio.

14Kanyan si asawa to tan saramay kakaaro to inkuandad sikato, Mampagawa kay panagbitayan a duamplo tan talon mitro so kaatagey to. Nabwas na kabwasan kerew mod ari ya ibitay si Mardokeo ed panagbitayan ya impagawam. Diad ontan maliket kan onlad ponsia ya imparaan na riyna.

Apaknaan nen Haman yan kanunotan, kanyan nampagawa na panagbitayan.