SIRAC 31 - Maung a Balita Biblia (PnPV)(PnPV)

Saray Gunigon ya Iiter na Kuarta

1Say kapagaan nipaakar ed kuarta et palemewen toy belat mo tan ag to ka paogipen.

2Ag ka paogipen na kapagaan nipaakar ed nigosio, a singa gagawaen na ambelat a sakit.

3Mankikimey na pinasya iray totoon mayaman, pian nawalaan iray dakel a kuarta; insan ira makapampainawa tan makapambilay na sawasawaan.

4Mankikimey na pinasya iray totoon mairap-bilay tan anggapoy pakanengnengay nansagputan da, et no mampainawa ra mairap nin siansiay bilay da.

5Anggapoy toon inaro toy kuarta a nasintinsiaan ya anggapoy kasalanan to; inwanwan a mankasalanan na sagput ton onyaman.

6Lapud kuarta dakel la ray totoon aderal, ta napipiarapan day desyang.

7Sakey a patit so kuarta ed saray totoon maliket ed kuarta, sakey a patit a pakakaerelan na amin da ray totoon makulang-kulang.

8Mapalar so toon onyayaman ya ag to pankakasalananay pangoosil tod kuarta.

9Walay kabat mon toon ontan? No wala, pasamanoen tayoy malmalet lapud impakapanggawa toy milagro ya anggapo niy akagawa.

10No walay akalabas ed sayan subok, nayarian ton ikinon. Walay toon akabatan ton ag naerel ed panaol toy sakey a too, balet et ag to inanamut yan pankanawnawa to?

11No wala, makanepegan so pangeegna toy kayamanan to, tan dayewen na balang sakey lapud inkabonluk to.

Kagagawa ed saray Ponsia

12No onyorung kan ondongo ed sakey a baleg a ponsia, ag mo papaolyan ya akasangi ka, tan ag mo ikukuan, Nengneng yoy karakel na kakanen,

13Mabanday so kagagawam no masibay matam; ag mo ya lilingwanan. Anggapoy arum a pinalsan lalon masiba nen say mata; sikato yay makasengeg a naynay a mamapaagos na lua.

14Ag mo gagawaten ya amiy bengatlan nanenengneng mo, tan ag mo sisikilen iray totoo diad pangalam na kakanen.

15Apiger moy kagagawam ed saray karongom ed lamisaan tan gawam ed sikaray labay mon gawaen dad sika.

16No alaen moy kakanen mo, akan mon singa sakey a too. Ag ka mantikap; anggapoy toon makaanos ed ontan a kagagawa.

17Maung a kagagawa so ononan nasumpal a mangan; mabanday so pampesepesel.

18No dakel iray totoon mipoponsia, ag mo pampipilalekay nasirbian ya onona.

19Say daiset a kakanen et dakel la ed sakay a toon maung so kagagawa to. Likud ed saya, ag ka aposaposan no onogip ka.

20Saray totoon alabas so panangan da et onsasakit so eges da tan ag ira makaogip. No aliwan alabas so pangan mo, makaogip kay malet ed labi tan masakbay kan ombangon na marakep so liknaan mo.

21Balet no onsakit so eges mo lapud alabas ya impangan mo, arawi ka tan manota ka, et onmaung so liknaan mo.

22Anak, no ondengel kad ibabagak tan onuren mo ra, onsabiy agew a pisalamatan mo ak lapud indengel tan impangonur mo. Ag mo lalabasen so antokaman a gawaen mo, et ag kan balut mansakit.

23Panliliketan na saray a totoo so mabonluk a manasangkailid sikara, tan kanepegan toy idayew da.

24Balet manriklamoy amin a totood baley nipaakar ed toon mampaponsian magimper ed isaklang ton kakanen, tan manepeg so panriklamo ra.

25Ag mo sasalien a paneknekay inkalakim diad panamegley na karakel na nainom mon alak. Dakel iray aderal lapud alak.

26Napatnagan so ogali na sakey a too no sikatoy misangsangan ya abuek, a singa say balatyang et nasubok no apapetang ya ambalbalanga, insan iteneb ed danum.

27Nayarin mangiter ed sika na balon bilay so alak no aliwan alabas so iyinom mo. Antoy klasi na bilay no anggapoy alak? Apalsa so alak a mamaliket ed sikatayo.

28No inomen mo ya aliwan alabas tan diad dugan panaon, itanduro toy ispiritum tan pagmaliwen to kan magayaga.

29Balet no onimon ka no ampetang so olom tan nagugunigon ka sakit na olo tan kababaingan so iter tod sika.

30Say abuek a makulang-kulang et ag to napokpokay sikaton dili tan napasakitan toy sikaton dili. Pakapoyen na kakainom to tan mainomay a kabilen na toon mamapasnuk.

31Ag mon balut pamapasnukan so too no oniinom kayon dua. Ag mo papasakitan so liknaan to no manliliket; aliwan panaon na pangibagam ed sikato na ag mo labay, odino paningil mod utang to.