HABACUC 1 - Maung a Balita Biblia (PnPV)(PnPV)

1Sikato yay salitan impaamta na Katawan ed kinen propita Habacuc.

Manriklamoy Habacuc Nipaakar ed Kapipikewet na Katonungan

2O Katawan, anggad kapigay nepeg kon ikerew na tulong kasakbayay idengel mo, kasakbayay pangilaban mod sikamid panagduksa?

3Akin et inabuloyan mon nanengneng koy ontan a gunigon? Panon mon nitepel so onnengneng ed satan a maoges a nagagawa? Panagderal tan inkaruksa so nagagawa ed kaliber-liber ko, tan walay kolkolan tan panlalaban ed anggan iner a pasen.

4Maletey tan anggapoy kana so ganggan, tan ag balut natotombuk so katonungan. Lalamesen na saray totoon maoges iray matonung, kanyan napipikewet so inkatonung.

Say Ebat na Katawan

5Insan say Katawan kuantod saray totoo to, Imano yo lawas iray bansad kaliber-liber yo, et onkelaw kayod nanengneng yo. Manggawa ak na sakey a bengatlan ag yo sisiaen no narengelan yo.

6Pagmaliwen kon manoley iray taga Babilonia, saraman a mapalaloy sebeg tan ag mandeen a totoo. Sulong la ran sulong ed anggan iner, pian nadakep da ray arum a dalin.

7Ikakayat day takot tan kapagaan tan diad gaway panagpaatagey da, say dilin labay da so nasumpal.

8Maples nen saray liopardo iray kabayo ra, tan masebeg ira nen saray narasan ya asod katakelan. Onsasabin nanlapud arawin pasen iray kumakabayo ra; saray kabayo ra idepak-depak day dalin. Onsabi ran mapmaples ya ondogpan singa agilan manisibar na labay ton kanen.

9Onsusulong iray sondalo ra a manduksa tan mandakep ira; natatakot so balang too no onsasabi la ra. Singa karakel na buer so karakel na adakep da.

10Luludlureyen da ray arari tan elek-elekan da ray atatagey ya opisyal. Anggapoy tirinsiran makapatondad sikaramambubunton ira na dalin ed abay na tirinsira et nadadakep da.

11Insan onlalabas iran singa dagem tan nanaandi la ra, sarayan totoo a dios da so pakayari ra.

Nanriklamo lamet ed Katawan

si Habacuc

12 Katawan, manlapud gapoy gapo Dios ka la. Sika so Dios ko, masanto tan andi-anggaan. Katawan a Dios ko tan manangyagel ko, pinilim iray taga Babilonia tan pinabiskeg mo ra, pian nadusa da kami.

13Balet panon mon nitepel ira yan traidor tan maoges? Masanton tuloy iray matam ya onnengneng ed kaogsan, tan ag mo nitepel so onnengneng ed saray totoon manggagaway kakapoyan. Akin sirin et ag ka oneseesel, anggan papairapen na sarayan totoo iray matonung nen say sikara?

14Panoy pakapangipasen mon saray totoo et singa ra saray sira odino singa sakey ya olup na saray bigis ya anggapoy manoley dan mangiwanwan ed sikara?

15Tatagaan na taga Babilonia iray totoon singa ra sira. Igagayugoy da ran akakolung ed iket tan maneeyag ed liket iray akarel ed sikara.

16Igagalang da ni ingen iray iket da tan mangibabagat irad sikara, lapud saray iket da so panlalapwan na saray sankaabigan a nakaukolan dad bilay.

17Ikana ra kasin andi-angga iray ispada ra tan ituloy dan deralen ya andi-panangasi iray bansa?