SIRAC 50 - Maung a Balita Biblia (PnPV)(PnPV)

Si Simon ya Anak nen Onias

1Say sankatalonggaringan ed saray lalakin agagi to tan say ikikinon na saray totoo to et say Pangulon Pari a si Simon a lakin anak nen Onias. Sikatoy angapiger na Timplo

2tan angiletneg na pundasion na atagey tan doblin padir tan saray atagey a padir ed kailber-liber na Timplo.

3Nen sikatoy manooley, akotkot so pananginay danum a singa kabaleg to may gansan dipositoway danum.

4Nanggawa na saray planon pangyagel ed saray totoo to ed idogpa na saray kalaban tan pinaliberan to na padir so siudad, pian nasebelan toy iloob na kalaban.

5Agaylay kagalangan to nen pinmaway ed Sankasantosan a Pasen!

6Sikatoy singa bitewen ed kabwasan a tatalusen to ray lorem diad isisinag to, singa tulaw a bulan,

7singa agew ya onsisinag ed Timplo na Sankatageyan, singa bunlalakaw a mangisisinag na kagalangan to ya ontotopad saray lorem,

8singa saray rosas no nepnep, singa saray lirio ed abay na kolus, singa saray kiew a sidro ed Libano no tiagew,

9singa napopoolan ya insinso, singa kupan pinitpit a balituk tan naarkosan na amin a klasi na alahas,

10singa kiew a oliban mabungabunga, singa kiew a sipris a toktokdulen toy lorem.

11Nen insolung nen Simon so marakerakep a kawes to tan linmad masanton altar ya akakawes na ayadyarid dakep, impagmaliw ton balibalin nengnengen so solar na Timplo.

12Nen inyawat na saray papari iray parti na bagat nen manalalagey ed abay na altar ya akaliber ed sikaton singa korona iray katulong to, sikatoy singa malangwer a kiew a sidro na Libano ya apaliberan na saray kiew a palmira.

13Sikara ya may kabyangay boleg nen Aaron ya akakawes iray mararakep, a manalalagey ira ed arap na intiron tipon na Israel, tan sankabembenan dad lima ra so bagat a nisaklang ed Katawan.

14Nen asumpal to lay panaglingkur ed altar tan naapiger to lay bagat ed Sankatageyan a Makapanyarin-amin,

15inala toy sakey a kupa tan imbung tod sengeg na altar so ambalingit ya alak a sakey a bagat ed Sankatageyan, say ari ed sankamundoan.

16Insan inmeyag iray papari tan sinibuk da ray pinitpit a pilak a trumpita. Amaknul iray makmaksil, pian narengel na Sankatagayen.

17Amin da ray totoo dinmakmomon tampol ya anggad dalin so lupa ra diad impangigalang dad Katawan a Makapanyarin-amin, say Sankatageyan.

18Insan inggapo na saray kumakanta so anganta na saray dayew ed sikato, et inmalingawngaw so marakep a musika.

19Intuloy na saray totoo so pampipikasi rad Katawan a Sankatageyan ya anggad asumpal so panangigalang.

20Insan linmasur manlapud altar si Simon, inyatagey to ray lima to ed intiron tipon na Israel, tan sigagalang ton imbalikas so bindision a manlapud Katawan,

21legan ya akayukon kumadwa iray totoo a pangigalang da, ta awaten day bindision a manlapud Sankatageyan.

Sakey a Bindision

22Natan sirin, itdan yo na dayew so Dios na sansinakuban, a nanggawa na ankakabaleg a bengatla ed amin a pasen, pababalegen to itayo manlapud inkianak tayo, tan kakasian to itayo.

23Itdan to itayo komun na liket tan abuloyan to komun a nawalaay kareenan so Israel ya anggad angga.

24Ituloy to komuy panangasi tod sikatayo tan iyagel to itayo komun ed panaon na pankaukolan tayo.

Taloran Kabosul a Bansa

25Walay duaran bansan kabosul ko, tan walay kumatlo ya ag to anggan kanepegay natawag a bansa:

26saray Edomita, saray manaayam ed saray siudad na Filistia, tan saray makulang-kulang a Samaritano.

Say Kakabatan nen Jesus a Lakin Anak nen Sirac

27Siak si Jesus a lakin anak nen Sirac Eleazar na Jerusalem, inkanak so amin a kakabatan ko ed impangisulat kod sayan libro, pian naitdan ko ray arum na bilin tan pakaamta.

28Bindisionan komun na Dios so balang toon aaralen to ra yan bangat. Magmaliw a makabat so siopaman ya impapusoy pangawat tod saraya.

29Siopamay mangikanad saraya ed bilay to et nawalaan na dugan biskeg para anggan anton nagawa, lapud sikatoy mankukurang ed liwawa na Katawan.