SAY KAKABATAN NEN SOLOMON 16 - Maung a Balita Biblia (PnPV)(PnPV)

1Kanyan manepeg a sarayan totoo et adusa ra diad impamairap na amayamay ya onya ran pinalsa.

2Balet, O Katawan, ag mo dinusa na onya iray totoom, ingen, panangasi so impanengneng mod sikara. Angibaki kad sikara na saray pugon kanen da, matalag tan mananam a kakanen a pamenek na inkaerasan da.

3Ginawam ira yan amin, pian saray manangigalang ed saray talintaoy diriyos et ag ira makapangan no narasan ira, lapud saray makapaingungot a pinalsan nibakid sikara. Balet agano labat so inkaerasan na saray totoom, insan la ra angan na sankaabigan a kakanen.

4Kanepegan na saray managpairap a manlikna ray ag manganggan pankaukolan, legan a sankanengneng na saray totoom so pakapapairap na saray kalaban da.

5Nen dinogpaan na saray makapataktakot tan masesebeg ya oleg iray totoom tan papateyen da ra diad panamegley na saray dita ra, ag ka nansiansian nampasnuk, pian ag naderal a sigput iray totoom.

6Agano labat a nansiansia yan gunigon, tan agawan sakey a pasakbay. Insan mo ra initdan na makatambal a tanda, samay gansan oleg, a mangipanunot ed sikara na kakaukolan na Ganggan mo.

7No ninmengneng so sakey a too ed saman a tanda, inmabig ed impakaketket na oleg; aliwan samay anengneng to so amaabig, no ag ingen sika a manangilaban na katoowan.

8Diad impanggawam ed saya, apanisiam met iray kalaban mi a sika so mangyaagel ed katoowan diad amin a kaogsan.

9Inaatey ed ketket na dorun tan apangat iray kalaban mi; anggapoy makapaabig ed sikara, lapud kanepegan day dusaen na saratan a pinalsa.

10Balet anggan saray nanditan oleg et ag da tinalo iray totoom, lapud mapangasi ka, tinulongan mo ra, tan pinaabig mo ra.

11Aketket ira, pian natandaan da ray ganggan mo, balet niagel iran tampol, pian ag da ka nalingwanan a sigput tan ag ira naandian na panangasim.

12Anggapoy tambal odino ipopoyuk ya akapaabig ed sikara. Nipawil ed sikaray abig na laman da lapud salitam, O Katawan, say salita a mamapaabig ed amin a katoowan.

13Walay pakayarim ed bilay tan patey; nayarian mon iyakar ed puirtay patey so sakey a too tan ipawil mo.

14Nayarin pateyen na toon maoges so sakey a too, balet ag to napaolid bilay odino makapangyagel na sakey a kamarerwan apriso ed panaayaman da ray inaatey.

Dinalan na saray Managderal a Bagyo so Egipto

15Anggapoy toon nibatikan to ka.

16Nengneng mo ra may totoon maoges: ag da ka binirbir a Dios, kanyan dinusam ira diad panamegley na baleg a pakayarim. Tinombuk ira na makapataktakot iran bagyon nantekep na oran tan kristal tan sigput iran aderal na apoy.

17Say sankamakapakelawan ya agawa et say ontan lan sebeg na apoy ya amool ed danum, a managsebseb na pool. Amin da ray pakayari na pinalsa et milalaban ira a pangyagel dad saray totoon matonung.

18Aminsan, narep so pool, pian ag to napatey iray pinalsan nibaki a manusad saray totoon maoges. Nepeg a naamtaan na saraman a totoo a tinombuk ira na sintinsiam.

19Balet aminsan met, nen aliber na danum so apoy, lalon dinmalang imay apoy, kanyan dineral to ray tanaman ed dalin a panaayaman na saraman a totoon aliwan matonung.

Inawat na saray Israelita so Mana

20Balet ag ya kinmenan desyang ed saray totoom. Ingen, initdan mo ra na kakanen da ray anghil. Manlapud tawen angipelag ka na tinapay a nayarin kanen a tampol, tan ag da la nepeg ya iparaan. Akaliketan na balang sakey so inter mon kakanen, anggan antoy pakataway da.

21Amin da ra ya et impanengneng dan ontan lay maaron panangasikasom ed saray anak mo. Pinenek na saman a kakanen so pilalek na balang sakey a toon angan; naoman pian ontokuy ed pakataway na balang too.

22Kakanen iman a nepeg komun a naandipat a singa yilo, balet ag atonaw natan anggan diad apoy. Say getma na saya et say pangibangat ed saray totoom a samay apoy a manederal ed tanaman na saray kalaban da legan na maples ya ipepelag na oran tan yilo

23et binabawi toy pakayari to, pian nawalaan na kakanen iray dilin matonung a totoom.

24Pinalsam so sansinakuban; walad silong na panangiganggan mo. Ikakana na amin a pinalsa so pakayari ra diad panusa ra ed saray totoon aliwan matonung, balet magmamaliw ya anlemew tan mapangasi ed saray manmamatalek ed sika.

25Inala na pinalsa so amin a klasiy nengneng, pian niparontal to so mabonluk a pangiiter mod nakakaukolan da ray mampipikasi ed sika.

26Agaway onya, pian naaralan na saray totoon inarom, O Katawan, a napapakan ira aliwan diad panamegley na itatanem da. Say salitam so mantatalima ed saray totoon manmamatalek ed sika.

27Atonaw so kakanen ya ag dineral na apoy, nen apetangan na ononan sinag na liwaway aagew.

28Agawa ya, pian nibangat to kami a nepeg miy ombangon kasakbayay ipelnak na liwawa a misalamat ed sika, tan mampikasi legan ya ompapaway so agew.

29Balet natonaw a singa yilo so ilalo na toon ag to amtay misalamat, tan onagos a singa danum ya ag nikakana.