JEREMIAS 6 - Maung a Balita Biblia (PnPV)(PnPV)

Aliktub na saray Kalaban so Jerusalem

1Totood Benjamin, batik kayod pasen ya arawiy kaatapan! Ibatikan yoy Jerusalem! Paknul yod Tecoa so trumpita tan itagey yod Bet-hakarem so sinyas. Ngalngali la onsabin manlapud baybay so gunigon tan baleg a deral.

2Say siudad na Sion et marakep, balet naderal;

3mankampod man iray arari tan saray sondalo ra. Ipaalagey da ray tulda ra ed kaliber-liber to, et balang sakey ed satan mankampo ed inerman a pasen a labay to.

4Ikuanda, Mamparaan kayon ondogpa ed Jerusalem! Mamparaan kayo! Ondogpa tayo no kaagewan! Balet insan ikuandad satan, Anggapo lay oras tayo; onseselek lay agew tan onsisironget la.

5Mamparaan itayo! Ondogpa tayo natad sayan labi, tan deralen ti ray tirinsira na siudad.

6Say Katawan a Makapanyarin-amin ingganggan to ra yan arari a mambatang iray kakiewan tan mambunton iray dalin, pian nakobkob day Jerusalem. Impasakbay to la nen saman, Dusaen ko yan siudad lapud napno na panagpairap.

7No panoy pansiasiansiay masamit a danum ed bobun, ontan met so pansiasiansiay kaogsan ed Jerusalem. Narerengelan koy inkaruksa tan panagderal ed dalem na siudad; sakit tan sugat iray nanenengneng ko.

8Totood Jerusalem, ipasen yon pasakbay ed sikayo ira yan gunigon, et no ag kayo ondengel ikaindan ta kayo; gawaen kon kabueran so siudad yo, sakey a pasen ya anggapoy malabay a manayam.

Mananumpa so Israel

9Inkuan ed siak na Katawan a Makapanyarin-amin, Singa kaubasan a namborboran so Israel; anggapon balut so akeraan a bunga. Kanyan nepeg yon iyagel so siopaman a nayarian yon iyagel, natan, ta wala niy panaon.

10Inmebat ak, Siopay ondengel ed siak, no misalita ak ed sikara tan pasakbayan ko ra? Pinepepetan da ray kalayagan da, tan ag ira ondengel ed saray salitam. Elek-elekan da labat so paibabagam ed siak.

11Napno ak na sanuk mo, Katawan, tan naooputan ak lay anos a mamokpok ed sanuk mo.

Insan inkuan na Katawan ed siak, Idapom so sanuk ko ed saray ogogaw a walad daladalan tan diad pantitiponan da ray tobun-balo. Nadakep iray asawan lalaki tan saray asawan bibii, tan anggan saray mamatakken lan maung.

12Niiter ed saray arum iray kaabungan da; ontan met ed saray kaalogan da tan saray kaasawaan da. Dusaen ko ray totoo ed sayan dalin.

13Balang sakey, atagey may abeba so kipapasen, mansasaol ed panaanap toy kuarta; anggan saray propita tan saray papari et sasaolen da ray totoo.

14Gagalgalawen day pananambal dad sugat na saray totook; kuanda, Maung ya amiy kipapasen, anta andi.

15Ambaing ira kasi lapud ginagawa da ra yan makapaingungot a bengatla? Andi! Anggapon balut so baing da; ag anggan ombabalangay lupa ra. Kanyan natumba ra a singa impakatumbay arum; no dusaen ko ra, samput da la. Siak, say Katawan, so nansalita.

Sinumpa na Israel so Linawa na Dios

16Inkuan na Katawan ed saray totoo to, Manalagey kayod nansasangaan na dalan, tan nengneng kayo; tepet yo no iner so kawalaan da ray dagdaan a dalan tan no iner so kawalaay sankamaungan a dalan. Dalan kayod saya, et nagamuran yoy kareenan.

Balet inkuanda, Ag kami ondalan ed satan!

17Anoro so Katawan na saray totoon managbantay a mandengel ed pasakbay na tanul na trumpita. Balet inkuanda, Ag kami ondengel.

18Kanyan inkuan na Katawan, Dengel kayo ran bansa, ta amtaen yo no antoy nagawa ed saray totook.

19Dengel ka, O mundo! Diad panusak ed maoges a plano da ra yan totoo, mangyakar ak na deral ed sikara, lapud ag da inonur iray salitak tan impolisay day bangat ko.

20Antoy kakanaan na insinson iyaakar dad siak anggaman a manlalapu rad dalin na Saba odino saray rikadon manlalapud arawin dalin? Ag ko awaten iray bagat da; ag ak manliket ed saray isasaklang da.

21Kanyan, siak, say Katawan, mangyan ak na pakatiroran pian natumba ra yan totoo. Ompatey iray ama tan saray anak; ontan met ed saray kakaaro tan saray kakaabay.

Say Inloob na saray taga Baybay

22Say Katawan kuanto, Onsasabin manlapud sakey a bansa ed baybay iray totoo; mampaparaan a mibakal so sakey a makapanyarin bansa a walad arawi.

23Inaala ray pana tan saray ispada ra; maruksa tan anggapoy panangasi ra. Singa ungol na dayat so tanul da no papabatiken da ray kabayo ra. Sipaparaan iran mibakal sumpad Jerusalem.

24Nadngelan miy nipaakar ed balita, kuan na saray totood Jerusalem, et kinmolaney iray taklay mi; adetdetan kami na ontan lan kairapan, a singa kairapan na biin mampapasakit.

25Ag kami la oonlad kaalogan odino manaakar ed saray dalan, lapud akaarmas iray kalaban mi tan makapataktakot so walad kaliber-liber mi.

26Say Katawan kuanto ed saray totoo to, Mansolung kayoy sako tan mantolin-tolin kayod dapul. Manermen kayon singa panermen yod saksakey ya anak yon laki, akis kayo na ampaipait, ta biglan dogpaan kayo na manderal ed sikayo.

27Jeremias, subok mo ray totook, a singa panggugol mod mital; subok mo ra, ta nengneng mo no antoy kapara ra.

28Diad gaway awet na olo ran amin onlalaban ira; liber-liber iran mantatalabutob. Anawet a singa gansa tan balatyang so kapusoan da; marotak so kagagawa ran amin.

29Manliub so palbaan, balet ag natotonaw odino naeekal so dotak na mital. Anggapoy kana so pangituloy na pampalba, ta ag met lamlamang naeekal iray totoon maoges.

30Natatawag iran andi-kakanaan a pilak, ta siak, say Katawan, impolisay ko ra.