18-19[1-2] Agawa ra yan bengatla nen panaon nen Ari Asuero a nanoley na sanlasus tan duamplo tan piton luyag, manlapud India ya anggad Sudan. Diad Susa a manonan siudad na Persia so kawalaan na trono to.
20[3] Diad kumatlon taon na panooley to, say ari imparaanan toy baleg a ponsia iray sumisimbawa to, saray mangilalaman na arum a bansa, saray totoon gagalangen a taga Persia tan Media, tan saray gobirnador da ray luyag.
21[4] Anem bulan ya impapanengneng to ray kayamanan na impirio diad panamegley na saray marakep tan magastos a silibrasyon.
22[5] Kayariy pista, say ari imparaanan toy ponsia iray totood arum a bansa a wala rad siudad. Pitoy agew so ponsia tan agawa ed solar na palasio,
23[6] a naarkosan na saray kurtinan linen tan ampoti. Nibitin irad saray koldun a purpuran linen a nipeket ed saray pilak tan balituk ya argolya diad saray marmul tan baton lusek. Niiyan iray balituk tan pilak a yorungan ed solar ya abaldusa na birdi tan ampotin marmol tan saray pirlas. Saray yorungan et naapisan ira na pino tan maimpis ya abel ya amayamay iray kolor to tan rosas iray gilig to.
24[7] Wala ray balituk tan pilak a kupa; say sakey ed saraya et naarkosan na saray alahas a mambili na masoluk a sanlibon toniladan pilak, tan niiyan diman a nengnengen. Dakerakel so masamit ya alak a nanlapud dilin alak na ari.
25[8] Anggapoy dangkad iinomen. Ingganggan na ari ed saray aripen ed palasio ya itdan da tan saray bisita to na antokaman a labay da.
26[9] Legan to ya, mangiiter na baleg a ponsia ed saray bibii si Riyna Vasti diad loob na palasio.
27[10] Diad kumapiton agew na samay ponsia, maliket so ari, kanyan pinaloob to ray pitoran yunuko ya aripen to ran dili, a di Haman, Bazan, Tara, Boraze, Zatolta, Abataza tan Taraba.
28[11] Ingganggan to ran awiten day riyna, pian nitoon tod olo na riyna sa korona na ari tan nipanta tod saray opisyal tan saray bisita to, ta magangganan bii.
29[12] Balet ag labay nen Riyna Vasti tan ag akilad saramay aripen. Lapud saya, abaingan so ari tan mapalaloy impakapasnuk to.
30[13] Imbaga na ari ed saray sumisimbawa to so nipaakar ed samay ebat nen Vasti tan tinepet tod sikara so nipaakar ed nepeg ton gawaen onung ed ganggan.
31-32[14-15] Saray talorad sikara, a sikaray sankaasinggeran ed ari tan sankatageyay kipapasen, et sinmingger ira tan sinalita ray ibabaga na ley tan no antoy nepeg a gawaen ed kinen Riyna Vasti, lapud ag to impangonur na ganggan ya inter na ari diad panamegley na saray aripen to. Saraya et di Arkesaus, Sarsataus, tan Malesar; opisyal ira na Persia tan Media.
33[16] Insan imbaga na ari ed saray opisyal to tan saray gobirnador na Media tan Persia no panoy ag intoluk ed sikato na riyna. Kanyan inkuanen Mukaus ed kinen ari tan balang sakey a wadman: Aliwan sika labat so pinabaingan nen Riyna Vasti, no ag ingen pati sikamin amin.
34-35[17-18] No narengelan na saray kaasawaan mi iyan ginawa na riyna, onsebeg iran ag ontoluk ed saray kaasawaan da tan ag da ra pagalangan, a singa ginawad sika nen Riyna Vasti.
36[19] Kanyan sirin, no labay na Kagalang ya Ari, mangipaakseb kay ganggan ya ag lan balut omparontal ed arap na ari si Vasti. Ipaisulat mo ed saray ganggan na Media tan Persia. Insan mo iter ed magmaung a bii so inkariyna nen Vasti. Anggapoy arum a nagawaan.
37[20] No nipakabat ed intiron impirio so ganggan mo, pagalangan na manepeg na saray bibii so kaasawaan da, mayaman may mairap-bilay.
38[21] Labay na ari tan saray opisyal to yan kanunotan, kanyan ginawa na ari imay imbaga nen Mukaus.
39[22] Diad balang luyag a nasasakopan na impirio, impawit toy sakey a sulat ed salita na saman a luyag, ya ibabaga ton nepeg a napagalangan so asawan laki ed dilin abung to.
Who We AreWhat We EelieveWhat We Do
2025 by iamachristian.org,Inc All rights reserved.
