EXODO 35 - Maung a Balita Biblia (PnPV)(PnPV)

Saray Totontonen a para Agew na Panagpainawa

1Si Moises tinawag to ray amin ya Israelita tan kuantod sikara, Sikato yay gawaen yo ya ingganggan na Katawan:

2Anem agew a makapankimey kayo, balet masanto so kumapiton agew, sakey a masanton agew na panagpainawa a nisaklang ed siak a Katawan. Siopamay mankimey ed satan ya agew nepeg a pateyen.

3Ag kayo anggan mamaparlang ed dalem na kaabungan yo no Agew na Panagpainawa.

Saray Bagat ya Onkanad Masanton Tulda(Exo. 25:1-9)

4Si Moises kuantod amin ya Israelita, Sikato yay ingganggan na Katawan:

5Mangibagat kayo ed Katawan. Amin a maliket a mangibagat nepeg a mangisaklang na balituk, pilak, odino gansa;

6pinon linen; asul, purpura, tan ambalangan tinebey; abel a bagoy kanding;

7ambalangan pinamagan katat na karniron kalakyan; pinon katat; tablan akasia;

8larak a para saray lamparaan; saray rikadon onkanad panaglana a larak tan ambalingit ya insinso;

9kornalina tan arum iran alahas ya ipepeket ed ipod tan diad apis na pagew na Pangulon Pari.

Saray Kagawaan na Tuldan Ayamay Katawan(Exo. 39:32-43)

10Dago kayon amin a marunong a kumikimey, ta gawa yoy amin ya ingganggan na Katawan:

11say Tulda, saray sakbung to, saray kawit tan saray tabla to, saray balewet to, saray lusek to, tan saray dapan to;

12say Kaban na Sipanan, saray tiken to, say sakub to, tan say mananib a kurtina;

13say lamisaan, saray tiken to tan amin a kagawaan to; saray tinapay ya inyapay ed Dios;

14say panangipatoonan na lamparaan a para silew tan saray kagawaan to; saray lamparaan tan say larak da;

15say altar a panagpoolan na insinso tan saray tiken to; say panaglana a larak; say ambalingit ya insinso; say kurtina na lolooban na Tulda;

16say altar a panagpoolan na saray bagat, pati say gansan parilya to, saray tiken to, tan amin a kagawaan to; say talyasi tan say ansagan to;

17saray kurtinan pinagkaalar na Tulda, saray lusek to tan saray dapan to; say kurtina na pinagkaalar;

18saray palpal tan saray lobir na Tulda tan say pinagkaalar to;

19tan saray balibalin kawes na saray pari ya isolung da no manlingkur ira ed Masanton Pasensaray masanton kawes nen Aaron a pari tan saray lalakin anak to.

Saray Totoo Angyaakar iray Bagat da

20Saray amin ya Israelita tinaynan day Moises,

21tan amin a maliket tan mabolus a mangibagat et inyaakar da ray bagat da ed Katawan a panggawa na Tuldan Ayamay Katawan. Inyaakar day amin a nakaukolan ya ikana ed pangigalang ed Dios tan diad panggawa na saray kawes na pari.

22Amin a totoon mabolus so linawa, bii may laki, inyaakar da ray balituk a sara da, saray ikaw da, saray singsing da, saray kolintas da, tan amin a klasiy balituk ya alahas, tan insaklang da ra ed Katawan.

23Balang toon walay pinon linen to; asul, purpura, odino ambalangan tinebey; abel a bagoy kanding, ambalangan pinamagan katat na karniron kalakyan; odino pinon katat, inyakar to.

24Amin a totoon nayarian day mangiter na pilak odino gansa, inyaakar da ya imbagat ed Katawan, tan amin a walaan na tablan akasia a nayarin ikana ed antokaman a kimey, inyaakar da.

25Amin iray bibiin marunong a mankimey angyaakar ira na ginagawa ran pinon linen a tinebey tan saray tinebey ya asul, purpura, tan ambalanga.

26Nanggagawa ra met na bagoy kanding a tinebey.

27Saray pangulo angyaakar ira na saray kornalina tan arum ni ran alahas ya ipeket ed ipod tan apis na pagew;

28angyaakar met ni ra na saray rikado tan larak a para saray lamparaan, para panagpoyuk a larak, tan para ambalingit ya insinso.

29Amin da ray Israelita a maliket a mangibagat ed Katawan et mabolbolus dan inyaakar iray bagat da a para kimey ya ingganggan na Katawan a gawaen nen Moises.

Saray Totoon Angipaalagey na Tuldan Ayamay Katawan

30Si Moises kuantod saray Israelita, Say Katawan pinili toy Bezalel a lakin anak nen Uri tan apo nen Hur a kabyangan na boleg nen Juda.

31Say Dios pinano to na pakayari to tan initdan to na karunongan, pakayari, tan pakatalus a manggawa na antokaman a kimey ya inartian,

32nayarian toy mamplano na balibalin kimey tan nagawa to ra ed balituk, pilak, tan gansa;

33marunong a mantabas na saray alahas ya ilira tan mankorti na tabla tan arum ni ran inartian a kimey.

34Say Katawan initdan toy Bezalel tan si Oholiab, a lakin anak nen Ahisamac tan kabyangan na boleg nen Dan, na karunongan a mangibangat na arum a totoo na nipaakar ed dunong dan mankimey.

35Initdan to ra na karunongan a manggawa ed amin a klasiy kimey a gagawaen na saray managtatak na arti, managgolis na arti, tan managinaramey na pinon linen; asul, purpura, tan ambalangan lana; tan arum ni ran abel. Nayarian da a gawanen so antokaman a kimey tan marunong iran mangigolis na arti.