JEREMIAS 39 - Maung a Balita Biblia (PnPV)(PnPV)

Say Inkadakep na Jerusalem

1Nen kumaplon bulan na kumasiam a taon na panaarid Juda nen Sedekias, sinmabiy Nabucodonosor tan amin a sondalo to tan dinogpaan day Jerusalem.

2Nen kumasiam ya agew na kumapat a bulan na kumalabinsakey a taon na panaari nen Sedekias, ageba ray padir na siudad.

(

3Nen adakep so Jerusalem, amin da ray atagey ya opisyal na ari na Babilonia dinmago ra tan angopisina rad Puirta na Pegley, a pati di Nergal Sarezer, Samgar Nebo, Sarsekim, tan sananey nin Nergal Sarezer.)

4Nen si Ari Sedekias na Juda tan amin da ray sondalo to et anengneng day agawa, sinali ran ibatikay siudad legay labi. Pinmaway irad tanamanan na ari, insan ira dinmalan ed puirtan nanleetan na saray duaran padir tan batik iran amaarap ed Patar na Jordan.

5Balet inosilan ira na saray sondalo na Babilonia, tan adakep day Sedekias ed saray patar ya asingger ed Jerico. Inyakar day Sedekias ed kinen Ari Nabucodonosor a walad siudad na Ribla diad dalin na Hamat, tan diman sinintinsiaan nen Nabucodonosor.

6Diad Ribla nengnengnengen nen Sedekias iray lalakin anak to legan ya impapatey ira na ari na Babilonia. Impapatey to met iray opisyal na Juda.

7Insan to impasokit iray mata nen Sedekias, tan to impagulonggulongan ya iyakar ed Babilonia.

8Legan to ya, pinoolan na saray taga Babilonia so palasio ed Jerusalem tan saray abung na totoo, tan inggegeba da ray padir na Jerusalem.

9Diad kaonuran, si Nebuzaradan a pangulo na saray sondalo inyakar ton priso ed Babilonia iray nakdaan a totoo ed siudad tan saray akigampid sikato.

10Intilak tod dalin na Juda iray sankamairapay bilay a totoo ya anggapoy kayaryan dan balut, insan to ra initdan na saray kaubasan tan kaalogan.

Nibolus si Jeremias

11Balet si Ari Nabucodonosor na Babilonia imbaga tod kinen Nebuzaradan a pangulo na saray sondalo ya ipaakseb to yay onggendan a ganggan:

12Laka ta anap moy Jeremias tan asikasom a maung. Ag mo papasakitan, tan iter mo so antokaman a labay to.

13Kanyan si Nebuzaradan, tan saray atagey ya opisyal a di Nebusazban tan si Nergal-sarezer, tan amin da ray arum nin opisyal na ari na Babilonia

14et impaala da ak ed patio na palasio. Impaasikaso da ak ed kinen Gedalias a lakin anak nen Ahicam tan apo nen Safan. Insempet to ak la sirin ed abung. Akilimug-limug ak sirin ed saray totood man.

Say Ilalon para si Ebed-melec

15Akisalitay Katawan ed siak legan ya apokuk ak ni ed patio na palasio. Imbaga tod siak

16ya ibagak ed kinen Ebed-melec a taga Sudan a say Katawan a Makapanyarin-amin a Dios na Israel inkuanto, Deral so iyakar kod sayan siudad, aliwan say aligwas, onung na nibagak lan gawaen ko. No nagaway onya, wadtan kan makaimatun.

17Balet, siak, say Katawan, iyagel ta ka tan ag ka nipalimad saray totoon tatakotan mo.

18Iyarawi ta kad kaatapan, tan ag ka napatey. Nipaliis kad patey lapud nanmatalek kad siak. Siak, say Katawan, so nansalita.