2 SAMUEL 10 - Maung a Balita Biblia (PnPV)(PnPV)

Tinalo nen David iray taga Ammon tan saray taga Siria(1 Awa. 19:1-19)

1Ag abayag, inatey si Ari Nahas na Amnon tan sinmalat ya ari si Hanun a lakin anak to.

2Inkuanen David, Ipanengneng koy matoor a pikakaaro ed kinen Hanun, a singa ginawa nen ama ton Nahas ed siak. Kanyan angibakiy David na saray mangibaga na pidadamay tod kinen Hanun.

Nen sinmabid Amnon ira may imbaki;

3inkuan na saray panguloy Ammonita ed kinen ari, Abaloan mo sirin a say pamagalang ed kinen amam so impangibaki nen David ed sarayan totoo a midamay ed sika? Andi! Imbaki to ra dian manespia tan mannengneng ed siudad, pian nadakep da itayo!

4Siningkat nen Hanun ira may imbaki nen David, nilabahasan to ray balbas dad kapalduan dapag, pinotut to ya anggad tapi ray kawes da, insan to la ra pinapawil.

5Ag da labay so onsempet, ta ontan lay baing da. Nen akabatan nen David so agawa, impaibaga ton manayam ni rad Jerico ya anggad itoboy balbas da, insan la ra onsempet.

6Abirbir na saray Ammonita ya agawa ran kalaban si David, kanyan angupa ray duamplon libon Sirianon sondalo a taga Bet-rehob tan Soba, labinduan libon lalaki a taga Tob, tan say ari ed Maaca a kaiba to ray sanlibon totoo to.

7Akabatan ya nen David, kanyan imbaki toy Joab tan saray amin a sondalo to.

8Kinmurang iray Ammonita tan namparaan iran mibakal diad lolooban na Rabba a manonan siudad da, balet saray arumsaray taga Siria, Tob tan Maacanamparaan irad kaalogan.

9Anengneng nen Joab a dogpaan ira na saray kalaban da ed arap tan diad beneg da, kanyan amili na saray sankamaungan a sondalo na Israel tan namparaan iran onarap ed saray taga Siria.

10Saray arum a sondalo to impangulo ra nen agi ton si Abisai ya angiganggan a mamparaan iran onarap ed saray Ammonita.

11Inkuanen Joab ed kinen Abisai, No nanengneng mon tataloen ak na taga Siria, dago mo ak a tulongan, et no nanengneng ta kan tataloen na saray Ammonita, dagoen ta kan tulongan.

12Mampabiskeg kayoy linawa! Pasiaen tayoy mibakal para saray totoo tayo tan para saray siudad na Dios tayo. Say linawa na Katawan komun so nagawa!

13Kanyan si Joab tan saray totoo to kinmurang iran ondogpa, et kibatiktik iray taga Siria.

14Nen anengneng na saray Ammonita a kibatiktik iray taga Sirira, imbatikan day Abisai tan sinmoner irad siudad. Kayari nen Joab ya akibakal ed saray Ammonita, pinmawil lad Jerusalem.

15Abirbir na saray taga Siria a tinalo ra na saray Israelita, kanyan impantitipon da ray amin a sondalo ra.

16Impatawag nen Ari Hadadezer iray taga Siria a walad bokig na Ilog na Eufrates, kanyan linma rad Helam. Inwanwan ira nen Sobac a pangulo na saray sondalo nen Hadadezer na Soba.

17Nen abalitaan ya nen David, impantitipon to ray sondalo to, binaliw day Ilog na Jordan, angurang iran onlad Helam a dimay namparaanan na saray taga Siria a miarapan ed kinen David. Ginmapoy bakal,

18et saray Israelita pinasoner da ray taga Siria. Si David tan saray totoo to akapatey iray piton lasus a kumakarwahin taga Siria, tan apataplon libo a kumakabayo. Asugatan day Sobac a pangulo na saray sondalon kalaban da, insan inatey ed bakalan.

19Nen naamtaan na saray ararin walad pakaoley nen Hadadezer a tinalo ra na saray Israelita, akikaaro rad saray Israelita tan nagmaliw iran walad silong na pakaoley da. Saray taga Siria antakot la ran ontulong ed saray Ammonita.