1 SAMUEL 28 - Maung a Balita Biblia (PnPV)(PnPV)

1Ag abayag, tinipon na saray Filisteo iray sondalo ra ta mibakal irad Israel. Inkuan sirin nen Akis ed kinen David, Andi-duaruwan natalusan mo a sika tan saray totoom et nepeg a mangibad sikamin mibakal.

2Talaga, ebat nen David, Aripen mo ak, tan sikan dili so makanengneng no antoy nagawaan ko.

Inkuanen Akis, Maung! Gawaen ta kan managbantay ed siak legan kon mambilay.

Angipanon si Saul ed sakey a Bii

3Inatey lad saman si Samuel, kanyan nanermen iray amin a totood Israel. Impompon dad Rama a dilin baley to. Pinataynan nen Saul ed paway na Israel iray amin a managpalar tan amin a manangipanon ed saray ispiritu na inaatey.

4Nantitipon iray sondalo na Filistia tan nankampo rad asingger ed baley na Sunem; tinipon nen Saul iray Israelita tan nankampo rad Palandey na Gilboa.

5Nen anengneng nen Saul iray sondalo na Filistia, ataktakot,

6kanyan tinepet tod KATAWAN no antoy gawaen to. Balet ag balut inebatan na KATAWAN, diad panamegley na kogip, odino diad panamegley na Urim tan Tummin, odino diad panamegley na saray propita.

7Insan to ingganggan iray opisyal to, Iyanapan yo ak na sakey a biin manangipanon ed saray ispiritu na inaatey, ta onla ak a mangipanon.

Walay sakey ed Endor, ebat da.

8Nansolung na nidoman kawes si Saul, pian ag nabirbir tan diad kapansironget linman kaiba to ray duaran totoo to, ta nengnengen da may bii. Ipanonan mo ak ed saray ispiritu tan ibagam ed siak no antoy nagawa, inkuantod samay bii. Tawag moy ispiritun bitlaen ko.

9Inmebat may bii, Andi-duaruwan amtam so ginawa nen Ari Saul, no panoy impamataynan tod Israel ed saray managpalar tan saray manangipanon ed saray ispiritu na inaatey. Akin, sirin, et papatitan mo ak pian napapatey mo ak.

10Insamba nen Saul, Diad ngaran na mabilay a KATAWAN, isipan kod sikan ag ka nadusa diad panggawam ed saya.

11Siopay tawagen ko? tepet to may bii.

Si Samuel, ebat to.

12Nen anengneng na samay bii si Samuel, inmeyag tan kuantod kinen Saul, Akin et pinalikdo mo ak? Si Ari Saul ka!

13Ag ka natatakot! kuanen ari ed sikato, Antoy nanenengneng mo?

Nanenengneng kon ompapaway ed dalin so sakey ya ispiritu, ebat to.

14Antoy nengneng to ey? tepet nen Saul.

Sakey a masiken so ompapaway, ebat to. Akakolibemben.

Insan naamtaan nen Saul a si Samuel iman a tua, kanyan dinmakmomo ya anggad dalin a pamagalang to.

15Inkuanen Samuel ed kinen Saul, Akin et sinigensigen mo ak? Akin et pinapawil mo ak?

Inmebat si Saul, Nagugunigonan ak a maung! Babakalen ak na saray Filisteo, tan inkaindan ak na Dios. Ag to ak la ebatan a balut, diad panamegley na saray propita, o diad saray kogip. Kanyan tinawag ta kan mangibagad siak no antoy nepeg kon gawaen.

16Inkuanen Samuel, Akin et tawagen mo ak, no inkaindan kay KATAWAN tan nagmaliw kan kalaban ko?

17Ginawa na KATAWAN so impaibaga tod siak ed sika: inala toy nanarian ed sika tan inter tod kinen David.

18Ag mo inonur so ganggan na KATAWAN ta ag mo sigput a pinatey iray Amalecita tan dineral iray kayaryan da. Sikato yay makasengeg a gagawaen ya na KATAWAN ed sika.

19Ipalima to ka tan say Israel ed Filistia. Nabwas sika tan say anak mo et mitipon kayod siak, tan ipalima met na KATAWAN ed Filistia iray sondalo na Israel.

20Atumban tampol si Saul tan naonat ed dalin, ta ataktakot ed imbaga nen Samuel. Makapkapoy, ta ag balut angan a sanagew tan sanlabi.

21Dinago na samay bii tan anengneng ton ataktakot, kanyan kuantod sikato, Impostak so bilay kod panggawak na kinerew mon gawaen ko.

22Gawam pa sirin so kerewen ko. Iyabuloy mon iparaanan ta kay kanen mo. Nepeg a mangan ka, pian mabiskeg kan ompawil.

23Ag inmabuloy si Saul, tan inkuanton ag mangan na antokaman. Balet tinanggoyur met na saray opisyal to. Inmabuloy a siansia, binmangon, tan inmirung ed katri.

24Pinatey a tampol na samay bii so pinataba ton kilaw a baka. Insan angalay arina, kinames to, tan nanggaway tinapay ya anggapoy libadura.

25Insaklangan toy Saul tan saray opisyal to, et angan ira. Pinmikal irad saman met lamlamang a labi.