1Say ari na Siria bibirbiren ton matalonggaring si Naaman a pangulo na saray sondalon Siriano, ta diad panamegley to impanalo na Katawan iray sondalo na Siria. Matalonggaring ya opisyal si Naaman, balet akating.
2Diad aminsan ya indogpa na saray Siriano ed Israel, angawit ira na sakey a melag ya Israelitan bii a nagmaliw ya aripen na asawa nen Naaman.
3Aminsan inkuanto yan aripen a bii ed amo ton bii, Onla komun si amok ed samay propitan manaayam ed Samaria! Paabigen to.
4Nen nadngel ya nen Naaman, linmad ari, ta imbaga toy imbaga na samay bii.
5Inkuan na ari, Lakad ari na Israel, ta iter mod sikato ya sulat.
Kanyan linmay Naaman a nanawit na talomplon libon pilak, anem a libon balituk, tan samploran marakerakep a kawes.
6Onyay ibabaga na sulat a sankaawit to: Ikabat na sayan sulat si Naaman a sakey ed saray opisyal ko. Paabig mo pa ed sakit to.
7Kapambasa na ari na Israel ed samay sulat, pinilat toy kawes to a pangipanengneng toy inkagunigon to tan inkuanto, Panoy panilalo na ari ed Siria a napaabig ko yan too? Dios ak sirin a walay pakayarid bilay tan patey? Mapatnag a labay toy mikolkol ed siak!
8Nen nadngelan nen Eliseo so agawa, impaibaga tod ari: Akin et nagugunigon ka? Ibakim ed siak itay too, ta ipanengneng kod sikaton walay propita ed Israel!
9Kanyan linmad abung nen Eliseo si Naaman a kaiba to ray kabayo tan saray karwahi to. Tinmondad lolooban na abung nen Eliseo,
10insan angibakiy Eliseo na sakey ya aripen a mangibagad kinen Naaman ya orasan ton mamamimpito ed Ilog na Jordan so laman to, et sigput ya onabig ed sakit to.
11Balet mamapasnuk a tinmaynan si Naaman tan kuantod sikaton dili, Abaloan kon pawayan to ak, mampikasid Katawan a Dios to, ipetek-petek tod akating a partiy laman ko so lima to, tan paabigen to ak!
12Insan, sakey ni, ag ta malinis ni ra may ilog na Abana tan Farpar diad Damasco nen say dinanman ya ilog diad Israel? Diman ak la komun nanoras, et apaabig ak la!
13Sinmingger ed sikato ray aripen to tan kuanda, Amo, no mairap so imbagad sika na propita, ag mo komun gawaen. Natan ta mainomay, orasan moy sikan dili onung na imbaga to, ta ag la pigan onabig ka?
14Linma sirin ed Jordan si Naaman, linmegep ya amimpito, onung na imbaga nen Eliseo, et sigput ya inmabig. Balibali so nagmaliway laman to tan singa baog na ogaw so baog to.
15Kaiba ton amin iray totoo to nen, pinmawil ed kinen Eliseo tan kuanto, Amtak la natan ya anggapo lay arum a dios no ag say Dios na Israel, kanyan awat mo pa labat yay awit kon rigalod sika.
16Inmebat si Eliseo, Diad ngaran na mabilay a Katawan a panlilingkuran ko, ag ak mangawat na antokaman a rigalo.
Ipapasoot nen Naaman ya iter, balet ag to awaten.
17Kanyan inkuanen Naaman, No ag mo awaten yay rigalok, abuloyan mo pa sirin a mangisempet ak na dalin a kargaen na duaran mula, ta manlapu lad sayan agew ag ak mangisaklang a mamool na saray bagat ed dinan man a dios likud ed Katawan.
18Lapud saya, ilaloan kon pirdonaen ak na Katawan no ibaan koy ari ya onlan mangigalang ed timplo na Rimon a dios na Siria. Andi-duaruwan pirdonaen ak na Katawan!
19Nayarian mo lay onsempet; mila komun ed sikay kareenan, inkuanen Eliseo. Insan la linmay Naaman.
Ag ni akaarawiy Naaman
20nen Si Giezi ya aripen nen Eliseo et inkuantod sikaton dili, Ag impanbayar na amok si Naaman a Siriano. Inawat to komun imay iiter to. Diad ngaran na mabilay a Katawan, aboten ko, ta miala ak na antokaman ed sikato.
21Kanyan linman aboten to. Nen anengneng nen Naaman a walay lakin onaabot ed sikato, inmepas ed karwahi to tan inabet to, insan to tinepet, Antoy agawa?
22Anggapo, ebat nen Giezi. Balet impaabot ka na amok, ta labay ton paibagad sika a kasabsabi na duaran kabyangan na grupo na saray propita ed pokdul na Efraim, et itdan mo kono na talon libon pilak tan duaran sankaabigan a kawes.
23Itdan ta ka kari na anem a libon pilak, ebat nen Naaman. Impasoot to ya iter; inyan tod duaran supot, a pati duaran sankaabigan a kawes, insan to ra impaawit ed saray duaran aripen to. Ingganggan ton onona ra nen si Giezi.
24Kasabi rad pokdul a panaayaman nen Eliseo, inala nen Giezi imay duaran supot tan inyakar to ra ed abung. Insan pinapawil to la ra may duaran aripen nen Naaman.
25Linmoob ed abung tan tinepet nen Eliseo ed sikato, Nanlapwan mo?
Ag ak pa inmalis, ebat to.
26Balet inmebat si Eliseo, Ag ta wadman ak ed ispiritu nen inmepas ed karwahi to may too tan inabet to ka? Akin, panaon natan a pangawat na kuarta, tan kawes, kakiewan na oliba, tan kaubasan, karniro, tan baka, odino saray aripen?
27Kanyan natan onalis ed sika may sakit nen Naaman, tan mansiansian sakiten na saray kabyangay boleg mo!
Kataynan nen Giezi, nagmaliw lan akatingsinga kapotiy yilo so baog to.
Who We AreWhat We EelieveWhat We Do
2025 by iamachristian.org,Inc All rights reserved.
