TOBIT 11 - Maung a Balita Biblia (PnPV)(PnPV)

1Kasiput nen Tobias, makaliliket a maung. Indayew tan akisalamatan toy Katawan na tawen tan dalin, say Ari na intiron mundo, lapud maung so asumpalan na inpambiahi to, tan insipan ton pagalangan si Raguel tan si asawa to legan dan mambibilay.Say Insempet nen Tobias tan si Rafael ed Ninive

Nen asingger la rad siudad na Kaserin, diad paway na Ninive,

2inkuanen Rafael, Tobias, sikakabat kad kipapasen nen amam a siniputan ta.

3Nepeg ya onaan tan onsabi; ontombuk lay asawam. Paiparaan toy abung yo, kasakbayan na isabi da ray arum.

4Ag mo lilingwanan ya awiten imay apgo na sira. Inmona ra sirin, tan akilad sikara imay aso nen Tobias.

5Legan to ya, manyodyorung si Ana a banbantagan toy dalan, ta nengnengen toy anak to.

6Biglan anengneng toy Tobias a nitan la, et iningal tod kinen Tobit, Gala! Nitan lay anak ta, a kaiba to may kaaro to!

7Kasakbayan a makaasingger irad kinen Tobit, inkuanen Rafael ed kinen Tobias, Makanengneng lamet si amam.

8Lidliran moy apgo iray mata to. Diad satan, naaknit so ampotin bengatla a nikolabad saray mata to, et makanengneng lamet.

9Binmatik ya inmabet si Ana ed anak to, nilakap to, tan inkuanto, Natan ta anengneng ta ka nin mabilay, anak ko, akaparaan ak lan ompatey. Diad liket to, inmakis.

Inmabig si Tobit

10Inmalagey si Tobit tan nipatakbad lolooban na solar.

11Dinago nen Tobias a sankabembenan to may apgo na sira. Sinibukan to ray mata nen ama to tan pinareen to. Inkuanto, Ag ki la mapaga natan, ama.

12-13Insan imporanis to may apgo ed saray mata nen ama to, insan to inaknit manlapud gilig na mata nen Tobit imay ampotin bengatla a nikolaba.

14Nilakap toy anak to tan diad liket to akaterter iray lua to. Insan inkuanto, Nanengneng ta ka la! Anak ko, say silew na saray matak!

Idayew yoy Dios. Idayew yo, lapud inkatalonggaring to.

Idayew yo ray amin a masanton anghil to.

Ituloy to komuy pamibindision tod sikatayo.

Idayew yon anggad angga iray amin ya anghil to.

15Sikatoy angiter na sayan inkabulag ko,

balet nanengneng ko natan si anak kon Tobias!

Insan linmoob ed abung si Tobias a maliket, tan inkasikasil ton indayew so Dios. Imbaga tod kinen ama to a maung so inkasumpalan na biahi to, ya ag to labat nala imay kuarta no ag ingen naasawa toy Sara ya anak nen Raguel a manomtombuk lan onsasabi.

Say Insabi nen Sara

16Mapalaloy liket nen Tobit; indayew toy Dios nen pinmaway ya abeten toy manugang to diad puirtay siudad. Nikelawan iray totoon akanengneng ed sikato, ta bukor toy manaakar tan anggapoy mangitatabin ed sikato.

17Indayew nen Tobit so Dios tan imbaga tod balang sakey no panoy impangipawil na Dios ed pakanengneng to lapud panangasi to.

Nen anengneng nen Tobit si Sara, inlugay to, Tuloy kad abung, anak ko! Nadayew komun so Dios, lapud inyakar to ka diad sikami, anak ko. Bindisionan komun na Dios iray ateng mo, sika, tan si anak kon Tobias. Maliket kamin mangaawat ed sikad balon abung mo. Maksil lawas komun so laman mo tan maliket ka. Tuloy ka, anak ko!

Baleg a liket yan agew para saray Judio ed Ninive.

18Wadman met iray kakaanakan nen Tobit a di Ahikar tan Nadab ya akiambegya rad liket nen Tobit.