DEUTERONOMIO 7 - Maung a Balita Biblia (PnPV)(PnPV)

Saray Dilin Totoo na Katawan

1Say Katawan a Dios yo et iyakar to kayod dalin a panayaman yo, tan amayamay a totoo so pataynanen to. Legan yon looban so dalin, pataynanen to ray totoo na pitoran bansa a baleg tan makapanyari nen say sikayo: saray Heteo, saray Gergeseo, saray Amorreo, saray Cananeo, saray Perezeo, saray Hebeo, tan saray Jebuseo.

2No sikaray pasukoen ed sikayo na Katawan a Dios yo tan taloen yo ra, nepeg yon pateyen iran amin. Ag kayo migagampid sikara, tan ag yo ra kakasian.

3Sikayo tan saray anak yo, ag kayo mimiasawaan ed sikara,

4ompan tangguyoren da ray anak yon mangikaindan ed Katawan et mangigalang irad arum a diriyos. No ontan so nagawa, makapasnuk ed sikayo so Katawan tan pateyen to kayon tampol.

5Kanyan sirin, igeba yo ray altar da, deral yo ray masanton baton lusek da, batang yo ray tanda na diosa ran Asera, tan poolan yo ray talintaoy diriyos da.

6Gawa yo ra ya, ta kayaryan kayo na Katawan a Dios yo. Diad amin da ray totood tapew na dalin pinili to kayon dili a nidoma-doman totoo to.

7Say Katawan inaro tan pinili to kayo, aliwan lapud dakel kayo ni nen saray arum a totood arum a bansa, ta sikayoy sankamelagan a bansa diad tapew na dalin.

8Pinili to kayo lapud inaro to kayo tan labay ton tooren imay sipan tod saray lalaki yo. Kanyan inlaban to kayo diad panamegley na baleg a pakapanyari to tan imbolus to kayod impakaaripen yod ari na Egipto.

9Ag yo lilingwanan a say Katawan a Dios yo et bukor toy Dios tan sikatoy matoor. Tooren toy impisipanan to tan ag mangoman so panangaro tod saray nilibon kailalakan na saray mangarod sikato tan saray matoluk ed saray ganggan to,

10balet andi-saew a dusaen to ray mamosul ed sikato.

11Natan sirin, onur yo ray nibangat ed sikayo; sumpal yo ray amin a ganggan ya inter kod sikayo ed sayan agew.

Saray Bindision a Niiter ed saray Matoluk

12No dengelen yo ra yan ganggan tan matoor ya onuren yo ran amin, say Katawan a Dios yo et ituloy ton pansiansiaen so impisipanan tod sikayo tan iter tod sikayo so ag mangoman a panangaro, onung na insipan tod saray lalaki yo.

13Aroen to kayo tan bindisionan to kayo, pian ondakel so bilang yo tan nawalaan kayoy amayamay ya anak; bindisionan toy kaalogan yo, pian nawalaan kayoy trigo, alak, tan larak na oliba; tan bindisionan to kayo diad pangiter tod sikayo na amayamay a baka tan karniro. Iter to ra yan amin a bindision ed sikayo diad dalin ya insipan tod saray lalaki yo ya iter ed sikayo.

14Anggapoy arum a bansa a nabindisionan a mapalalo nen say sikayo. Anggapod sikayo tan anggan saray ayayep yo so magmaliw a lepes.

15Say Katawan ipaliis to kayod antokaman a sakit, tan ag to ipadalan ed sikayo so antokaman a makapataktakot a salot a nilikna yod man ed Egipto, no ag ingen ipadalan to rad saray amin a kalaban yo.

16Deral yo ray amin a bansa ya ipatalo ed sikayo na Katawan, ta ag yo ran balut kakasian. Ag yo igagalang iray diriyos da, ta patit ya ed sikayo.

17Ag yo ibabagad sikayon dili a sarayan totoo et dakel ira nen say sikayo kanyan ag yo ra napataynan.

18Ag kayo ontatakot ed sikara; nunot yo may ginawa na Katawan a Dios yo ed ari na Egipto tan amin a totoo to.

19Nunot yo ra may makapataktakot a salot ya anengneng na dilin mata yo, saramay milagro tan pakelaw, tan samay baleg a pakayari tan biskeg na Katawan a Dios yo ya impangibolus tod sikayo. Pateyen to ra yay totoon tatakotan yo natan a singa impamatey tod saray Egipsio.

20Gewgewen to ni ra ingen tan pateyen to ray makabatik tan makaamut.

21Kanyan ag kayo ontatakot ed sarayan totoo. Kaolup yo so Katawan a Dios yo; sikatoy Dios a makapanyari tan nepeg a takotan.

22Kalkalnaan to a pataynanen ira yan totoo legan a looban yoy bansa ra. Ag yo ra napatey a mamimpinsan, ta no napatey yo ran mamimpinsan ondakel iray ayayep ed takel et maatap ed satan so bilay yo.

23Say Katawan ipatalo tod sikayo ray kalaban yo tan gewgewen to ra ya anggad ompatey ira.

24Ipatalo tod sikayo ray ari ra. Pateyen yo ra, tan nalingwanan ira. Anggapoy makabaat ed sikay; pateyen yo so balang sakey ed sikara.

25Poolan yo ray talintaoy diriyos da. Ag yo pampipilalekan a nakayaryan yo ray balituk odino pilak ya akasolung ed sikara. Ag yo ra aalaen a para sikayo. No alaen yo ran para sikayo, magmaliw iran patit ed sikayo, lapud kabosul na Katawan so pangigalang ed talintaoy dios.

26Ag kayo mangisesempet na anggan dinan ed sarayan talintaoy diriyos, ta ompan nipelag met ed sikayo so samban walad sikara. Nepeg yon bosulen tan sumpaen ira yan talintaoy diriyos, lapud insamba ra na Katawan.