JOSUE 4 - Maung a Balita Biblia (PnPV)(PnPV)

Nilira iray Baton Pakanudnunotan

1Nen akabaliw lad Jordan iray amin a totoo, say Katawan kuantod kinen Josue,

2Mamili kay labinduan lalaki, sakey ed kapag tribu,

3tan iganggan mo ran mangalay labinduan bato diad pegley na Ilog na Jordan, diad samay pasen a nanalageyan na saray papari. Ibagam ed sikaran awiten da ra man a bato tan ilira da rad pasen a pankampoan yo natad sayan labi.

4Tinawag sirin nen Josue ira may labinduan lalakin pinili to,

5tan inkuantod sikara, Laka yod man ed Jordan diad onaan na Kaban na Sipanan na Katawan a Dios yo. Balang sakey ed sikayo et manakbat na sakey a bato a para balang tribu na Israel.

6Saratan a bato et mangipanunot ed ginagawa na Katawan. Diad arapen a panaon, no tepeten na saray anak yo so kabaliksan na saratan a bato,

7ibaga yod sikara a tinmondan onagos so danum na Jordan nen imbaliw diman so Kaban na Sipanan na Katawan. Saratan a bato et mangipanunot lawas ed saray totood Israel na nipaakar ed agawa dia.

8Sinumpal na saramay lalaki imay ganggan nen Josue. Onung na ingganggan na Katawan ed kinen Josue, angala ra may lalaki na labinduan batod pegley na Jordan, sakey a bato so para kapag tribu na Israel, inawit da rad pasen a pankampoan da, tan inlira da rad man.

9Angilira met si Josue na labinduan bato ed pegley na Ilog na Jordan, dimad nanalageyan na saramay anakbat na Kaban na Sipanan. (Wadman ni ra man a bato.)

10Nanalagey ed pegley na Jordan ira may papari anggad asumpal ya amin iray ingganggan na Katawan ya ibaga nen Josue a gawaen na saray totoo. Sikato yay ingganggan nen Moises.

Nangganat a binmaliw ira may totoo.

11Nen akabasil la ra, inmonad sikara iray paparin manasakbat na Kaban na Sipanan na Katawan.

12Saramay lalakin kabyangan na saray tribu di Ruben, Gad, tan kapalduay Manases, ya akaparaan iran mibakal, et inmona ran binmaliw onung na imbaga nen Moises a gawaen da.

13Diad arap na Katawan sakey ya apataplon libon lalaki ya akaparaan a mibakal so binmaliw a linmad patar ya asingger ed Jerico.

14Lapud saman a ginawa na Katawan ed saman ya agew nitandurod arap na totood Israel si Josue. Pinagalangan da legan ton nambilay, a singa impamagalang dad kinen Moises.

15Insan imbaga na Katawan ed kinen Josue

16ya iganggan to ra may paparin manasakbat na Kaban na Sipanan ya ontatdang la rad Jordan.

17Inonur nen Josue may imbagad sikato na Katawan,

18et nen akasabi rad pandel na ilog ira may papari, inmagos lamet imay ilog tan asapat toy anggad saray pandel.

19Diad kumaplon agew na ononan bulan saray totoo binaliw day Jordan tan nankampo rad Gilgal a nibokig na Jerico.

20Inlirad man nen Josue ira may labinduan baton inala rad Jordan.

21Insan to inkuan ed saray totood Israel, Diad arapen a panaon, no tepeten na saray anak yo so kabaliksan na saratan a bato,

22ibaga yod sikara so nipaakar ed imbaliw na saray Israelita ed Jordan diad amagan dalin.

23Ibaga yod sikara a say Katawan a Dios yo pinaekat toy Jordan a singa samay impamaekat tod Dayat ya Ambalanga legan tayon dinmalan.

24Lapud saya naamtaan na balang sakey a too ed tapew na dalin so ontan lan kabaleg na pakayari na Katawan, tan igalang yod anggad angga so Katawan a Dios yo.