2 SARAY AWARAN 20 - Maung a Balita Biblia (PnPV)(PnPV)

Say Bakal a Sumpad Edom

1Ag abayag saray sondalo na Moab tan Ammon, pati saray kagampi ran Meunita, et nilooban day Juda.

2Angibaki ray pigaran totoo ed Ari Josafat tan kuandad sikato, Wala ray amayamay a sondalo na Edom a sinmabi ran nanlapud basil na Inatey a Dayat ta dogpaan da kayo. Adakep da la so Hazazon-tamar. (Sikato yay sananey a ngaran na En-gadi.)

3Ataktakot si Josafat kanyan kinerew ton iwanwan na Katawan. Insan to ingganggan a nagaway ayuno ed intiron bansa.

4Nangganat a linmad Jerusalem iray totood balang siudad na Juda, ta kinerew dad Katawan ya iwanwan to ra.

5Nantitipon ira tan saray totood Jerusalem ed balon patio na Timplo. Linmad sikara si Ari Josafat tan nanalagey ed arap da,

6insan nampikasi na maksil, O Katawan a Dios na saray lalaki mi, wala kad tawen a manooley ed amin da ray bansa ed mundo. Makapanyari tan mabiskeg ka, kanyan anggapoy makasumpad sika.

7Sika so Dios mi. Nen saray totoom ya Israelita et linma rad sayan dalin, pinataynan mo ray totoon manaayam dia, insan inter mon kayaryan lan anggad angga na saray kabyangay boleg nen Abraham a kaarom.

8Nanayam ira dia tan angipaalagey iray sakey a timplo a pamagalang dad sika, ta amta ra

9a no ondalan ed sikaray bengatlan manderal, a singa say bakal, salot, odino eras makakar iran manalagey ed arap na sayan Timplo a pangigagalangan ed sika. Makapampikasi rad sika lapud kagugunigon da, et dengelen tan iyagel mo ra.

10Natan, dinogpaan kami na saray totood Ammon, Moab, tan Edom. Nen pinmaway ed Egipto iray lalaki mi, ag mo inabuloyan a looban da ra man a dalin, kanyan sinmaliberber ira tan ag da ra dineral.

11Onya natan so labay dan ibales ed sikamisinmabi ran mamagit ed sikami ed sayan dalin ya inter mod sikami.

12Sika so Dios mi! Dusam pa ra, ta anggapoy nagawaan min onsumpa ed sarayan amayamay a sondalon ondodogpad sikami. Ag mi amta no antoy gawaen mi, balet onaapireng kamid sika a tulongan mo kami.

13Amin da ray lalaki ed Juda, pati saray kaasawaan tan saray anak da, et manalalagey irad man ed arap na Timplo.

14Say ispiritu na Katawan linmoob ed sakey a Levita a wadmad saman a simpuk na totoo. Say ngaran to Jahaziel a lakin anak nen Zacarias; sikatoy kabyangay boleg nen Asaf diad panamegley di Matanias, Jeiel, tan Benaya.

15Inkuanen Jahaziel, Kagalang kon Ari tan amin yon totood Juda tan Jerusalem, imbaga na Katawan ya ag yo nepeg a pakakapoyey linawa yo, odino ontatakot a mibakal ed sarayan amayamay a sondalo. Andid lima yo yan bakal no ag ingen walad lima na Dios.

16Dogpaan yo ra nabwas no ontatatdang irad dalan na Sis. Naabet yo ra ed samput na patar a mamaarap ed kalawakan ya asingger ed Jeruel.

17Aliwan sikayoy nepeg a milaban ed sayan bakal. Ilira yo labat so sikayon dili tan manalagar kayo; nanengneng yoy pangiter na Katawan ed sikayo na pananalo. Totood Juda tan Jerusalem, ag kayo ontatalaw odino ontatakot. Paway kayon mibakal, tan olupen kayo na Katawan!

18Dinmakmomoy Josafat ya anggad dalin tan dinmakmomo met iray arum a totoo, insan inggalang day Katawan.

19Saray Levitan kabyangay boleg di Coat tan Cori et nanalagey ira tan makmaksil dan indayew so Katawan a Dios na Israel.

20Diad kabkabwasan ed ontombuk ya agew saray totoo linma rad kalawakan ya asingger ed Tecoa. Legan dan oonla, nanalagey si Josafat tan kuantod sikara, Totood Juda tan Jerusalem! Manmatalek kayod Katawan a Dios yo, et ag kayo napasoner. Manisia kayod saray ibabaga da ray propita to, et manalo kayo.

21Kayari na ari a binilin iray totoo, ingganggan to ray pigaran tumutogtog tan pigaran kumakanta a mansulong iray kawes ya isosolung da no wala ray masanton pista tan mankurang iran walad onaan da ray sondalo tan ikankanta ra: Nadayew komun so Katawan! Ag mangangga so ag mangoman a panangaro to!

22Nen ginapwan day nankanta, ginewgew na Katawan ira may sondalon ondodogpa.

23Saray Ammonita tan saray Moabita et dinogpaan da ray sondalon Edomita tan pinapatey da ran amin. Kayari to ya sikaran diliy nanlalaban na pinasya.

24Nen asabi na saray sondalon Judio so sakey a torin panagbantayan a walad kalawakan, binantag da ra may kalaban et anengneng da ran kibalatar ya inaatey. Anggapod sikaray akabatik.

25Dinmago ira di Josafat tan saray sondalo to a mangala na saray kayamanan da ray kalaban. Amayamay so nalmo ran baka, abasto, kawes, tan saray mabmablin bengatla. Anggaman a taloy agew iran nanaala, ag da ayarian ya inalan amiy bengatla lapud karakel.

26Nen kumapat ya agew nantitipon irad Patar na Beraca tan indayew dad man so Dios lapud amin a ginagawa ton para sikara. Sikato yay makasengeg ya atawag iman a patar na Beraca.

27Malikeliket a pinmawil ed Jerusalem ira di Josafat tan saray sondalo to, lapud tinalo na Katawan iray kalaban da.

28Nen kasabi rad siudad, tinmalus irad Timplo a tinogtogan ira na saray arpa tan saray trumpita.

29Ataktakot iray amin a bansa ya akadngel no panoy impanalo na Katawan ed saray kalaban na Israel.

30Walay kareenan sirin nen nanoley si Josafat tan inyarawi na Dios ed kaatapan diad amin a pasen.

Say Samput na Impanoley nen Josafat(1 Ar. 22:41-50)

31Talomplo tan limay taon nen Josafat nen nagmaliw ya ari na Juda, tan nanoley ed Jerusalem na duamplo tan limay taon. Say ina to si Azuba ya anak nen Silhi.

32Ginawa toy kaptekan ed arap na Katawan a singa ginawa nen Asa ya ama to;

33balet ag aderal iray paganon pasen a panangigalangan. Aliwa nin sigput so impawil na saray totoo ed panangigalang ed Dios da ray lalaki ra.

34Amin a ginagawa nen Josafat manlapud gapo na impanoley to ya anggad samput, et nikorit ed Say Awaran nen Jehu a Lakin Anak nen Hanani, a parti na Say Awaran da ray Arari ed Israel.

35Aminsan, akigampiy Ari Josafat ed kinen Ari Ahazia na Israel ya amayamay so ginagawa ton kaogsan.

36Diad puirto na Ezion-geber nanggagawa ray bapor ya ibiahi rad Tarsis.

37Balet si Eliezer a lakin anak nen Dodava a taga baley na Maresa et pinasakbayan toy Josafat, Lapud akigampi kad Ahazia, deralen na Katawan so ginawam. Et aderal a tua ira may ginagawa ton bapor kanyan ag la ran balut nibiahi.