JUDIT 10 - Maung a Balita Biblia (PnPV)(PnPV)

Linmay Judit ed Kampo nen Holofernes

1Nen asumpal nen Judit so pikakasi tod Dios na Israel,

2inmalagey, tinawag toy aripen ton bii, linmasur ed abung onung na gagawaen to kapag Agew na Pinagpainawa tan agew na pista.

3Inekal to may kawes ton sako tan say kawes na inkabalo to, nanames, tan nampoyuk na mabli ran pabalingit. Sinagaysay toy buek to, sininger to na sakey a laso, tan nansolung na marakep a kawes a singa isosolung tod saray maliket a doypowan nen mabilay niy asawa ton Manases.

4Insolung to ray sandalya to tan amin a mararakep ya alahas to: saray singsing tan saray ikaw, saray kolintas ed lima tan kalit-kalit to. Diad impamaganggana ton maung ed sikaton dili, ag to panduaruwaan a naayat toy siopaman a lakin makanengneng ed sikato.

5Initdan nen Judit imay aripen ton bii na awiten ton sakey a supot a katat a napnoy alak tan sakey a porunggon napnoy larak. Pinano to so sakey a supot na insanglil a sibada, pigaran kanen a pinamagan bungay igos, tan pigaran tinapay a niluto onung ed ganggan na saray Judio nipaakar ed kakanen. Inapiapiger ton pinonggus ya amin iray kakanen tan inter tod samay aripen to.

6Insan tinaynan na saramay duaran bibii so abung tan linma rad saray puirta na Betulia, tan diman da ra nalmo di Uzias tan saray opisyal na baley a di Cabris tan Carmis a mangguaguardia.

7Nen anengneng na sarayan lalaki kayari na impanpales to tan impanates to, mankelaw irad ganggana to tan kuandad sikato,

8Bindisionan ka komun na Dios na saray lalaki tayo tan pampalaboen to kad planom, pian makaiter ka na kagalangan ed Jerusalem tan pananalo ed Israel.

Nampikasi si Judit

9insan kuanto, Palokasan yo ray puirta ed saray lalaki. Onla ak la a manggawa na samay nantotongtongan tayo. Insan da ingganggan iray lalakin tobun-balo a lokasan da ray puirtan pawayan to,

10tan tinaynan nen Judit tan samay aripen to so siudad. Binantag na saray lalaki legan ton onleleksab ed patar manlapud palandey, anggad ag da la nanengneng.

11Nen manaakar ira may duaran bibii ed patar, nabet ira na olup na taga Asiria a manaakar a mangguaguardia.

12Ineral day Judit tan tinepet dad sikato, Antoy bansam? Nanlapwan mo, tan iner so laen mo?

Inmebat, Sakey ak a Hebrea, balet ibabatikan ko ray Israelita lapud abuloyan na Dios a pateyen yo ra.

13Onla ak natan ed kinen Holofernes, say pangulo na saray sondalo yo, ta ibagak ed sikato ray napanmatalkan a balita. Nipanengneng kod sikato no panoy pakasulong ed kapalandeyan tan pakadakep na intiron dalin ya anggapoy anggan sakey ya ompatey.

14Ontan lay impannengneng na saramay lalaki ed kinen Judit, lapud inkaganggana to. Dinengel day ibabaga to tan kuanda,

15Inlaban moy bilay mo diad inyakar mo dian mitongtong ed pangulo mi. Iyakar ka na saray pigaran totoo mi ed panaayaman to tan iyarap da kad sikato.

16Ag ka natatakot ed sikato. Salitam labat ed sikato so imbagam ed sikami, et maung so ipanengneng tod sika.

17Anoro ra na sanlasus a lalaki a mangolup ed kinen Judit tan samay aripen to ya anggad panaayaman nen Holofernes.

18Walay baleg a gewgew ed kampo na saray taga Asiria nen niwakawak ed saray tulda so balitan nipaakar ed insabi nen Judit. Nen manalalagey ed paway na tulda nen Holofernes ta alagden toy pangiparontal dad sikato ed kinen Holofernes, dakerakel iray taga Asirian sondalon dinmago tan minokut da.

19Mapalaloy panlabay dad ganggana to tan mankelaw ira no anton klasi na totoo iray Israelita. Inkuandad sakey tan sakey. Siopay makapangitepel a mambalaw ed saray totoon maganggana ray bibii ra? Maung lay pateyen tayo ray amin a lalaki, ta no andi naayat na sarayan Judio so intiron mundo.

20Insan pinmaway so umaantabay nen Holofernes tan saray aripen ton dili, tan inyakar dad dalem na tulda si Judit.

21Mamapainawa si Holofernes ed katri ton nanmoskitiro na nilagan ambalanga tan balituk a tinebey tan inarkosan na saray ismiralda tan arum iran mablin bato.

22Nen imbagad sikato na saramay lalaki a sinmabiy Judit, linma ed nipaway na tulda. Sankaawit ed arapan to iray balituk a lamparaan.

23Nen inmabay si Judit ed sikato tan saray aripen to, nikelawan iran amin ed ganggana to. Dinmakmomo ya anggad dalin diad arap nen Holofernes, balet pinaalagey na saramay aripen nen Holofernes.