JEREMIAS 12 - Maung a Balita Biblia (PnPV)(PnPV)

Sinalongat nen Jeremias so Katawan

1 Katawan, no manriklamo ak ed sika,

napaneknekan mon matonung ka.

Anggaman ontan tepetan ta ka na nipaakar ed katonungan.

Akin et maaligwas so panagbilay da ray totoon maoges?

Akin et mapalabo ray managpalikdon totoo?

2Itatanem mo ra, tan manlalamut ira;

ontutubo ra tan mambubunga ra.

Maung lawas so sasalitaen da nipaakar ed sika,

balet say katwaan to arawi kad puso ra.

3Balet, Katawan, kabat mo ak;

nanenengneng moy gagawaen ko,

tan say ontan lan panangarok ed sika.

Igayugoy mo pan singa karniron papateyen ira yan totoo;

bantayan mo pa ra ya anggad panaon a sikara lay patasen.

4Kapigay itonda na sayan inkamagaay dalin mi,

tan say inkalenes na karikaan ed kaalogan?

Ompapatey iray ayayep tan saray manok,

lapud kaogsan na saray totoon manaayam ed sayan dalin,

ya ibabaga ra, Ag nanenengneng na Dios so gagawaen mi.

5Inkuan na Katawan,

Jeremias, no nakesawan kad pilumbam ed saray totoo,

panoy pilumbam ed saray kabayo?

No diad pasen ya arawiy kaatapan et natumba ka,

panoy pakapanayam mod makdel

a takel ed gilig na Ilog na Jordan?

6Anggan saray agagim a lalaki, saray kabyangay boleg mo et nantraidoran da ka;

manggagampi rad idogpa rad sika.

Ag mo ra panmamatalkan, anggaman a maabig so panagsalita rad sika.

Say Ermen na Katawan

lapud saray Totoo to

7Say Katawan kuanto,

Inkaindan koy Israel;

impolisay koy pinilik a bansa.

Saray totoon inarok

impalimak irad pakayari na saray kalaban da.

8Saray totoon pinilik sinumpa da ak;

singa ra lion ed katakelan

nangwam irad siak,

kanyan kabosul ko ra.

9Saray pinilik a totoo et singa ra sakey a manok

a niliktub tan sinibar na saray baga.

Padago yo ray ayayep ed katakelan,

ta pampera yo ran mangan!

10Saray amayamay a manoley a taga arum a bansa et dineral da so kaubasan ko;

ginagatinan da ray kaalogan ko;

ginawa ran kabueran so marakerakep a dalin ko.

11Ginawa ran andi-kakanaan so dalin ko;

nagmaliw a begtebegtew ed imaton ko.

Nagmaliw a kabueran so intiron bansak,

tan anggapo lay malabay ed sayan dalin ko.

12Manlapud biek na amin a niatagey

a kabueran dinmadagon manderal iray totoo.

Angibaki ak na bakal a manderal ed intiron bansa;

anggapoy makapambilay ed kareenan.

13Nantanem na trigo iray totook,

balet kasabitan so naani ra;

pinasyay impankimey da, balet anggapoy agunggona ra.

Lapud mapalalon pasnuk ko

ag nambunga ray tantanaman da.

Say Sipan na Katawan

ed saray Kaabay na Israel

14Say Katawan kuanto, Walay ibagak nipaakar ed saray bansan maoges a kaabay na Israel. Sikaray nanderal ed dalin ya inter kod saray totook ya Israel. Pataynanen kon singa abagut a tanaman ira yan totoo maoges ed saray bansa ra, tan ekalen koy Juda ed pakaoley da.

15Balet kayarik iran pataynanen, kasian ko ra; ipawil koy balang too ed dilin baley to tan diad dilin bansa to.

16No diad intiron puso ra et onalig irad kabibilay na saray totook tan mansamba ra, Onung a mabilay so Katawana singa impanbangat dad saray totook a nansamba rad Baalmagmaliw iran kabyangan na saray totook tan onaligwas ira.

17Balet no walay bansan ag ontoluk, sigput kon baguten tan deralen. Siak, say Katawan, so nansalita.