SAY KAKABATAN NEN SOLOMON 8 - Maung a Balita Biblia (PnPV)(PnPV)

1Lalaknaben na baleg a pakayari to so balang parti na mundo, tan ililira tod makanan oksuy iray amin a bengatla.

Say Panangaro nen Solomon ed Kakabatan

2Inarok so Kakabatan. Kinaraw ko nen ogaw ak ni tan nilabay kon asawaen. Naibegan ko so ganggana to.

3Papagalangan na Kakabatan so kagalangay nanlapwan to diad panamegley na piaayam tod Dios, say Katawan na amin a bengatla, a mangaarod sikato.

4Kabkabat to ray mistirio na Dios tan tutulongan tod pangamta no antoy nepeg a gawaen to.

5Maung so walay kayamanan ed sayan mundo? Anggapoy lalon makapayaman ed sika nen say Kakabatan a mangipapakurang na amin a bengatla.

6Makanan nakayaryan so pakatalus? Anggapoy magmaung ni nen say Kakabatan ya anibokel na amin a mambibilay.

7Inaro yo so inkatonung? Manlalapud kimey na Kakabatan iray amin a maung a kagagawa; inkatonung tan biskeg na linawa, panagadya tan pakatalus. Anggapoy magmaung nin niiter na bilay nen saraya.

8Labay mon nawalaan kay malaknab a salsalid bilay? Amta na Kakabatan iray aral a niiter na saray apalabas ya agawa tan nayarian ton ipasakbay so nagawad arapen a panaon. Amta ton ipatalus so ibabaga na saray totoo tan no panoy pamaandid saray problima. Amta to iray milagron gawaen na Dios, tan no panoy pansumpalan na saray nagagawa.

9Kanyan ginetmak ya awiten ed abung ko so Kakabatan, ta miayam ed siak, lapud amtak ya itdan to ak na maung a simbawa tan pabiskegen toy linawak no panaon na gunigon tan ermen.

10Ninunot kod siak a dili, Lapud Kakabatan napagalangan ak diad inermay pantitiponan na totoo. Pagalangan ak na saray mamasiken, anggaman a malangwer ak ni.

11Naalmoan da a makabaliksan iray kanunotan ko, tan idayew ak na saray walad pakaoley.

12No ag ak oneseesel, alagden day pansalitak; no mansalita ak ondengel ira. Anggan andokey so pansalitak, iyapasakey day kanunotan da ya ondengel ed siak.

13Lapud Kakabatan nagamuran koy ag ipapatey; mambilay ak ya anggad angga ed kanunotan da ray mambilay ya ontombuk ed siak.

14Nawalaan ak na pakayari ed saray bansa tan saray totoo;

15diad pakabitla na ngaran ko, ontakot la ray tatakotan ya arari. Ombantug ak a singa maung ya ari tan masebeg a sondalo.

16No onsempet ak ed Kakabatan, narumog koy inkapenek, lapud say piamung ed sikato et kabaliksan toy anggapoy kolkol odino sakit na linawa; say wala labat et say liket tan gayaga.

17Kanyan ninudnunot ko: say piasawad Kakabatan et pambilay ya andi-anggaan,

18say pangarod sikato et panliket na ayadyari, say panggawad kimey to et pakagamur na kayamanan ya ag nabilang, say piolup ed sikato et pakagamur na maung a pananintinsia, say pitongtong ed sikato et pakagamur na kagalangan. Kanyan ginetmak ya alaen a nubia so Kakabatan.

19Makaayayat so inkatook anggan nen ogaw ak ni. Mapalar ak ya akaawat na maung a kamarerwa, odino naitdan ak na maabig a laman a pambilayan ko, lapud maung ak la nen saman.

20Anggaman ontan, abirbir ko ya ag kon balut naawat so Kakabatan no ag iter ed siak na Diostan say pakaamtak a say Dios labat so makaiter ed siak na Kakabatan et sakey lan tanda na pakatalus. Kanyan nampikasi ak, tan diad intiron pusok kinerew kod Katawan: