1Si Moises angasawa na sakey a biin Cusita. Lapud saya binalaw di Miriam tan Aaron.
2Inkuanda, Nansalita sirin so Katawan diad panamegley nen Moises labat? Ag ta met nansalita diad panamegley tan dua? Say Katawan nadngel to yan imbaga ra. (
3Mapaabeban too si Moises; anggapo lad tapew na dalin so toon mapaabeba nen say sikato.)
4Kabebekta say Katawan kuantod kindi Moises, Aaron, tan Miriam, Paway kayon talo ta laka yod Tuldan Ayaman ko. Pinmaway ira,
5et say Katawan inmakseb a sakey a lusek a lorem, nanalagey ed lolooban na samay Tulda, tan tinawag to ra di Aaron tan Miriam. Inmasingger ira,
6tan say Katawan kuanto, Dengel yo natan so ibagak! No walad sikayo ray propita, ipaamtak ed sikara so siak a dili diad panamegley na saray pasingayew tan misalita ak ed sikara diad panamegley na saray kogip.
7Doma balet no misalita ak ed aripen kon Moises; impasen ko a makaoley ed amin a totook ya Israelita.
8Kanyan misasalita ak ed sikato a lupa-lupaan; malinew so pisasalitak ed sikato aliwan diad masoliwet a panagsalita; anengneng to ni ingen so alagey ko! Akin et nitepel yo so nansalita na sumpad aripen kon Moises?
9Ampetang so olo na Katawan ed sikara, tan tinmaynan la.
10Et nen tinmaynan ed Tulda imay lorem, biglan alingbus na kating si Miriam tan nagmaliw ya ampotipotin maung. Nen anengneng nen Aaron ya akating si Miriam,
11inkuantod kinen Moises, Ipangasim ya ag mo kami panliliknaen na onyan dusa lapud kasalanan min impanbalaw mid sika.
12Ag mo pa aabuloyan a magmaliw a singa kapangyanak ya inatey tan abulok lay kapalduan laman to.
13Kanyan si Moises tinmawag ed Katawan, O Dios, paabig mo pay Miriam!
14Inmebat so Katawan, No sikatoy nilukdaan na ama to ed lupa, pitoy agew a nepeg a manakoy kababaingan. Kanyan papaway mon sakey simba ed kampo; kasumpal na satan a panaon nayari lan ipawil ed dalem na kampo.
15Pitoy agew a nanayam ed paway na kampo si Miriam, et saray totoo ag da inyalis so kampo ra ya anggad nipawil ed dalem na kampo.
16Insan tinaynan day Hazerot tan inlira dad kalawakan na Paran so kampo ra.
Who We AreWhat We EelieveWhat We Do
2025 by iamachristian.org,Inc All rights reserved.
