SIRAC 14 - Maung a Balita Biblia (PnPV)(PnPV)

1Maliket so toon ag balut nalilingo ed pananalita to, tan ag to nepeg a panirapay ermen na impankasalanan.

2Maliket so toon walay mareen a konsinsia tan ag ton balut eekaley ilalo to.

Say Matwan Panangikanay Kayamanan

3Aliwan manepeg a magmaliw a mayaman so sakey a toon masiblet. Antoy kana na kuarta ed sakey a toon maigot?

4No manirap ka, pian makatipon kay kayamanan, manitipon ka labat na para arum a totoo. Ikana na arum a totoo so kayamanan mo diad alabas a panaggastos.

5Panoy pangiter mo na mabonluk ed arum a totoo no sisibletan moy sikan dili, no ag mo labay a panliketan so dilin kayamanan mo?

6Anggapo lay lalon makapoy nen say totoon sisibletan toy sikaton dili; sayan kasalanan iiter toy dilin dusa to.

7Ag ginagala no satan a too et makapanggaway kamaungan; ag mabayag ompaway so inkasiblet to.

8Maoges a too so toon masiblet; ibebeneg toy pankaukolan na saray totoo

9tan ag balut napenek ed antokaman a walad sikato. Say inkaagom pakekebeten toy kamarerwa na too.

10Diad igot da ray arum a totoo, ag nainan na tinapay so dilin lamisaan da.

11Apiger mon asikasoen so sikan dili onung na anggaay nayarian mo, tan mangyakar ka na manepeg a bagat ed Katawan.

12Ag mo lilingwanan ya onsabid sikay patey, tan ag ni nibagad sika no kapigay isabi to.

13Kasakbayan na isabi to tan ya agew, kasian mo ray kakaarom; mabonluk tan mangiter ed anggaay nayarian mo.

14Ag mo aabuloyan a napalabas so sakey ya agew ya ag ka nanliket. No walay labay mon gawaen ya ag onsumlang ed ganggan, gawam labat.

15Onsabiy agew a naapag-apag ya amin iray nanlingetan mo tan niiter ed saray arum a totoo.

16Kanyan mangiter kan mabonbonluk; balet panliketan mo met so mangawat na antokaman a manlapud arum a totoo. Paliket moy sikan dili, ta anggapoy antokaman a liket ed pasen a panaayaman da ray inaatey.

17Ondaan a singa abel so laman na too. Ibabaga na dagdaan a ganggan a nepeg tayoy ompatey.

18Singa bolung na masalumpapak a kiew iray katoowan. Sasalatan na balon bolung iray napepelag; ompapatey iray arum ed sikatayo, balet ninianak iray arum.

19Naboluk tan naandi ya amin iray ginawa na limay too, a kabansag da ray nanggawad sikara.

Say Liket ya Iter na Kakabatan

20Maliket so toon mandadalepdep nipaakar ed Kakabatan tan ikakana toy kalakal to.

21Siopamay manaaral na saray totontonen et naaralan to met iray iyaamut na Kakabatan.

22Osilan moy Kakabatan a singa umaanup a manaanap na ayep a labay ton kenaen.

23Takiling kad saray bintana to tan dengel kad saray puirta to.

24Iliram so tuldam ed sankaasinggeran ed abung to,

25et nawalaan kay sankaabigan a pasen a panayaman mo.

26-27Ipaalagey moy abung mod man, pian arawid kaatapan diad silong no saray manangyagel iran sangasanga to, tan nasiruman ed petang na agew.