BILANG 30 - Maung a Balita Biblia (PnPV)(PnPV)

Saray Totontonen a Nipaakar ed Sinambaan a Sipan

1Si Moises inter to ray onggendan a bilin ed saray pangulo da ray tribu na Israel.

2No manggaway sinambaan a sipan so sakey a too a mangiter na bengatla ed Katawan odino sambaan to a walay ag to gawaen, nepeg ya ag to deralen so sipan to, no ag ingen sumpalen to so sinalita to.

3No say sakey a biin tobun-balo a manaayam nid abung na ama to et manggawa na sinambaan a sipan a mangiter na bengatla ed Katawan odino isipan ton walay ag to gawaen,

4nepeg a sumpalen ton amin so sinambaan to odino insipan to anggaman a naamtaan na ama to et anggapoy ibaga to.

5Balet no naamtaan na ama to tan sebelan tod panumpal to ag la nakaukolan a sumpalen to. Sikatoy pirdonaen na Katawan ta sinebelan na ama tod panumpalto.

6No say sakey a marikit et manggaway sinambaan a sipan a ginagala to odino andi-nunotan, odino isipan ton walay ag to gawaen, insan akiasawa,

7nepeg a sumpalen ton amin so sinambaan to odino insipan to anggaman a naamtaan na asawa to et anggapoy ibaga to.

8Balet no naamtaan na asawa to tan sebelan tod panumpal to, ag la nakaukolan a sumpalen to. Sikatoy pirdonaen na Katawan.

9Say biin balo odino insian nepeg a sumpalen ton amin iray gawaen ton sinambaan a sipan odino saray sipan a walay ag to gawaen.

10No say sakey a biin walay asawa et manggaway sinambaan a sipan odino insipan ton walay ag to gawaen,

11nepeg a sumpalen ton amin so sinambaan to odino say insipan to anggaman a naamtaan nen asawa to et anggapoy ibaga to

12Balet no naamtaan na asawa to tan sebelan tod panumpal to, ag la nakaukolan a sumpalen to. Sikatoy pirdonaen na Katawan, lapud sinebelan na asawa to ed panumpal to.

13Say asawa to et walay kanepegan ton mangyabuloy odino manebel ed asawa to diad panumpal tod sinambaan ton sipan odino sipan to.

14Balet no diad agew na pakaamta tod sinambaan na asawa to et ag to sebelan, say asawan bii et nepeg a sumpalen ton amin so sinambaan to odino insipan to. Inabuloyan to may sinambaan a sipan na asawa to diad ag to impanebel ed samay agew na impakaamta to.

15Balet no diad arapen et sebelan to lamlamang, nepeg a nadusa lapud ag impakasumpal na sinambaan a sipan.

16Sikara yay totontonen ya inter na Katawan ed kinen Moises nipaakar ed panggaway sinambaan a sipan na sakey a marikit a manaayam nid abung na ama to odino walay asawa.