1Nilabay nen Satanas ya itday gunigon iray totood Israel, kanyan tinangguyor toy David ya alaen toy bilang da.
2Ingganggan nen David si Joab tan saray arum a pangulo na saray sondalo, Laka yod intiron dalin na Israel, manlapud Beer-seba a sakey a ketegan na bansa ya anggad Dan a sananey a ketegan, ta bilang yo ray totoo. Labay kon naamtaan so karakel da.
3Inmebat si Joab, Say Katawan et parakelen to komun a maminlasus so totoo to. Kagalang kon Ari, aliwa tan aripen yo ran amin? Akin et labay yo yan gawaen tan pankasalananen yoy intiron bansa?
4Balet naonur lamlamang so ganggan na ari ed kinen Joab. Linmay Joab tan niliber toy intiron bansa, insan pinmawil ed Jerusalem.
5Imbaga tod Ari David so abilang to: diad Israel sakey milyon tan sanlasus libo a lalaki so nayarin mansondalo, tan diad Juda apat a lasus tan pitomplon libo a lalaki so nayarin mansondalo.
6Lapud sumlang si Joab ed ganggan na ari, ag to la binilang iray totoon kabyangay tribu di Levi tan Benjamin.
7Ag akaliket so Dios ed sayan agawa, kanyan dinusa toy bansa na Israel.
8Inkuanen David ed Dios, Ambelat so kasalanan ko lapud sayan ginawak! Pirdona mo ak pa. Inaambagel so ginawak.
9Inkuan na Katawan ed kinen Gad a propita nen David,
10Lakad kinen David, ta ibagam ed sikato ya itdan koy taloran pampilian. Gawaen ko so antokaman a pilien to.
11Linma sirin si Gad ed kinen David, sinalita toy impaibaga na Katawan, tan tinepet to, Dinay pilien mo?
12Taloy taon ya eras? Odino taloy bulan a deralderalen kayo na saray kalaban yo tan ibatik-batikan yo ra. Odino taloy agew ya idogpa na Katawan ed sikayo so ispada to tan mangibaki na salot ed dalin yo tan say anghil to so ikana tod pampatey na saray totood intiron dalin? Anto so ebat mo ya ibagak ed Katawan?
13Inmebat si David ed kinen Gad, Makapasinagem so kipapasen ko! Balet ag ko labay a dusaen ak na too. Say Katawan so labay kon manusad siak ta mapangpangasi.
14Kanyan say Katawan angibaki na salot ed saray totood Israel, tan pitomplon libo so inatey ed sikara.
15Say Dios angibaki na sakey ya anghil a maneral ed Jerusalem, balet angoman na kanunotan tan kuantod samay anghil, Tondaan mo la! Duga la tan! Manalalagey imay anghil ed abay na panagilikan nen Arauna a Jebuseo.
16Tinmangay si David et anengneng to may anghil a manalalagey ed liwang, sankabembenan toy ispada to, tan akaparaan lan maneral ed Jerusalem. Insan si David tan saray pangulo da ray totooakakawes iran amin na sakodinmakmomo ra ya anggad dalin.
17Nampikasiy David, O Dios, siak so nanggaway kaogsan. Siak so angiganggan a bilangen iray totoo. Antoy ginawa na sarayan totoo? Katawan a Dios ko, siak pay dusam tan say pamilyak, aliwan saray totoom.
18Imbaga na samay anghil na Katawan ed kinen Gad ya iganggan toy David ya onlan manggawa na altar a para Katawan diad panagilikan nen Arauna.
19Inonur nen David so ganggan na Katawan; linma sirin onung na imbaga nen Gad ed sikato.
20Diad saman a bekta, manaani na trigo si Arauna tan saray apatiran lalakin anak to. Nen anengneng da may anghil batik tan inmamut ira may anak to.
21Kanengneng nen Arauna ya onsasabiy Ari David, tinaynan to may panagilikan tan dinmakmomo ya anggad dalin diad impangigalang to.
22Inkuanen David ed sikato, Ilakom ed siak yay pasen a panagilikan mo, pian makapanggawa ak na altar a para Katawan, et ontonda lay salot. Iter kod sikay intiron bili to.
23Alam labat, Kagalang kon Ari, kuanen Arauna, ta gawam so labay mo. Nia ray bakan isaklang a bagat a popoolan; nia ray tablan panagilikan a nayarin pamparlang, tan sa trigon isaklang a bagat. Iter ko ran amin ed sika.
24Balet inmebat so ari, Andi, bayaran kod sikay intiron bili to. Ag ak mangibagat ed Katawan na antokaman a kayaryan mo ya ag ko binayaran.
25Kanyan initdan toy Arauna na anem a lasus a kuartan balituk a bayar na samay pasen a panagilikan.
26Insan nanggaway altar a para Katawan tan angisaklang na saray bagat a popoolan tan saray bagat a para kareenan. Nampikasi, et inebatan na Katawan diad panamegley na impangibaki toy apoy a nanlapud tawen ya amool ed saramay imbagat ed tapew na altar.
27Ingganggan na Katawan imay anghil ya ikaluban to la may ispada to, et inmonur imay anghil.
28Diad saya anengneng nen David ya inebatan na Katawan so pikakasi to, kanyan angisaklang na saray bagat ed tapew na altar diad panagilikan nen Arauna.
29Diad sayan panaon wala nid altar ed Gabaon so Tuldan Ayamay Katawan a ginawa nen Moises diad kalawakan, tan say altar a nampopoolan ed saray bagat;
30balet ag akakar diman si David a mangigalang ed Dios, lapud antakot ed samay ispada na anghil na Katawan.
Who We AreWhat We EelieveWhat We Do
2025 by iamachristian.org,Inc All rights reserved.
