1Totood Israel, dengel yoy ibabagad sikayo na Katawan.
2Kuanto,
Ag yo aaligen so kabibilay na saray totoo ed arum a bansa,
tan ag kayo nagugunigon ed saray tanda a nanengneng yo ed tawen,
anggaman a natatakot iray taga arum a bansa.
3Andi-kakanaan so rilihion da ra yan totoo.
Abatang ed takel so sakey a kiew;
tinatabtaban na kagawaan na marunong ya iskoltur,
4tan adikoraan na pilak tan balituk.
Nipeket na saray pasak
pian ag natumba.
5Saratan a talintaoy diriyos et singa ra totoon panagabul na saray manok ed katrigowan;
tan ag ira makasalita;
nakaukolan a sakbaten ira
ta ag ira makaakar.
Ag kayo natatakot ed sikara:
ag da kayo nayarin pasakitan,
tan anggapoy niiter dad sikayon kaabigan.
6 Katawan, anggapoy mipara ed sika: makapanyari ka,
tan matalonggaring tan makapanyari so ngaran mo.
7Siopay ag mangigalang ed sika, sika ya ari na amin a bansa?
Sika so manepeg a galangen.
Diad saray amin a makabat ed saray bansa,
tan diad amin da ray arari ed bansa,
anggapoy mipara ed sika.
8Andi-kalakal tan makulang-kulang ira yan amin a totoo.
Antoy naaral da ed saray kiew a talintaoy diriyos?
9Apalkapan na pilak a nanlapud Espanya iray talintaoy diriyos da;
apalkapan met na balituk a nanlapud Ufaz,
tan ginagawa ra na saray marunong a platiro;
akawesan ira na asul tan ambalbalangan abel,
ginawa ra na saray marunong a managabel.
10Balet sika, Katawan, so tua a Dios,
sika so mabilay a Dios,
tan say andi-anggaan ya ari.
No mampasnuk ka onggiwgiw so sankamundoan;
ag natepelan na saray bansa so pasnuk mo.
11(Sikayo ran totoo nepeg yon ibagad sikara a saray diriyos ya ag da ginawa so tawen tan dalin, et naderal ira. Naandi ra ed anggan iner a pasen diad tapew na dalin.)
Imno a Pangigalang ed Dios12Pinalsa na Katawan so dalin diad panamegley pakayari to;
diad panamegley na kakabatan to pinalsa na Dios so mundo
tan impanat toy katawenan.
13Diad ganggan to inmungol so danum ed tagey na tawen;
aawiten to ray lorem a nanlapud saray sokung na mundo.
Pakikirmaten to no onooran,
tan pasisiplugen toy dagem a manlalapud panagsinupan ton kuarto.
14Diad pakanengneng ed saraya,
nabirbir na amin a totoo a makulang-kulang tan anggapoy pakatalus da;
balang platiro naeekalay ilalo ed saray talintao to,
ta tila-tilan diriyos iray gagawaen da; anggapoy bilay da.
15Andi-kakanaan ira, tan kanepegan day balawen;
naderal ira no onsabin maneral ed sikara so Katawan.
16Aliwan singa sikara so Dios nen Jacob;
sikatoy nanggawa ed amin a bengatla,
tan pinili ton dilin totoo to so Israel.
Yahweh a Makapanyarin-amin so ngaran to.
Say Onsabin Kibantak na saray Israelita ed Arum a Bansa17Totood Jerusalem, lolooban da kayon dakepen. Ala yo ray kayaryan yo.
18Say Katawan pataynanen to kayo lad sayan dalin; pasegsegangen to kayo ya anggad anggapoy natilak ed sikayo. Say Katawan so nansalita.
19Inmeyag iray totood Jerusalem,
Mapalaloy inkasugat mi!
ag onabig iray sugat mi.
Abaloan mi no nayarian mi yan itepel!
20Aderal-deral iray tulda mi;
apolpoltut iray lobir ya impangitaker ed sikara.
Tinaynan kami na saray anak mi;
naandi la ran amin ed arap mi.
Anggapoy atilak a mangipaalagey lamet ed saray tulda mi;
anggapoy mangipeket na saray kurtina ra.
21Inmebat ak, Anggapoy kalakal iray pangulo mi;
ag ira papaiwanwan ed Katawan.
Sikato yay makasengeg no akin et aliwa ran maaligwas,
tan nikaykayat iray totoo tayo.
22Dengel kayo! Sinmabi lay balita!
Walay baleg a gewgew ed sakey a bansa ya anggad baybay;
saray sondalo to pagmaliwen dan kabueran iray siudad na Juda,
say pasen a panaayaman na saray asod katakelan.
23 Katawan, amtak ya anggapoy siopaman a toon walad lima toy pansumpalan to;
anggapoy toon nabembenan toy dilin bilay to.
24Petek mo kami pa ran totoom, O Katawan;
balet ag mo lalabasen.
Ag mo kami pa pepeteken no mamapasnuk ka,
ompan samput mi la.
25Idapom pa so pasnuk mo ed saray totoon ag mangigagalang ed sika,
tan diad saray totoon mangipopolisay ed sika.
Pinapatey da ray totoom;
sigput da kamin dinederal,
tan dinederal day bansa mi.
Who We AreWhat We EelieveWhat We Do
2025 by iamachristian.org,Inc All rights reserved.
