EZEKIEL 24 - Maung a Balita Biblia (PnPV)(PnPV)

Say Latiyan a Kaldiro

1Nen kumaplon agew na kumaplon bulan na kumasiam a taon na inkibantak mi, say Katawan akisalitad siak.

2Inkuanto, Sika a toon ompatey, isulat mo yan pitsa, lapud sikato yay agew ya igapo na ari na Babilonia so panlakob tod Jerusalem.

3Ibagam ed saray mananumpan totook so sayan alimbawa, a siak a Katawan a Dios kuankod sikara:

Itoon yo so kaldiro

tan pano yo na danum.

4Kargaan yo na saray sankaabigan a tegteg na karni

saray ulpo tan saray sali

kargaan yo met na pinili ran pokel.

5Ikana yo so karni na sankaabigan a karniro;

sungloran yo na kiew so akatoon a kaldiro.

Palwag yo so danum;

ilambung yo so pokel tan say karni.

6Sikato ya so kuan na Katawan a Dios: Pakaskasi so siudad a kawalaan da ray totoon managpatey na too! Kapara toy latiyan a kaldiro ya ag balut naorasan. Sansakey a nanaala so tegteg na karni tan anggapoy akeraan a karga to.

7Walay impanpapatey na too ed siudad, balet aliwan diad dalin so akaibungan na dala a komun natabunan na dabuk; dia ingen ed tapew na baton-dampay so akaibungan to.

8Intilak kod saman a pasen so dala a diman ag nasaniban, et diad ontan onsabiy pasnuk kon ombawi.

9Sikato yay ibabaga na Katawan a Dios: Pakaskasi so siudad a kawalaan da ray managpatey na totoo! Siak a dili so mangisimbun na kiew ya itutungo.

10Mangyakar kayo ni na kiew! Parlangan yo nin maung! Luto yoy karni! Palwag yo lan palwag ya anggad naoput so sabaw! Parlangan yon maung ya anggad napoolan so pokel.

11Natan igaton yod ngalab so anggapoy kargan kaldiron gansa tan paolyan yon ombalbalanga. Diad satan nalinisan lamet imay kaldiro onung ed ganggan no napagpag la ray lati to lapud petang,

12anggaman ya ag naandipat ed apoy so amin a lati to.

13Jerusalem, dinotakan ka na ginagawam ya immoralidad. Anggaman a sinalik a linisan ta ka, nansiansia kan marotak. Ag ka magmaliw a malinis lamet ya anggad naliknam so sulit na pasnuk ko.

14Siak a Katawan so nansalita. Sinmabiy oras a siak so onggalaw. Ag ko palabasen iray kasalanan mo odino kasian odino abageyen ta ka. Nadusa ka lapud saray ginagawam. Say Katawan a Dios so nansalita.

Say Impatey na Asawa na Propita

15Say Katawan akisalitad siak.

16Inkuanto, Sika a toon ompatey, diad sakey labat a waswas alaen koy toon inararom. Anggaman onyay nagawa ag ka manririklamo odino onaakis odino onlulua.

17Ag mo ikakasil so panngesnges mo. Ag ka ompapaway ya anggapoy turban mo odino kasali-sali a pangipanengneng moy ermen mo. Ag mo sasakbungay lupam; ag ka met mamangan na kakanen da ray maneermen.

18Kabkabwasan, akitongtong ak ed saray totoo. Diad saman a labi inatey so asawak, tan diad ontombuk ya agew ginawak imay nibagad siak.

19Tinepet ed siak na saray totoo, Akin et ontay gagawaen mo?

20Kanyan inkuankod sikara, Akisalitad siak so Katawan tan imbaga tod siak

21a salitaen ko yad sikayon Israelita: Ikikinon yoy biskeg na Timplo. Labalabay yon nengnengen tan laen, balet dotakan na Katawan. Napatey ed bakal iray malangwer nin kabyangay pamilya yon atilak ed Jerusalem.

22Diad satan gawaen yoy singa ginawak. Ag yo sakbungan so kalupaan yo odino mangan na kakanen da ray maneermen.

23Ag kayo ompaway ya anggapoy turban yo odino kasali-sali; ag kayo manermen odino onakis. Onebeng kayo lapud saray kasalanan yo, tan manaakisan kayo.

24Diad satan magmaliw ak a sakey a tanda ed sikayo: aligen yo ray amin a ginagawak. Imbaga na Katawan a no nagawa ya, naamtaan yo a sikato so Katawan a Dios.

25Inkuan na Katawan, Natan, sika a toon ompatey, dengel moy ibagak. Ekalen kod sikara so Timplo ya ikikinon da tan pakaliliketan da; labalabay dan nengnengen tan laen. Ekalen ko met iray anak dan lalaki tan bibii.

26Diad agew na panggawak ed saya, walay toon nibatikan toy deral ya onlad sika tan salitaen toy agawa.

27Diad satan met ya agew, makapansalita ka lamet, tan mitongtong kad sikato. Diad onya magmaliw kan sakey a tanda ed saray totoo, tan nakabatan da a siak so Katawan.