JOSUE 6 - Maung a Balita Biblia (PnPV)(PnPV)

Say Inkatalo na Siudad na Jerico

1Akakaput iray puirta na siudad na Jerico tan aguardiaan ira pian ag makaloob iray Israelita. Anggapoy makaloob o makapaway ed siudad.

2Inkuan na Katawan ed kinen Josue, Ipapalimak ed sika so Jerico, pati say ari to tan amin da ray masebeg a sondalo to.

3Sika tan saray sondalom et nepeg yon liberen a maminsan ed sanagew so paway na siudad; anem agew a gawaen yo ya.

4Pitoran papari a sankaawit na balang sakey ed sikara so trumpita, so onlad arap na Kaban na Sipanan. Diad kumapiton agew sika tan saray sondalom et nepeg yon liberen a mamimpito so siudad legan a papaknulen na saray papari iray trumpita.

5Insan mamaknul ira na sakey a maksil a tunon andokorokey. Kadngel yod satan a tanul, oneyag na makmaksil iray amin a totoo, et nageba ray padir na siudad. Insan onkalab ed siudad iray amin a sondalo.

6Tinawag nen Josue iray papari tan inkuantod sikara, Sakbat yoy Kaban na Sipanan, tan pitorad sikayo so manayam ed arap to a sankaawit da ray trumpita.

7Insan ingganggan to ray totoo to a gapoan day onliber ed siudad; saray guardia so ononan onliber a tomtombuken ira na samay Kaban na Sipanan na Katawan.

8-9Kanyan onung na ingganggan nen Josue, wala ray guardian akaonad saray paparin mamapaknul na trumpita; manomtombuk ed saraya iray paparin manasakbat ed Kaban na Sipanan a totombuken ira na saray guardiad beneg. Legan dan liliberen so siudad napapaknul iray trumpita.

10Balet ingganggan nen Josue iray totoo to ya ag ira oneeyag o mangibabalikas na anggan sakey a salita ya anggad gangganen to ra.

11Kanyan impailiber ton aminsan ed siudad ed sarayan grupo na lalaki imay Kaban na Sipanan na Katawan. Insan ira pinmawil ed kampo tan diman ira amalabas na labi.

12-13Diad ontombuk ya agew asaksakbay a binmangon si Josue. Singa samay imbeneg ya agew niliber day siudad ira may papari tan saray sondalo, a namparay impantotombukan da: onona, saray guardiad bandad onaan; ontombuk, saray pitoran papari a mamapaknul na saray trumpita; insan saray paparin manasakbat na Kaban na Sipanan na Katawan; tan diad kaonuran, saray guardiad bandad beneg. Legan dan liliberen so siudad napapaknul iray trumpita.

14Diad sayan kumadwan agew linmiber ira lamet ya aminsan ed siudad, insan ira pinmawil ed kampo. Anem agew da yan ginawa.

15Diad kumapiton agew binmangon irad palbangon tan niliber dan amimpito imay siudad, singa samay impanliber dan inmonasikato ya labat so agew ya amimpito ran niliber so siudad.

16Diad kumapiton liber da, nen kuan lan paknulen na saramay papari iray trumpita, ingganggan nen Josue iray totoo to ya oneyag ira, tan kuanto, Inter lad sikayo na Katawan so siudad!

17Say siudad tan amin a logan to et nepeg a sigput iran deralen tan ibagat irad Katawan. Si Rahab a marotak a bii tan saray kabyangay pamilya to labat so ag yo didiwiten, lapud inyamut to ray ispia tayo.

18Balet ag kayo mangaala na antokaman a nepeg a deralen; no mangala kayo, ondalan so gunigon tan deral ed kampo na Israel.

19Amin a bengatlan ginawa ed pilak, balituk, gansa, odino balatyang et ibiig iran para Katawan. Nepeg ya iyakar ira ed panagsinupan na kayamanan na Katawan.

20Kanyan pinaknul na saray papari iray trumpita. Kadngel ed saya na saray totoo, inmeyaeyag ira, et ageba ray padir. Insan amin a sondalo kinmalab irad siudad, et adakep da.

21Pinapatey dad panamegley na ispada iray amin a walad siudad, lalaki may bibii, malangwer may matakken. Pinapatey da met iray baka, karniro, tan saray asno.

22Insan inkuanen Josue ed saramay duaran lalakin ispia, Laka yod abung na samay marotak a bii, ipaway yo, sikato tan saray kabyangay pamilya to, onung na insipan yod sikato.

23Kanyan linma ran angipaway ed kinen Rahab a pati si ama to, ina to, saray agagi ton lalaki, tan arum ni ran kabyangay pamilya to. Inala da ran amin, saray kabyangay pamilya to tan saray aripen to, tan inyakar da rad asingger ed kampo da ray Israelita.

24Insan da pinoolan so siudad tan amin a logan to, likud labat ed saray bengatlan ginawad balituk, pilak, gansa, tan balatyang, ta inaala da ra tan inyaakar da ra ed panagsinupan na kayamanan na Katawan.

25Balet si Josue impaliis tod patey si Rahab a marotak a bii tan amin da ray kakanayon to, lapud inyamut nen Rahab ira may duaran ispia ya imbaki nen Josue ed Jerico. (Manaayam nid Israel ya anggad natan iray kabyangay boleg nen Rahab.)

26Diad sayan panaon si Josue impaakseb toy sakey a pasakbay: Siopamay mamasimbalon mamaalagey ed siudad na Jerico et nagawad sikato yan samba na Katawan,

Siopamay mangiletneg na pundasion to nabalang toy sankapangulowanan ya anak ton laki;

Siopamay mamaalagey na saray puirta to, nabalang toy sankayogtanan ya anak ton laki.

27Kaolup nen Josue so Katawan, kanyan nikayat ed intiron bansa so inkabantug to.