BILANG 35 - Maung a Balita Biblia (PnPV)(PnPV)

Saray Siudad a Nipabetang edsaray Levita

1Diad saray patar na Moab ed nibaliw na Jordan manlapud Jerico say Katawan kuantod kinen Moises,

2Ibagam ed saray Israelita a diad saray naawat dan kayaryan nepeg ya itdan da ray Levita na pigaran siudad a panayaman da tan dalin a panagpastolan ed kaliber-liber na saray siudad.

3Kayaryanen ira ya na saray Levita tan panayaman da ra. Say dalin a panagpastolan et para saray baka ra tan saray arum ya ayayep da.

4Manlapud balang dapag na saray padir na siudad say dalin a panagpastolan et onlaknab a mamapaway na apat a lasus limamplo tan apat a mitro.

5Kanyan walay kuadradon dalin a siam a lasus tan waloran mitro so karokey na balang dapag, tan walad pegley so siudad.

6Nepeg yon itdan iray Levita na anemiran siudad a salimbengan a nayarin batikan na sakey a toon akapatey ya ag to ginagala. Itdan yo ni ra na apataplo tan duan siudad

7a pati say dalin a panagpastolan da; kanyan apataplo tan walon amin a siudad so iter yod sikara.

8Say karakel na siudad da ray Levita ya iter na kapag tribu et ontokuy ed kabaleg na dalin to. Say baleg a tribu dakel so iter to; say melag daiset so iter to.

Saray Siudad a Salimbengan

9-10Say Katawan kuantod saray totood Israel diad panamegley nen Moises: No nabaliw yo lay Ilog na Jordan tan makaloob kayo lad dalin na Canaan,

11mamili kayo na saray siudad a salimbengan a nayari ran batikan na toon akapatey, ya ag to ginagala.

12Diad siudad a batikan na akapatey ag la nayarin tombuken na kanayon na apatey a labay toy onbawi. Ag nepeg a pateyen so toon naakusan amatey no ag ni asalaysay ed arap na karaklan.

13Mamili kayo na anemiran siudad,

14talora ed bokig na Jordan Tan Talora ed dalin na Canaan.

15Sikara so siudad a salimbengan na saray Israelita tan saray sangkailin magano ra labat odino mansiansia ran manayam ed kawalaan yo. Siopamay makapatey ya ag to ginagala et nayarin ombatik ed sarayan siudad.

16-18Balet no say sakey a too et mangikana na armas a balatyang odino bato odino kiew ed pamatey to, mankasalanan lapud impakapatey toy too, kanyan nepeg a pateyen.

19Say sankaasinggeran a kanayon na pinatey so akaoley a mamatey na samay amatey. No narumog to, nepeg a pateyen to.

20No kabosul na sakey a too so siopaman tan napatey to diad pangitulak to odino panupak tod sikato

21odino pamoniti te, sikatoy mankasalanan lapud impakapatey toy too, kanyan nepeg a pateyen. Say sankaasinggeran a kanayon na pinatey so akaoley a mamatey na samay amatey. No narumog to, nepeg a pateyen to.

22Balet no bilang ag ginagalan napatey na sakey a too so siopaman ya ag to kabosul, lapud impakapangitolak to odino lapud impakatupak to,

23odino lapud andi-nengnengen a pangitupak to na bato et napatey toy sakey a toon ag to ginetman pasakitan tan ag to kalaban,

24say karaklan et nepeg ya ag da pankasalananen imay toon akapatey tan ag da nepeg a pilaan so toon labay toy ombawi a kanayon to may napatey.

25Say karaklan et nepeg ya iyagel dad kanayon na samay toon napatey imay toon makapatey, kanyan nepeg dan ipawil ed siudad na salimbengan a binatikan to la. Nepeg a manayam diman ya anggad ipatey na Pangulon Pari ed saman a panaon.

26No taynan na toon akapatey so siudad na salimbengan a binatikan to,

27et pinatey na akarumog ed sikaton kanayon na samay apatey to, sayan bales et aliwan kasalanan na impakapatey ed sakey a too.

28Samay toon nankasalanan na impakapatey nepeg a manayam ed siudad na salimbengan ya anggad ipatey na Pangulon Pari, balet kapatey to nayarian to lay onsempet.

29Sarayan totontonen et onkanad sikayo tan saray kabyangay boleg yo, anggan iner so panayaman yo.

30Say toon naakusa lapud impakapatey toy too et nayari labat a sintinsiaan a nankasalanan tan pateyen diad panamegley na pantasi na duara odino masoluk a duaran too; say sakey a tasi et aliwan magenap a mamaneknek na impakapatey ed sakey a too.

31Say toon mamatey na kapara ton too et nepeg a pateyen. Ag nayarin paliisan toy dusa na kasalanan to diad pambayar to na kuarta.

32No say sakey too et batik ed sakey a siudad a salimbengan, ag yo aabuloyan a mambayar pian makasempet la kasakbayan na ipatey na Pangulon Pari.

33No pambayaren yo, dotakan yoy dalin a panayaaman yo. Ta say pamatey na too et dotakan toy dalin, tan likud ed pamatey ed toon amatey anggapoy sirimonya a nayarin gawaen a makapanlinis ed dalin ya impamateyan ed sakey a too.

34Ag yo dodotakan so dalin a panaayaman yo, lapud siak so Katawan tan manaayam ak ed kawalaan yon totood Israel.