1Sasalitaen na sayan libro so nipaakar ed imbabaga nen Jeremias a lakin anak nen Hilcias, tan sakey ed saray papari ed baley na Anatot diad dalin nen Benjamin.
2Akisalitay Katawan ed kinen Jeremias nen kumalabintaloy taon na panaarid Juda nen Josias a lakin anak nen Amon.
3Akisalita lamet ed sikato so Katawan nen arid Juda si Joakim a lakin anak nen Josias. Kayari to ya, amimpiga-pigan akisalitay Katawan ed sikato anggad kumalabinsakey na panaari nen Sedekias a lakin anak nen Josias. Nen kumaliman bulan ed saman a taon, saray totood Jerusalem et nibantak irad arum a bansa.
Say Impanawag na Katawan ed kinen Jeremias4Inkuan na Katawan ed siak,
5Kasakbayan ta kan initday bilay pinili ta ka la, tan kasakbayay inkianak mo, pinili ta kan magmaliw a propita ed saray bansa.
6Insan ko inkuan, Katawan a Dios, ag ko amtay mansalita; ogaogaw ak ni.
7Balet inkuan na Katawan ed siak, Ag mo ibabagan ogaogaw ka; ingen, lakad saray totoon pangibakian kod sika, tan ibagam ed sikaray amin ya igaganggan kod sika.
8Ag ka ontatakot ed sikara, ta wala ak a mangyagel ed sika. Siak, say Katawan, so nansalita!
9Insan inyonat na Katawan so taklay to, diniwit to ray bibil ko, insan kuantod siak, Nia, iter kod sika ray nepeg mon salitaen.
10Natad sayan agew iiter kod sikay pakaoley ed saray bansa tan saray nanarian, pian sikay mamagut tan mangigeba, maneral tan manalo, mamaalagey tan mangiletneg.
Saray Duaran Pasingayew11Tinepet na Katawan ed siak, Jeremias, antoy nanenengneng mo?
Inmebat ak, Sakey a sangay kiew ya almindra.
12Inkuan na Katawan ed siak, Tua tay imbagam, tan mambabantay ak, pian naimatunan koy pakasumpal na saray sinalitak.
13Akisalita lamet ed siak so Katawan. Tinepet to, Anto niy nanenengneng mo?
Inmebat ak, Nanenengneng kod baybay so sakey a bangan manlelwag so karga to. Ngalngali la onlepwad abalaten so karga to.
14Inkuantod siak, Say deral a manlapud baybay et ondapod saray amin a manaayam diad sayan dalin,
15lapud tatawagen kon ondago ray amin a bansa ed baybay. Saray arari ra ilira ray trono ra diad saray puirta na Jerusalem tan diad kaliber-liber na saray arum a siudad na Juda.
16Dusaen ko ray totook lapud nankasalanan ira; inkaindan da ak, nansasaklang iray bagat ed saray diriyos, tan inggagalang da ray ginagawa ran talintaoy diriyos.
17Mamparaan ka, Jeremias; laka, ta ibagam ed sikaray amin ya ingganggan kod sikan salitaen mo. Ag ka la natan ontatakot ed sikara; ta no andi, pagmaliwen ta kan lalon ontakot no wadman ka lad sikara.
18-19Dengel ka, Jeremias! Onsumpad sika so balang sakey a too ed sayan dalinsaray arari ed Juda, saray opisyal, saray papari, tan saray totoo. Balet natan iitdan ta kay biskeg, pian nasumlang mo ra; magmaliw kan singa siudad ya aliber na padir, singa balatyang a lusek, tan singa gansan padir. Ag da ka natalo, ta wala ak ed sika a mangyagel ed sika. Siak, say Katawan, so nansalita.
Who We AreWhat We EelieveWhat We Do
2025 by iamachristian.org,Inc All rights reserved.
