SARAY PROBIRBIO 15 - Maung a Balita Biblia (PnPV)(PnPV)

1Say mapalnan ebat pakekepaen toy pasnuk, balet say ansakit ya ebat palolooren to.

2No mansalita ray makabat a totoo, parakepen day pakatalus, balet andi-kabaliksan so lalabiren da ray makulang-kulang.

3Sankanengneng na Katawan iray nagagawa ed inerman a pasen; bambantayan to itayo, maung man o maoges so gagawaen tayo.

4Bilay so iiter na marakep iran salita, balet makaderal na kalakal iray maruksan salita.

5Inkakulang-kulang so ag mo idengel ed bangat na amam; balet kakabatan so pangako na panametek to.

6Saray totoon matonung isisinup da ray kayamanan da, balet saray totoon maoges nababalang da ra no panaon na kairapan.

7Say pakaamta ikakayat na saray totoon makabat, aliwan saray makulang-kulang.

8Makaliliket so Katawan no mampikasi iray totoon maptek, balet kabosul to ray bagat ya iyaakar ed sikato na saray totoon maoges.

9Kabosul na Katawan so kagagawa da ray totoon maoges, balet inaro to ray manggagaway kaptekan.

10No aliwa so gawaen mo mapalaloy kadusam; ompatey ka no ag mo labay so papetek.

11Amta na Katawan so anggan walad pasen a panaayaman da ray inaatey; panon sirin ya iyamut na too ed Dios iray kanunotan to.

12Saray totoon mapaatagey ag da labay so papetek; ag iran balut onkekerew na simbawa ed saray totoon makabat.

13No maliket iray totoo onimis ira, balet no maermen ira ombilonget so lupa ra.

14Saray totoon ikakana ray olo ra labay day manaral, balet saray makulang-kulang maliket la ra, anggan anggapoy amta ra.

15Andi-tondan irap so bilay da ray totoon mairap-bilay, balet magayaga lawas so bilay da ray totoon maliket.

16Maung niy mairap-bilay a walay panamagalang ed Katawan, nen say mayaman a walad gunigon.

17Magmaung niy mangan na pising a karongom iray totoon inarom, nen say mangan na sankamaungan a karni a walay bosulan.

18Say toon mapetang na olo igagapo toy sangsangan, balet say toon maanos mangiiter na kareenan.

19No mangiras ka kairapay nasagmak mo ed anggan iner, balet no matwa ka, anggapoy onsabid sikan gunigon.

20Say anak a makabat paliliketen toy ama to. Say makulang-kulang labat ya anak so mambabalaw ed ina to.

21Saray totoon anggapoy kalakal maliket irad kaambagelan da, balet saray totoon makabat gawaen day kaptekan.

22Dengel kad amin a simbawa, et onaligwas ka, balet no ibeneg mo ra kasumpalan moy aliwa-liwa.

23Agaylay gayaga na pakalmo na dugan salita para dugan okasyon!

24Saray totoon makabat mankukurang irad dalan a mamaarap ed bilay diad tagey, aliwan diad dalan a mamaarap ed pasen a panaayaman da ray inaatey diad leksab.

25Deralen na Katawan so kaabungan na saray totoon mapaatagey, balet iyagel toy kayamanan na saray bibiin balo.

26Kabosul na Katawan iray maoges a kanunotan, balet pakaliliketan to ray salitan makaruyruyo.

27Say toon masaol mangiiter na gunigon ed pamilya to. Ag ka mangaawat na pasoksok, et andokey so bilay mo.

28Saray maung a totoo mannununot ira kasakbayan iran onebat. Saray totoon maoges bengat-bengat iran onebat, balet panlalapwan ya na golo.

29No mampikasi ray maung a totoo, ondengel so Katawan, balet ag to aasikasoen iray totoon maoges.

30Saray makakaimis a lupa pagmamaliwen da kan maliket, tan say maung a balita pagmamaliwen ton maung so liknaan mo.

31Makabat ka no ondengel kad maung a simbawa.

32No ag mo labay so manaral, sisibletan moy sikan dili. No awaten moy maung a simbawa naaromay kakabatan to.

33Say pangigalang ed Katawan et sakey a pakaaralan. Nepeg a mampaabeba ka kasakbayan a napagalangan ka.