SARAY ARARI 15 - Maung a Balita Biblia (PnPV)(PnPV)

Si Ari Uzias na Juda(2 Awa. 26:1-23)

1Nen kumaduamplo tan piton taon na panooley nen Ari Jeroboam ed Israel, nagmaliw ya ari na Juda si Uzias a lakin anak nen Amasias.

2Ginmapon nanari nen mantaon na labinanem, tan nanayam ed Jerusalem legan ton nanoley a limamplo tan duay taon. Si Jecolia a taga Jerusalem so ina to.

3Ginagawa toy makapaliket ed Katawan, ta inalig toy ginagawa nen ama to.

4Balet ag to dineral iray paganon pasen a panangigalangan, kanyan intuloy na saray totoo so nambagat tan nampool na insinso ed saraman a pasen.

5Impansakit na Katawan si Uzias na kating tan nansiansia yad sikato legan to nin nambilay. Nibiig so nanayaman ton abung, asoblayan ed saray kimey to, tan si Jotam ya anak ton laki so nanoley ed bansa.

6Nisulat ed libron Say Awaran da ray Ararid Juda iray arum nin ginagawa nen Uzias.

7Inatey si Uzias, nipompon ed kamposanto da ray arari diad Siudad nen David, insan sinmalat ed sikaton nanari si Jotam a lakin anak to.

Si Ari Zacarias na Israel

8Nen kumatalomplo tan walon taon na panooley nen Ari Uzias ed Juda, nagmaliw ya ari na Israel si Zacarias a lakin anak nen Jeroboam, tan nanayam ed Samaria legan ton nanoley ya anem bulan.

9Nanggagawa na kaogsan sumpad Katawan a singa ginagawa na saray akaonan nanoley nen say sikato. Inalig toy impankakasalanan nen Ari Jeroboam a lakin anak nen Nebat, say arin nilagyat ton nankasalanan so Israel.

10Impangulo nen Sallum a lakin anak nen Jabes so komplut a sumpad kinen Ari Zacarias; pinatey to ed Ibleam si Zacarias, insan sinalatan ton nanari.

11Nisulat ed libron Say Awaran da ray Ararid Israel iray arum nin ginagawa nen Zacarias.

12Kanyan asumpal imay sipan na Katawan ed kinen Ari Jehu: Manari ed Israel iray boleg mo ya anggad kumapat a kailalakan.Si Ari Sallum na Israel

13Nen kumatalomplo tan siam a taon na panooley nen Ari Uzias ed Juda, nagmaliw ya ari na Israel si Sallum a lakin anak nen Jabes, tan nanayam ed Samaria legan ton nanoley a sakey bulan.

14Nanlapud Tirza si Menahem a lakin anak nen Gadi tan linmad Samaria; pinatey toy Sallum, insan sinalatan ton nanari.

15Nisulat ed libron Say Awaran da ray Ararid Israel iray arum nin ginagawa nen Sallum, pati say impangulo ton komplut.

16Nen manlapud Tirsa si Menahem, sigput ton dineral so siudad na Tapua, saray manaayam diman, tan saray kaliber-liber ton lugar, ta ag sinmukod sikato yan siudad. Binubutyakan to ni ingen iray amin a malokun.

Si Ari Menahem na Israel

17Nen kumatalomplo tan siam a taon na panooley nen Ari Uzias ed Juda, nagmaliw ya ari na Israel si Menahem a lakin anak nen Gadi, tan nanayam ed Samaria legan ton nanoley a samploy taon.

18Nanggagawa na kaogsan sumpad Katawan; inalig ton anggad impatey to so impankakasalanan nen Ari Jeroboam a lakin anak nen Nebat, say arin nilagyat ton nankasalanan so Israel.

19Nilabanan nen Impirador Tiglat-pileser na Asiria so Israel, et initdan nen Menahem na talomplo tan walon toniladan pilak, pian pansiansiaen ton manoley ed Israel.

20Pinasoot nen Menahem ya impangiter na limamplon pilak so balang mayaman a too ed Israel. Kanyan amawil lay Impirador Tiglat-pileser ed dilin bansa to.

21Nisulat ed libron Say Awaran da ray Ararid Israel iray arum nin ginagawa nen Menahem.

22Inatey, nipompon, insan sinmalat ed sikaton nanari si Pecayas a lakin anak to.

Si Ari Pecayas na Israel

23Nen kumalimamplon taon na panooley nen Ari Uzias ed Juda, nagmaliw ya ari na Israel si Pecayas a lakin anak nen Menahem, tan nanayam ed Samaria legan ton nanoley a duay taon.

24Nanggagawa na kaogsan sumpad Katawan; inalig toy impankakasalanan nen Jeroboam a lakin anak nen Nebat, say arin nilagyat ton nankasalanan so Israel.

25Akikomplut ed limamplon lalakin taga Galaad si Pekas, say lakin anak nen Remalias tan opisyal na saray sondalo nen Pecayas. Pinatey toy Pecayas diad tirinsirad dalem na palasio ed Samaria, insan sinalatan tod nanari.

26Nisulat ed libron Say Awaran da ray Ararid Israel iray arum nin ginagawa nen Pecayas.

Si Ari Pekas na Israel

27Nen kumalimamplo tan duan taon na panooley nen Ari Uzias ed Juda, nagmaliw ya ari na Israel si Pekas a lakin anak nen Remalias, tan nanayam ed Samaria legan ton nanoley a duamploy taon.

28Nanggagawa na kaogsan sumpad Katawan; inalig toy impankakasalanan nen Jeroboam a lakin anak nen Nebat, say arin nilagyat ton nankasalanan so Israel.

29Legan na panaari nen Pekas, si Tiglat-pileser ya impirador na Asiria adakep to ray siudad na Ijon, Abel-bet-maaca, Janoa, Kedes, Hazor, Galaad, Galilea, tan Neftali; dinakep to ray totoom manaayam ed sarayan siudad, insan inawit to ran priso ed Asiria.

30Nen kumaduamplon taon na panaarid Juda nen Jotam a lakin anak nen Uzias, si Oseas a lakin anak nen Ela impangulo toy komplut a sumpad Ari Pekas; pinatey to, insan sinalatan ton ari.

31Nisulat ed libron Say Awaran da ray Ararid Israel iray arum nin ginagawa nen Pekas.

Si Ari Jotam na Juda(2 Awa. 27:1-9)

32Nen kumadwan taon na panaarid Israel nen Pekas a lakin anak nen Remalias, nagmaliw ya arid Juda si Jotam a lakin anak nen Uzias.

33Ginmapon nanoley nen mantaon na duamplo tan lima, tan nanayam ed Jerusalem legan ton nanoley na labinanem taon. Si Jerusa ya anak nen Zadoc so ina to.

34Ginagawa nen Jotam so makapaliket ed Katawan tan inalig to ray ginagawa nen Uzias.

35Balet ag to dineral iray paganon pasen a panangigalangan, kanyan intuloy na saray totoo so nambagat tan nampool na insinso ed saraman a pasen. Si Jotam so angipaalagey ed Puirtan Baybay na Timplo.

36Nisulat ed libron Say Awaran da ray Ararid Juda iray arum nin ginagawa nen Jotam.

37Sikatoy peles ya ari nen imbaki na Katawan ira di Ari Rezin na Siria tan Ari Pekas na Israel, a dogpaan day Juda.

38Inatey si Jotam, nipompon ed kamposanto da ray arari diad Siudad nen David, insan sinmalat a nanari si Acaz a lakin anak to.