1Nalilingo ray totoon maoges no kuandad sikaran dili, Antikey so bilay mi tan napno na kaermenan, tan no onsabi lay samput to, anggapo lay nagawaan. Anggapo niy akabatan a toon akapawil a nanlapud pasen a panaayaman da ray inaatey.
2Nianak itayo ya andid plano, et no mansamput lay bilay, singa met ni lamlamang ag itayo nianak a balut. Singa pugsoy asewek so ingas tayo; singa talagsik na mamparuk a puso tayo so kanunotan tayo.
3No narep lay talagsik, magmaliw a dapul so laman tayo, tan magmaliw a kabyangan na dagem so ingas tayo.
4Diad idalan na panaon, anggapoy makanunot ed antokaman a ginagawa tayo, tan nalingwanan so pati kangaranan tayo. Naandin singa lorem so bilay tayo, tan onlabas a singa kelpa ed petang na agew.
5Singa onlalabas ya anino so panaon tayo ed tapew na dalin. Ag napaliisan so agew na ipatey tayo; nigetar, et anggapoy siopaman a pakapangikuntang.
6Kuan na saray totoon maoges, Sigi sirin, panliketan tayo ray maung a bengatla na bilay, tan mambilay itayo diad tapew na dalin a singa impanbilay tayo nen malangwer itayo ni ya anggapoy kapagaan tayo!
7Oninom tayo na sankablian iran alak tan ikana tayoy sankaabigan iran pabalingit. Ag tayo papalabasen so anggan saksakey a rosas no panaon to!
8Kasakbayay kalenes na saray rosas, getelen tayo ra tan ipeket tayo rad buek tayo!
9Mankakasakey tayo tan mangitilak tayo ed inerman a pasen na saray tanda na anggapoy kapagaan ya impanliliket tayo! Kanepegan tayo yan gawaen!
10Pairapen tayo ray mairap-bilay, anggan matonung ira. Ag tayo pagalangan iray bibiin balo odino mamatakken a totoo.
11Ipasen tayon matonung so sikatayon dili no walay biskeg tayon mangala na labay tayo. Anggapoy toon inmaligwas diad panamegley na inkakapoy!
12Makaskasbel labat iray totoon matonung, kanyan mananap itayoy pankanawnawan mamatey ed sikara. Sumpa rad gagawaen tayo; aakusaen da itayon onsusumlang ed Ganggan nen Moises tan onsusumpad saray kaogaliyan da ray lalaki tayo.
13Ibabaga ran kabat day Dios, tan ipapasen day sikaran dili ya anak na Katawan.
14Ag tayo naanosan a nengnengen iray ontan a totoo; susumpaen na inkatoo ra so intiron panagnunot tayo.
15Aliwan ran singa arum a totoo; domay kagagawa ra.
16Abaloan dan marotak iray ikakana tayon totontonen ed panagbilay, kanyan nepeg a paliisan so antokaman a gagawaen tayo. Ipapanta ra a say Dios so Ama ra, tan manisia ra a no nibaga tan agawa lay amin, saray matonung labat so manliket.
17Balet nengnengen pa no tua tan kasi! Nengnengen pa no antoy nagawa no oras na ipatey da!
18No tuan anak na Dios iray matonung, iyagel ira na Dios ed saray kalaban da.
19Kanyan suboken tayo ra. Magmaliw tayon maruksad sikara, tan pairapen tayo ra; nengnengen pa no panoy kareen da tan inkadugay panagnunot da!
20Naamtaan tayo so anggaan na inkaanos da! Sintinsiaan tayo ra na makapabaing ya ipapatey. Andi bali, ta kuandan iyagel ira na Dios.
21Onya so panagnunot na saray totoon maoges balet alingo ra. Abulag ira na dilin kaogsan da.
22Ag dan balut naamtaan iray iyaamut na Dios; ag iran balut nanilalo ed saray tumang na masanto tan anggapoy pakabalawan a bilay.
23Nen pinalsa itayo na Dios, ag to ginetman ompatey itayo; ginawa to itayon singa sikato.
24Say ibeg na Diablo so angyakar na patey ed mundo, tan saray kayaryan na Diablo so ompatey.
Who We AreWhat We EelieveWhat We Do
2025 by iamachristian.org,Inc All rights reserved.
