OBADIAS 1 - Maung a Balita Biblia (PnPV)(PnPV)

1Sikato yay propisiya nen Obadiassay imbaga na Katawan a DIOS nipaakar ed bansa na Edom.

Dusaen na Katawan

so Edom

Say Katawan imbaki tod saray bansa so managbalita to,

et nadngel mi so imbalita to:

Mamparaan kayo! Onla itayon mibakal ed Edom!

2Say Katawan kuantod Edom,

Pagmaliwen ta kan saginonur ed saray bansa;

mapalaloy kabalaw-balaw mo.

3Pinalikdo ka na panagpaatagey mo.

Manaayam ka ed tirinsiran malmalet a baton-dampay;

walad toktok na saray palandey so abung mo,

kanyan kuanmod sikan dili,

Siopay makapangileksab ed siak?

4Anggan ipaalagey mod atagtagey a pasen so abung mo,

ya atagtagey a singa kawalaan na obung na agila,

ta pian singa ka walad kawalaan da ray bitewen,

igoyur ta kan siansia ed leksab.

5No onloob ed labi iray matatakew,

alaen da labat iray labalabay da.

No mamborbor na ubas iray totoo,

walan walay ikera dan natortor.

Balet sigput kayon dineral na saray kalaban yo.

6Sikayo ran kabyangay boleg nen Esau, asamsam iray kayamanan yo.

7Pinalikdo kayo na saray kagampi yon bansa;

pinataynan da kayo ed dilin bansa yo.

Dinakep kayo la natan na saray totoon kakaaro yo nen saman.

Pinatitan kayo na saray totoon malmalet yon kakaaro;

ikuandad sikayo, Iner natan so kawalaan na kasiliban da?

8Diad agew a dusaen koy Edom,

deralen ko ray masilib dan totoo

tan paandipaten koy amin a kakabatan da.

9Nataktakot iray mibabakal a lalaki a taga Teman,

tan napatey ya amin iray sondalo na Edom.

Saray Makasengeg na Pakadusa na Edom

10Lapud tinakewan tan pinapatey yo

ray agagi yon kabyangay boleg nen Jacob,

napelag kayod kababaingan tan napaandi kayon anggad angga.

11Nen saray kalaban da et nilooban da ray puirta ra,

manalalagey kayo labat ed bandad arawi.

Kaparpara yon maoges ira may taga arum a bansan nansasamsam

na kayamanan na Jerusalem, insan da inaapag ed sikaran dili.

12Ag yo nepeg a nanliketan komun

imay makapasinagem ya agawad saray agagi yod Juda.

Ag yo nepeg so nanliket komun

ed samay agew na inkaderal da.

Ag yo nepeg ya ineelekan ira komun

diad samay inkaermenan da.

13Ag yo nepeg a nilooban komun so siudad na saray totook,

pian napanliketan yo so kairapan da

tan nasamsam yo ray kayamanan da

diad samay agew na inkaderal da.

14Ag yo nepeg so nanalagey komun ed nansasalipongpongay dalan,

pian naerel yo ray ombabatik ya onarawid kalaban.

Ag yo nepeg ya impalima ra komun ed saray kalaban da diad samay agew na inkairapan da.

Sintinsiaan na Dios iray Bansa

15Asingger lay agew a siak a Katawan

et sintinsiaan ko ray amin a bansa.

Edom, no antoy ginawam, ontan met so nagawad sika.

No antoy intanem mo, sikatoy anien mo.

16Saray totook et ininom day ampait a kupa na dusa diad masanton palandey ko.

Balet amin da ray bansad kaliber-liber inomen day lalon ampait a kupa na dusa;

inomen da ya amin tan maandipat ira.

Say Pananalo na Israel

17Balet wala ray pigaran makabatik ed Palandey na Sion,

tan sikatoy magmaliw a masanton pasen.

Saray totoon kabyangay boleg nen Jacob

et kayaryanen da lamet so dilin dalin da.

18Saray totoon kabyangay boleg nen Jacob tan Jose

et magmaliw iran singa apoy;

deralen da ray totoon kabyangay boleg nen Esau

a singa pamool na apoy ed dayami.

Anggapoy makaliktar a kabyangay boleg nen Esau.

Siak, say Katawan, so nansalita.

19Saray totoon taga abalaten na Juda et kayaryanen dan panayaman so Edom;

dakepen na saray taga sagur a manaayam ed alusadsar na kapokdulan so Filistia.

Kayaryanen na saray Israelita so dalin na Efraim tan Samaria;

kayaryanen na saray totoon kabyangay boleg nen Benjamin so Galaad.

20Saray sondalon taga baybay na Israel a nibantak iran adakep ed arum a bansa

et ompawil ira tan nadakep day Fenicia ya anggad Sarefat.

Saray taga Jerusalem a nibantak iran adakep ed Sardis

et nadakep da ray baley ed abalaten na Juda.

21Saray analon lalakid Jerusalem,

et dogpaan day Edom tan

oleyan da.

Say Katawan a dili so manari.