ISAIAS 2 - Maung a Balita Biblia (PnPV)(PnPV)

Say Andi-anggaan a Kareenan

1Sikara yay salitan inter na Dios ed kinen Isaias a lakin anak nen Amoz nipaakar ed Juda tan Jerusalem:

2Diad saray agew ya onsabi,

say palandey a panalalageyan na Timplo

so magmaliw a sankatageyan ed saray palandey

tan ososdungan ton amin iray pokdul.

Amayamay a bansa so onlan singa onaagos a danum ed sikato,

3tan ikuan na saray totoo ra,

Gali dia ta ontatdang itayod palandey na Katawan,

diad Timplo na Dios na Israel.

Ibangat to itayo na saray labay ton pagawad sikatayo;

mankurang itayod saray dalan sa pinili to.

Ta manlalapud Jerusalem iray bangat na Katawan;

manlapud Sion mansasalitad saray totoo to.

4Patondaen toy pankokolkol da ray matalonggaring a bansa.

Gawaen dan lokuy iray ispada ra,

tan palot iray pika ra.

Ag la mambabakal iray bansa;

ag la ran balut mamparaan a mibakal.

5Sikayo ran kabyangay boleg nen Jacob, mankurang itayod liwawan iiter ed sikatayo na Katawan!

Naderal so Panagpaatagey

6O Dios, inkaindan mo ray totoom, saray kabyangay boleg nen Jacob! Ginawam so onya lapud say bansa et napno na saray managaniton salamangkiro a taga ra Bokig tan taga ra Filistia. Aaligen na saray totoo so ogali da ray taga arum a bansa.

7Napno na pilak tan balituk so dalin da, tan ag nabilang so kayamanan da. Napno na kabayo so dalin da, tan ag nabilang iray karwahi ra.

8Napno na saray talintaoy diriyos so dalin da, tan igagalang da ray bengatlan ginawa na dilin lima ra.

9Napaabeba tan napelag ed kababaingan so balang sakey ed sikara. Ag mo pa ra pipirdonaen, O Katawan!

10Onamut irad saray ongib na kapokdulan odino diad saray abut ed dalem na dalin, pian napaliisan day pasnuk na Katawan, tan niamutan day pakayari tan say kagalangan to!

11Onsabiy agew a mansamput so panagpaatagey na too tan naderal so panagpasirayew na amin a katoowan. Insan say Katawan labat so nitanduro ed satan.

12Diad satan met ya agew say Katawan a Makapanyarin-amin et ipelag tod kababaingan ya amin iray totoon makapanyari, mapaatagey tan mapasirayew.

13Deralen ton amin iray atatagey a kiew a sidro ed Libano tan amin a kiew a robli ed dalin na Basan.

14Ipalanas to ray atagey a kapalandeyan tan saray kapokdulan,

15tan amin ya atatagey a tori, tan say padir na balang tirinsira.

16Ipalereg to ray anggan sankabalegan tan sankarakepan a bapor.

17-18Mansamput so panagpaatagey na too tan naderal so panagpasirayew na amin a katoowan. Naandipat a sigput iray talintaoy diriyos, tan nitanduro so Katawan labat diad satan ya agew.

19Onamut iray totood saray ongib na kapokdulan odino diad saray abut ed dalem na dalin, pian napaliisan day pasnuk na Katawan tan niamutan day pakayari tan kagalangan to, no sikatoy onsabi a manyegyeg ed mundo.

20No onsabiy tan ya agew ibantak na saray totoo iray pilak tan balituk a talintaoy diriyos a ginagawa ra, tan itilak da rad kawalaan da ray otut tan saray kolalaknit.

21No onsabiy Katawan a yegyegen toy dalin, saray onamut ed saray abut tan diad saray ongib ed kapokdulan iray totoo, pian napaliisan day pasnuk to tan niamutan day pakayari tan kagalangan to.

22Ag kayo la manmamatalek ed too ya ag mansiansian mambilay. Anto tay kakanaan to?