JUDIT 14 - Maung a Balita Biblia (PnPV)(PnPV)

Say Plano nen Judit

1Insan inkuanen Judit ed sikara, Kakaarok, sumpal yo pay simbawak. Nabwas na kabwasan, ala yo yan olo tan isabit yod padir na baley.

2Manoro kayo na pangulo yo, tan no ompapaway so agew nabwas, paala yod amin a mabiskeg a lalaki iray armas da tan papaway yo rad baley a kaiba ra may pangulo. Insan konwarin onla rad patar ya ondogpad panagguardiaan da ray taga Asiria.

3Alaen ed satan na saray taga Asiria iray armas da tan ompawil irad kampo ra, ta bangonen da ray opisyal da. Mangganat ya onlad tulda nen Holofernes iray opisyal, balet ag da narumog, et ontakot ya amin iray sondalo tan onsener ira legan yon onsusulong ya ondogpad sikara.

4Insan sikayo tan amin da ray arum ya Israelita et naosilan yo ra tan napatey yo ra legan dan ombabatik.

5Balet kasakbayan a gawaen yoy antokaman ed saraya, ibaki yo ni diad siak si Akior ya Ammonita. Labay kon amtaen no nabirbir toy Holofernes, say lakin nanleglemew ed Israel tan angibaki diad kinen Akior, ta abaloan ton kaiba tayon napatey.

Anisiad Dios na Israel si Akior

6Kanyan tinawag dad abung nen Uzias si Akior. Balet nen sinmabi tan anengneng to may olo nen Holofernes a sankabembenan na sakey ed saramay lalaki, naalimoreng tan atumba.

7Nen inibaan dan inmalagey, dinmakmomod saliyan nen Judit a pamagalang to. Inkuanto, Idayew ka komun na amin a pamilya ed dalin na Juda, tan onggiwgiw komun ed takot so balang bansa a makadngel na ngaran mo.

8Ibagam pad siak no panoy impanggawam ed saya?

Nen nantitipon iray totoo, imbaga nen Judit ya amin iray ginawa to, manlapud samay intaynan tod baley ya anggad samay bektan pansasalita to.

9Nen asumpal to may istoria to, inmeyag ed liket iray totoo tan inmungol so intiron siudad lapud gayaga.

10Nen nadngel nen Akior ya amin iray ginawa na Dios na Israel, nagmaliw a malet a mananisia. Nampasegat onung ed ganggan tan nagmaliw a kabyangan na olupan da ray Israelita; ontan met iray kabyangay boleg to ya anggad natan.

Say Aligewgewan ed Kampo nen Holofernes

11Diad kaimbuas, insabit na saray Israelita imay olo nen Holofernes ed padir na baley. Inala dan amin iray armas da tan pinmaway iran nankapigan grupo diad saray palusor a pasen diad arap na baley.

12Nen anengneng na saray taga Asiria so nagagawa, impaibaga rad saray opisyal da, tan imbaga da ra yan opisyal ed saray pangulo ra.

13Linma ra yan totoo ed tulda nen Holofernes tan inkuandad kinen Bagoas, Bangon moy pangulo na saray sondalo! Ompapangayan onakseb ed palandey ira man ya andi-kakanaan ya Israelita, ta dogpaan da itayo; aanapen da labat so ipatey dan amin.

14Linmoob si Bagoas tan nantipak ed arap na ogipan diad dalem na tulda, ta abaloan ton naogip si Holofernes a kaakdul toy Judit.

15Nen anggapoy onebat, inlokas toy kurtina tan linmoob, et anengneng toy kabalgan ya anggapoy olo ya abaldak ed dalin.

16Inmeyaeyag si Bagoas, ginebyas toy kawes to, tan ginapoan toy manugaog tan manakis.

17Linmoob ed tuldan nanayaman nen Judit, balet ag tod man nalmo. Biglan pinmaway tan ineyag tod saramay opisyal,

18Pinalikdo da itayo. Impelag ed kababaingan na sakey ya Israelitan bii so intiron nanarian nen Nabucodonosor. Nengneng kid dalem! Abaldak ed dalin ya inatey si Holofernes tan anggapoy olo to.

19Nen nadngel ya na saramay opisyal, ginebyas da ray kawes da lapud ermen da; diad imbuyak na balita, nadngel ed intiron kampo so ontan lan akisan tan eyagan.