JOB 21 - Maung a Balita Biblia (PnPV)(PnPV)

1Inmebat si Job:

2Dengel yon maung so ibagak

sikato ya labat so ligliwan kerewen kod sikayo.

3Itdan yo ak ni na pankanawnawan mansalita,

et no kayarik balaw yo ak labat, no labay yo.

4Aliwan say too so kakokol ko;

walay manepeg a makasenged no akin et ag ak makaanos.

5Nengneng yo ak. Ag ta la makatalagnaw tan makamemet na sangi so nanengneng yo?

6No nudnunoten koy agawad siak,

nagugunigon ak tan mampayegpeg so laman ko.

7Akin et aabuloyan na Dios a mambilay na andokey iray totoon maoges,

ombiskeg tan onaligwas ira?

8Naimatonan dan ombabaleg

iray anak da tan saray apo ra.

9Ag iiyabuloy na Dios a naderal so kaabungan da;

anggapoy nepeg dan takotan ed pambilay da.

10On, manlolokun iray baka ra,

tan manaanak iran anggapoy maoges a nagagawa.

11Singa kordiron batik-batik tan manggagalaw iray anak da,

12mansasayaw tan manliliket ira legan a totogtogen iray arpa tan plauta.

13Maaligwas ira legay pambilay da,

tan mareen ira no naoyus so linawa ra.

14Saray totoon maoges ibaga rad Dios a paolyan to ran bukbukor;

ag da labay ya amtaen so linawa tod bilay da.

15Isipen da ya ag nakaukolan so manlilingkur ed Dios,

tan andi-kana so mampikasi ed sikato.

16Ipasen da ya inmaligwas ira lapud dilin biskeg da,

balet ag ko abubonan so ontan a pananisia ra.

17Amimpiga lan narep so lamparaan na saray maoges a totoo?

Wala lay dinalan na deral ed sikara?

Dinusa ta la na Dios ed pasnuk to iray totoon maoges,

18tan impagmaliw to ran singa taep ya impalir-palir na dagem,

odino dabuk ya intitikyab na bagyo?

19Ibabaga yo a say Dios dusaen toy anak lapud saray kasalanan na ama to.

Andi! Padusa yod Dios iray makasalanan,

tan ipanengneng tod sikara a dusaen to ra lapud saray dilin kasalanan da.

20Ipaako yod saray makasalanan so dusa ran dili;

ipalikna yod sikara so sanuk na Makapanyarin-amin a Dios.

21No anggangga lay bilay na sakey a too,

mapaga ni kasi ed pankaabigan da ray anak to?

22Nayari kasin ibangat na too so Dios a huis na anggan saray atagey so betang da?

23-24Wala ray totoon maung so impanlaman da ya anggad ipatey da;

mainomay tan maliket iran ompatey,

balibali tan mabiskeg so laman da.

25Saray arum anggapon balut so liket da;

mambilay tan ompatey iran maermen.

26Balet nampapara ran ompatey tan ipompon;

kanen iran amin na saray bigis.

27Amtak no antoy nununoten yo,

tan say plano yon manggaway maoges ed siak.

28Tepeten yo, Iner so kawalaan la natan na abung na matalonggaring a too,

samay toon maoges so ginagawa to?

29Ag kayo ta ni akapitongtong ed saray totoon managbiahi?

Ag yo ta amta so awit dan balita?

30Diad agew na isabiy pasnuk tan pananusa na Dios,

say toon maoges so nilaban lawas.

31Anggapoy mangakusa ed maoges a too,

tan ombales sed sikato lapud saray ginagawa to.

32No sikatoy itolur ed kamposanto

diad kawalaay lobuk ton guardiado,

33nilibo ray mitolor ed sikato,

tan anggan say dalin balibalin nitapew ed bangkay to.

34Balet sikayo, andi-kakanaan so panliligliwa yod siak!

Tilan amin iray ebat yo!