SIRAC 33 - Maung a Balita Biblia (PnPV)(PnPV)

1Anggapoy maoges ya onsabid toon tatakotan toy Katawan; anggaman a mabetbet so ondalan a kaatapan, dagoen na Katawan ya iyagel.

2Aliwan masimpit so toon anggapoy kanay ganggan ed sikato, tan siopaman ya aliwan matwa nipaakar ed ganggan et singa baloton ipalig-palig na bagyo.

3No makabat ka, sisiaen mo so Ganggan; narumog mon napanmatalkan a singa saray masagradon Urim.

4Iparaan moy salitaen mo, et dengelen na saray totoo. Ikanam so naaralan mo kasakbayan kan mansalita.

5Telek a telek a singa dalig na kariton so kanunotan na toon makulang-kulang.

6Say kaaron anagasang a mansalita et kapara toy kabayod katakelan a manaringing anggan siopay onkabayod beneg to.

Ag Nampapara iray Totoo

7Akin et masanto ni ray arum ya agew nen saray arum, anggaman a namparan saksakey ya agew so onbubutay ya inagew-agew ed kapag taon?

8Lapud indoma ra na Katawan diad impangibiig tod sikaran mablin agew tan pista.

9Ginawa ton masanto tan manona iray arum ya agew tan ordinario iray arum.

10Dalin so nanlapwan na balang too, a singa si Adan nen saman.

11Balet say Katawan, diad kakabatan to, ginawa to ran doma ya amin tan initdan to ra na nandoroman kimey.

12Binindisionan to ray arum; ginawa to ran apagalangan tan masanto, tan panaayamen to rad abay to. Insamba to ray arum; pinaabeba to ra tan inekal to ra ed kipapasen da.

13No panon a walad lima na gumagaway banga so damili a nayarian ton gawaen so labay to, ontan met a wala itayod lima na Manamalsa tayo tan nayarian ton gawaen so labay to.

14Kamaungan so kabalingling na kaogsan, bilay so kabalingling na patey, tan kasalanan so kabalingling na panangarod Katawan.

15Nudnunot moy nipaakar ed saya: ginawa na Katawan a sampaparis ya amin iray bengatla, say sakey kabalingling na sananey.

16No para siak, naonur ak ya onsabin mankimey, a singa oonla ed kaubasan a mantortor na bunga ya atilak na saray bumuborbor. Balet binindisionan ak na Katawan, et maung so asumpalay kimey ko, a singa bumuborbor a napnoy panagpespesay ubas to.

17Balet labay kon naamtaan yo ya ag ko ginawa ra yan amin a para siak labat, no ag ingen para siopaman a labay toy makaaral.

18Dengel yo ak, amin yon matalonggaring a pangulo! Amin yon pangulo na saray tipon, dengel yoy labay kon ibaga!

Ag ka Papaoleyan ed Arum

19Legan a mambibilay ka, ag mon balut aabuloyan a naoleyan ka na siopamananggan anak mon laki, asawam, agim a laki, odino kaarom. Ag mo iiter ed siopaman so kayaryan mo; nayarin mangoman so kanunotan mo, et babawien mo.

20Legan a walay linawad laman mo, ag mo aabuloyan ya iwanwan na siopaman so bilay mo para sika.

21Magmaung nin akasaral ed sika iray anak mo nen say sika so akasaral ed sikara.

22Nepeg a wala lawas ed pakaoley mo iray amin a gagawaen mo; ag mo aabuloyan a nadotakan na antokaman so ngaran mo.

23Alagar moy kaonuran a bekta na bilay mo, no mampapanabos ka la, insan mo apagey kayaryan mo ed saray mananawir mo.

No Antoy Nepeg a Gawaen ed saray Aripen

24Say asno nepeg ya itdan na dayami tan say sakbaten to, tan nepeg a leweten. Say aripen nepeg ya itdan na kakanen tan kimey to, tan nepeg a peteken.

25No pankimeyen moy aripen mo, napareen moy kanunotan mo. No ag mo itday gawaen to, anapen toy kawayangan.

26Nayarian mon bistian tan pakoan so ayep, pian napaamo, tan nayarian mon pairapen ed bartolina so aripen.

27Pankimey mo lan pankimey, tan ag mo pampapainawaen; nibangat labat a manggaway gunigon no anggapoy gawaen to.

28Kimey so nakaukolan to. No ag to ka onuren, golunggolungan mo.

29Balet ag mo papairapen a mapalalo so siopaman, tan ag kan balut manangibiig.

30No walay aripen mo, gawam ed sikato so labay mo; sinaliw mo na kuartan bungay nanlingetan mo.

31Ipasen mon sakey ya agi; nakaukolan mo a singa pankaukolan mod sikan dili. No maoges so gawaen mod sikato, et ibatikan to ka, iner so laen mon pananapan ed sikato?