EXODO 37 - Maung a Balita Biblia (PnPV)(PnPV)

Say Impanggawad Kaban na Sipanan(Exo. 25:10-22)

1Say Kaban na Sipanan a ginawa nen Bezalel et tablan akasia; apataplo tan liman pulgada so karokey to, duamplo tan piton pulgada so kaatagey to.

2Inokupan to na puron balituk ed paway tan diad dalem to tan minoldoraan to na balituk iray gilig-gilig to.

3Nanggawa na apatiran balituk a liken a panagsakbatan tan impeket to ra ed saray apatiran sali to, duaran liken ed kapag diking.

4Nanggawa na saray tiken ya akasia a panagsakbatan, inokupan to ra na balituk,

5tan insolung to ra ed saray liken diad kapag diking na Kaban.

6Nanggawa na sakey a puron balituk a sakub na Kaban; apataplo tan liman pulgada so karokey to tan duamplo tan piton pulgada so kaawang to.

7Nanggawa na duaran kirubin a pinitpit a balituk,

8sakey so para kapag samput na sakub. Ginawa to ran akatekep ed samay sakub na Kaban.

9Saramay kirubin et nanarapan ira, tan asakbungan na saray akabuskag a payak da imay sakub.

Say Impanggawad Lamisaan a Pangitapewan na Tinapay ya Imbagat ed Dios(Exo. 25:23-30)

10Nanggawa na lamisaan ya akasia; talomplo tan anem a pulgada so karokey to, labinwalon pulgada so kaawang to, tan duamplo tan pito a pulgada so kaatagey to.

11Inokupan to na puron balituk tan minoldoraan to na balituk iray gilig-gilig to.

12Nanggawa na pinagkakuadro to a taloran pulgaday kalapar to tan minoldoraan to na balituk iray gilig-gilig to.

13Nanggawa na apatiran panakbatan a liken a balituk tan impeket to ed apatiran suyok a kawalaan na saray sali to.

14Saramay liken a pangisolungan ed saray pangsakbatan na lamisaan et nipeket ira ed abay na samay pinagkakuadro.

15Nanggawa na saray tiken ya akasia tan inokupan to ra na balituk.

16Nanggawa na saray puron balituk a kagawaan na samay lamisaan; saray plato, saray kupa, saray ankelag a pasig, tan saray yaung ya ikanad bagat ya alak.

Say Impanggawad Panangipatoonan na Lamparaan

17Puron balituk so ginawa ton panangipatoonan na lamparaan. Pinitpit a balituk so ginawa ton dapan tan sengeg to; intekep ed saya iray rosas a pati saray simit tan pital.

18Anemiran sanga so akaonat ed saray diking to, talora ed balang sakey.

19Kapag sakey ed saray anemiran sanga to walay taloran rosas ton singa almindras a pati saray simit tan pital.

20Say sengeg na panangipatoonan walay apatiran rosas to a singa almindras a pati saray simit tan pital.

21Walay simit ed kapag silong na taloran paris a sanga.

22Saray simit, saray sanga, tan say panangipatoonan na lamparaan et nantetekep iran pinitpit a puron balituk.

23Nanggawa na pitoran lamparaan a para samay panangipatoonan, tan nanggawa na saray puron balituk a panagpotut na pabilo tan saray delsangan.

24Talomplo tan kapalduan kilo so inkana ton puron balituk diad impanggawa to na panangipatoonan na lamparaan tan amin da ra yan kagawaan to.

Say Impanggawad Altar a Panagpoolay Insinso(Exo. 30:1-5)

25Nanggawa na altar ya akasia a panagpoolan na insinso. Kuadrado yan altar, labinwalon pulgada so karokey to tan labinwalon pulgada so kaawang to, tan talomplo tan anem a pulgada so kaatagey to. Akitekep ed altar iray pinagsaklur to ed apatiran suyok.

26Inokupan to na puron balituk so tagey to, saray apatiran dapag to, tan saray pinagkasaklur to, tan minoldoraan to na balituk ed saray gilig-gilig to.

27Nanggawa na duaran balituk a liken tan impeket to ra ed duaran dapag diad leksab na moldora tan sikaray pangisolungan ed saray tiken a panagsakbatan.

28Nanggawa na saray tiken ya akasia tan inokupan to ra na balituk.

Say Impanggawad Larak a Panagpoyuk tan say Insinso(Exo. 30:22-38)

29Nanggawa met na masanton larak a panagpoyuk tan say puron ambalingit ya insinso; ginawa to ra a singa panaggaway pabalingit.