EXODO 30 - Maung a Balita Biblia (PnPV)(PnPV)

Say Altar a Panagpoolan na Insinso(Exo. 37:25-28)

1Manggawa ka na altar ya akasia a panagpoolan na insinso.

2Nepeg a kuadrado; labinwalon pulgada so karokey to tan labinwalon pulgada so kaawang to, tan talomplo tan anem a pulgada so kaatagey to. Saray pinagkasaklur ed apatiran suyok to et nepeg a katekep na altar.

3Okupan mo na puron balituk so tagey to, saray apatiran dapag to, tan saray pinagkasaklur to, tan moldoraan mo na balituk iray gilig-gilig to.

4Manggawa kay duaran balituk a liken tan ipeket mo rad duaran dapag diad leksab na moldora tan sikaray pangisolungan ed saray tiken a panagsakbatan.

5Nepeg ya akasia ra yan tiken tan okupan mo ra na balituk.

6Iliram yan altar diad paway na kurtinan akabitin ed arap na Kaban na Sipanan. Diman so pasen a pangabetan kod sika.

7Kapag kabwasan no iparaan nen Aaron iray lamparaan, sikatoy nepeg a mamool na ambalingit ya insinso ed tapew na altar.

8Onya met so gawaen to no selselan to ray lamparaan no labi. Sayan bagat na insinso et mansiansia lawas ya anggan kapigan.

9Diad sayan altar ag kayo mangibabagat na insinson aliwan masanto odino bagat ya ayep odino bagat a trigo, tan ag kayo mangikakalbo dia na bagat ya alak.

10Maminsan ed kapag taon gawaen nen Aaron so sirimonya a panlinis ed sayan altar diad pangiporanis tod saray pinagsaklur na altar; say iporanis to et say dala na ayep ya imbagat a pangekal na kasalanan. Gawaen ya a tinaon ed kapigan man a panaon. Sayan altar et nepeg a sigput a masanto, tan nisaklang ed siak a Katawan.

Say Buis a Para Tuldan Ayamay Katawan

11Say Katawan kuantod kinen Moises,

12No alaen moy bilang da ray Israelita, balang sakey ed sikara nepeg a dondonen tod siak so bilay to, pian anggapoy ondalan a salot ed sikato legan ya aalaen so bilang na totoo.

13Balang sakey ed saray totoon bilangen et nepeg a mangiter na nakaukolan a bayar onung ed panagsimbang ed santuario. Balang sakey nepeg a bayaran to ya, tan sakey yan bagat ed siak.

14Balang sakey a nabilang, salanti say balang lakin mantaon na duamplo a mampaatagey, et nepeg a mangiter ed siak na sayan babayaran.

15Say mayaman a too ag nepeg a mambayar na masoluk, tan say mairap-bilay ag nepeg a mambayar na kulang, no sikaray mambayar na panondon dad bilay da.

16Alam ira yan kuarta ed saray Israelita tan igastos mo ed panasikaso ed Tuldan Ayamay Katawan. Sayan buis sikatoy bayar a panondon na bilay da, et ag ko ra lingwanan ya iyagel.

Say Gansan Talyasi

17Say Katawan kuantod kinen Moises,

18Manggawa kay gansan talyasi a panorasan tan say gansan ansagan to. Iliram ed nanleetan na Tulda tan say altar, tan kargaan mo na danum.

19Si Aaron tan saray anak ton lalaki et ikana ra yan danum a panoras day lima tan sali ra,

20kasakbayan iran onloob ed Tulda odino onasingger ed altar a mangisaklang na bagat a kakanen. Diad ontan ag ira ompatey.

21Nepeg dan orasan so lima tan sali ra, pian ag ira ompatey. Sayan totontonen nepeg a sumpalen da tan saray kabyangay boleg da ed anggan kapigan a panaon.

Say Larak a Panagpoyuk

22Say Katawan kuantod kinen Moises,

23Mangala ka na saray sankaabigan a rikadoanemiran kilo ya onturon mira, taloran kilon ambalingit a kanila, taloran kilon ambalingit a kania,

24tan anemiran kilon kasia (asimbang ira yan amin onung ed panagsimbang ed santuario). Laukan mo na sakey a galon a larak na oliba,

25tan manggawa ka na masanton larak a panagpoyuk a singa panaggaway pabalingit.

26Ikanam ya a pampoyuk ed Tuldan Ayamay Katawan diad Kaban na Sipanan,

27diad lamisaan a pati amin a kagawaan to, diad panangipatoonan na lamparaan a pati kagawaan to, diad altar a panagpoolan na insinso,

28diad altar a panangisaklangan na bagat a popoolan a pati amin a kagawaan to, tan diad talyasi a pati ansagan to.

29Onyay pangisaklang mod saraya, et magmaliw iran sigput a masanto, tan siopaman odino antokaman a makadiwit ed saraya napasakitan lapud pakayari na inkasanto ra.

30Insan mo poyukan si Aaron tan saray lalakin anak to tan ikonsagram ira a papari a manlingkur ed siak.

31Ikuanmod saray Israelita, Sayan masanton larak a panagpoyuk et nepeg ya ikana ed panlingkur ed siak diad kapigan man a panaon.

32Ag nepeg ya ikalbo ed ordinarion too, tan ag yo nepeg ya aligen so inkagawa to. Masanto yan larak; nepeg a masanto so pangipasen yo.

33Siopamay toon mangalig na inkagawa to odino mangikanad siopaman ya aliwan pari, sikatoy ag la nibilang a sakey ed saray totook.

Say Insinso

34Say Katawan kuantod kinen Moises, Mangala ka na nampaparan karakel na onggendan a masamit a rikadoistakti, onika, galbanum, tan puron olibanum.

35Manggawa ka na insinso, a singa panaggawa na pabalingit. Laukan mo na asin pian mansiansian puro tan masanto.

36Temek mon singa pinon pulbo so daiset ed sayan insinso, iyakar mod dalem na Tuldan Ayamay Katawan, insan mo ipukapok ed arap na Kaban na Sipanan. Ipasen mon sigput a masanto so sayan insinso.

37Ag kayo manggagawa na singa onyan insinson para sikayo. Ipasen yon masanton bengatla a nisaklang ed siak.

38Siopamay toon manggawa na kapara to ya, ta ikana ton pabalingit, ag la nibilang a sakey ed saray totook.