DEUTERONOMIO 11 - Maung a Balita Biblia (PnPV)(PnPV)

Say Inkatalonggaring na Katawan

1Aro yo so Katawan a Dios yo tan onur yo lawas iray amin a ganggan to.

2Nunot yo natan iray naaralan yo a nipaakar ed Katawan diad panamegley na saray ginagawa to. Aliwan saray anak yo, no ag ingen sikayo, so akanengneng. Anengneng yo so inkatalonggaring na Katawan, say pakayari to, say biskeg to,

3tan saray milagron ginagawa to. Anengneng yo so ginagawa tod ari na Egipto tan diad intiron bansa to.

4Anengneng yo no panoy sigput ya impamaandipat na Katawan ed saray sondalon Egipsio, pati saray kabayo tan saray karwahi ra, diad impangipalner tod sikara ed Dayat ya Ambalanga nen oosilan da kayo.

5Amta yo no anto ray ginagawa na Katawan a pankaabigan yo diad kalawakan kasakbayan ya akasabi kayo dia.

6Nanunotan yo no antoy ginawa to ed kindi Datan tan Abiram a lalakin anak nen Eliab a kabyangan na tribu nen Ruben. Anengneng yon amin so insangiy dalin tan say impangakmun tod sikara, pati saray pamilya ra, saray tulda ra, tan amin da ray aripen tan saray ayep da.

7On, sikayo ray akanengneng ed sarayan amin a bengatlan makapakelaw a ginagawa na Katawan.

Saray Kaabigan ya Iter na Nisipan a Dalin

8Onur yo ray ingganggan kod sikayo natad sayan agew. Diad satan nayarian yon baliwen so ilog tan napanayaman yoy dalin a ngalngali yo la looban.

9Andokey met ed satan so pambilay yo ed mayaman tan mataban dalin ya insipan na Katawan ya iter ed saray lalaki yo tan saray kabyangay boleg da.

10Say dalin a ngalngali yo la napanayaman et aliwan singa samay dalin na Egipto a nanayaman yo nen saman. Dimad Egipto, no mantanem kayoy trigo, nakaukolan a mamasia kayon mankimey pian naparanuman yo so kaalogan; singa kayo manaasikasoy tanamanan na pisipising.

11Balet say dalin a ngalngali yo la looban et kapalandeyan tan kapokdulan, sakey a dalin a sasalogen na oran.

12Say Katawan a Dios yo et aasikasoen to yan dalin tan babantayan to lawas.

13Kanyan sirin, onur yo ray ganggan ya inter kod sikayo natad sayan agew; aro yo so Katawan a Dios yo tan manlingkur kayod sikato ed intiron puso yo tan intiron kamarerwa yo.

14No onuren yo, ipelag toy oran ed dalin yo no panaon na pankaukolan, pian walay trigo, alak, tan larak a para sikayo,

15tan say dika a para saray ayayep yo. Nawalaan kayo na amin a taganon nakaukolan yo.

16Manalwar kayo ta ompan napalingo kayo et ikaindan yoy Katawan tan mangigalang tan manlingkur kayod arum a diriyos.

17No onyay gawaen yo, mampasnuk ed sikayo so Katawan. Ag to papelagen so oran, et onkelang so dalin yo tan anggapoy ontubon tanaman. Insan ag mabayag, ompatey kayod man, anggaman a maung iman a dalin ya iter tod sikayo.

18Tandaan yo ra yan ganggan tan aro yo ra. Ibariber yo rad saray taklay yo tan iberber yo rad moling yo pian nanunotan yo ra.

19Ibangat yo rad saray anak yo. Salita yo ra no wala kayod kaabungan yo tan no wala kayod arawin pasen, no mampapainawa kayo tan no mankikimey kayo.

20Isulat yo rad saray lusek na kaput na kaabungan yo tan diad saray puirta yo.

21Diad satan sikayo tan saray anak yo et mambilay na andokey ed dalin ya insipan na Katawan a Dios yo ya iter tod saray lalaki yo. Manayam kayod man legan a walay tawen ed tagey na dalin.

22Pampelengan yon onuren iray amin ya ingganggan kod sikayo: Aro yo so Katawan a Dios yo, toluk yo ray amin a ganggan to, tan mansiansia kayon matoor ed sikato.

23Diad satan pataynanen to ray amin a bansa legan na pankukurang yo, et panayaman yoy dalin da ray bansan baleg tan makapanyari nen say sikayo.

24Amin a dalin a nabatak yo et kayaryan yo. Say dalin yo et sakopen to so manlapud kalawakan diad abalaten ya anggad Kapalandeyan na Libano diad baybay, tan manlapud Ilog na Eufrates diad bokig ya anggad Dayat na Mediteraneo diad sagur.

25Inermay laen yod saman a dalin say Katawan a Dios yo et patakoten tod sikayo ray totoo, onung na insipan to, tan anggapoy makalaban ed sikayo.

26Diad sayan agew pampilien ta kayo ed bindision tan samba

27bindision no onuren yo ray ganggan na Katawan a Dios yo a iiter ko rad sikayo natan;

28balet samba, no sumlangen yo ra yan ganggan diad pangigalang yod arum a diriyos ya ag yo ra angigalangan nen saman.

29No say Katawan niyakar to kayo lad dalin a panayaman yo, nepeg ya ibawag yo manlapud Palandey na Gerizim so bindision tan manlapud Palandey na Ebal so samba. (

30Sarayan duaran palandey et wala rad sagur na Ilog na Jordan, diad dalin da ray Cananeo a manaayam ed patar na Jordan. Wala rad bandad sagur tan ag ira arawi ed saray masanton kiew ed More ya abay na baley na Gilgal.)

31Ngalngali yo la baliwen so Ilog na Jordan tan panayaman so dalin ya iter ed sikayo na Katawan a Dios yo. No naala yo tan napanayaman yo la,

32pampelengan yon sumpalen iray amin a ganggan ya iiter kod sikayo natad sayan agew.