DEUTERONOMIO 14 - Maung a Balita Biblia (PnPV)(PnPV)

Say Sebel ya Ogalin Panagermen

1Sikayo ray totoo na Katawan a Dios yo. Kanyan no manermen kayod inatey, ag yo sasalgeren so laman yo o kikiskisan so arap na olo yo.

2Kayaryan kayo na Katawan a Dios yo; pinili to kayon dilin totoo to diad saray amin a totood tapew na dalin.

Saray Malinis tan Marotak ya Ayayep(Lev. 11:1-47)

3Ag yo kakanen iray bengatla a say Dios impasen to ran marotak.

4Nayarian yon kanen ira yan ayayep: baka, karniro, kanding,

5ulsa, karnirod katakelan, kanding ed katakelan odino gasila

6dinan man ya ayep a pisag so koko to tan mamparintek.

7Balet ag nepeg a kanen iray ayep likud no pisag so koko ra tan mamparintek ira. Ag nayarin siraen yo so kamilyo, konihon amo, odino konihod katakelan. Nepeg ya ipasen ira yan ayayep, ta mamparintek ira balet aliwan pisag so koko ra.

8Ag kayo mangakan na baboy. Marotak ya ayep; pisag iray koko to, balet ag mamparintek. Ag kayo mamangakay dinan man ed sarayan ayayep o didiwiten so laman ton inatey.

9Nayarian yo a kanen so anggan dinan a sira a nanggigim tan nansiksik,

10balet ag nayarin kanen so antokaman a manaayam ya anggapoy gigim tan siksik; ipasen yon marotak ira yan sira.

11Nayarian yon kanen so antokaman a malinis a manok.

12-18Balet sarayan manok so sebel a kanen: agila, kulayot, baga, gikgik; busardo, buitri, wawak; abistrus; garsita, tigkalak, dulakak, pilikano, kalamon, abudilla, tan kaging.

19Amin a nampayak a bigis et marotak; ag yo ra kakanen.

20Nayarian yon kanen so antokaman a malinis a bigis.

21Ag yo kakanen so antokaman ya ayep ya inatey a bukor. Nayarin ipakan yod saray sangkailin manaayam ed kawalaan yo, odino ilako yo ed arum iran sangkaili. Balet kayaryan kayo na Katawan a Dios yo; sikayo ray totoo to.

Ag yo ilolotod gatas na ina to so kordiro odino kilaw na kanding.

Say Ganggan a Nipaakar ed Kakaplo

22Ibiig yoy kakaplo na amin a naani yod kaalogan yo kapag taon.

23Insan kayo onla ed sakey a pasen a pinili na Katawan a Dios yo a pangigalangan ed sikato; et diad arap tod man akan yoy kakaplo na trigo yo, alak yo, larak na oliba yo, tan besag ya anak na baka tan karniro yo. Gawa yoy onya pian naaralan yon takotan lawas so Katawan a Dios yo.

24No arawin tuloy ed abung yo so pasen a panangigalangan kanyan mairap yon awiten so kakaplo na ani ya impamindision na Katawan ed sikayo, saya so gawaen yo:

25Ilako yo so kakaplo na naani yo, insan yo awiten ed samay pasen a panangigalangan so kuarta a nanlakoan yo.

26Igastos yo yan kuarta ed antokaman a labay yobaka, kordiro, alak, odino antokaman a makabuektan diman, diad arap na Katawan a Dios yo, sikayo tan saray kabyangay pamilya yo et akan yo may sinaliw yo tan manliket kayo.

27Ag yo papaolyan iray Levitan manaayam ed saray baley yo; anggapoy kayaryan dan dili.

28Diad kasamputan na kapag mikatlon taon iyakar yoy kakaplo na amin a naani yo, insan yo ra isinup ed saray baley yo.

29Para saray Levita yan kakanen, bangta anggapoy kayaryan dan dili; ontan met, sayan kakanen et para saray sangkaili, saray olila, tan saray balo a manaayam irad saray baley yo. Nepeg ya ondago ran mangalay nakaukolan da. Gawa yoy onya, et say Katawan a Dios yo bindisionan to kayo ed amin a gawaen yo.