EZEKIEL 47 - Maung a Balita Biblia (PnPV)(PnPV)

Say Managagos a Kolus a Manlalapud Timplo

1Samay laki impawil to ak ya inyakar ed lolooban na samay Timplo. Ompapaway ed silong na lolooban so danum tan managagos a mamaarap ed bokig ya akaarapan na Timplo. Managagos imay danum manlapud silong na niabalaten a parti na Timplo tan ondadalan ed niabalaten a dapag na altar.

2Samay laki indalan to ak ed puirtad baybay diad impangipaway tod siak ed Timplo tan inliber to ak ya anggad puirtan akaarap ed bokig. Walad may melag a kolus a managagos ya ompapaway ed nisagur a dapag na puirta.

3Diad panamegley na samay panagsukat to may laki anukat na liman lasus tan apataplo tan siam a mitro a mampaleksab ed bokig tan imbaga tod siak a yakyaken mi may kolus diman. Angga labat ed kalitkalit ko so danum.

4Anukat ni na liman lasus tan apataplo tan siam a mitro, et sinmabi ya anggad pueg ko so danum. Anukat ni lamet na liman lasus tan apataplo tan siam a mitro, et sinmabi ya anggad balangbang ko so danum.

5Anukat ni na liman lasus tan apataplo tan siam a mitro, et araldalem lad may danum kanyan ag ko la nayarin yakyaken. Araldalem la so danum ya ag la nabaliw likud labat no langoyen.

6Inkuantod siak imay too, Sika a toon ompatey, apiger mon imanoen ira yan amin.

Insan samay laki impawil to ak ed samay gilig na ilog,

7et nen wadman ak anengneng kod man ya amayamay iray kakiewan ed balang pandel na ilog.

8Inkuantod siak, Sayan danum onaagos ed bandad bokig ya anggad Patar na Jordan tan diad Inatey a Dayat. No kaagos tod Inatey a Dayat, salatan tod man so danum a maasin na matabang a danum.

9Inermay agosan na danum walan amin iray klasiy ayayep tan sira-sira. Say kolus pagmaliwen ton matabang a danum so maasin a danum na Inatey a Dayat, tan itdan to na bilay so dinan man a pasen ya agosan to.

10Manlapud Sobul na En-gadi ya anggad Sobul na En-eglaim, wala ray sumisigay ed gilig na dayat, tan ipanat dad man ya ipamaga iray iket da. Walad man iray amayamay a nandoroman klasiy sira a singa diad Dayat a Mediteraneo.

11Balet saray danum ed saray libsong tan diad saray bobun na sira ya asingger ed dayat et ag ira napatabang. Mansiansia rad man a panlapwan na asin.

12Diad nantopag a pandel na kolus ontubon amin iray klasiy kiew a maniter na tagano. Ag balut nalenes iray bolung da, tan ag iran balut ontondan mambunga. Binolan iran maniter na kapamborbor a bunga, lapud nasasalog ira na managagos a danum a manlalapud Timplo. Maniter na tagano iray may kakiewan, tan nikanan tambal na totoo iray bolung da.

Saray Ketegan na Dalin

13Say Katawan a Dios inkuanto, Sikara yay ketegan na dalin ya apagen na labinduan tribu; say tribu nen Jose et awaten to so duaran apag.

14Sinambaan kod saray lalaki yo ya iter kod sikara yan dalin; pampapara yoy pangapag yod sikayon dili.

15Say ketegan ed baybay et mampabokig manlapud Dayat na Mediteraneo ya anggad siudad na Hetlon, mamaarap ed Dalan na Hamat ya anggad siudad na Sedad,

16ontuloy ya anggad saray siudad na Berota tan Sibraim (wala ra ya ed nanleetan na dalin na nanarian na Damasco tan say nanarian na Hamat), tan ontuloy ya anggad siudad na Ticon (wala ya ed abay na ketegan na nanarian na Hauran).

17Ontan sirin, say ketegan ed bandad baybay et mampabokig a manlapud Mediteraneo ya anggad Siudad na Enon, a saray ketegan a dalin et say Damasco tan say Hamat ya anggad baybay to.

18Say ketegan ed bokig et mampaabalaten a manlapud sakey a tanda a walad nanleetan na dalin na Damasco tan say dalin na Hauran, tan say Ilog na Jordan so ketegan ed nanleetan na dalin na Israel diad sagur tan say dalin na Galaad diad bokig, ya anggad Tamar diad Inatey a Dayat.

19Say abalaten a ketegan et mampabaybay a sagur manlapud Tamar ya anggad sabangan na Cades-meriba, insan mampabaybay sagur ya ondalan ed ketegan na Egipto ya anggad dayat Mediteraneo.

20Say ketegan ed sagur et say dayat na Mediteraneo tan mampabaybay ya anggad sakey a tanda diad sagur na Dalan na Hamat.

21Apag yo yan dalin ed saray tribu yo;

22kayaryan yo ya anggad angga. No apagen yo so dalin nepeg a wala met so betang na saray sangkailin manaayam ed kawalaan yo tan nianak dia ray anak da. Nepeg ya ipasen yo ran singa say kipapasen na peteg ya Israelita tan nepeg a mikaot irad saray tribu na Israel diad pangala ray betang da.

23Kapag sangkaili mangawat na betang to a kaiba to ray totood tribun panaayaman to. Siak a Katawan a Dios so nansalita.