JOB 37 - Maung a Balita Biblia (PnPV)(PnPV)

1Mampokal so pagew ko lapud bagyo.

2Dengel kayon amin ed bosis na Dios;

dengel kayod karul a manlalapud sangi to.

3Ibabaki onggolis ed tawen so kirmat,

manlapud sakey a samput ya anggad sananey a samput na mundo.

4Insan narengel to tanul na bosis to,

say makapataktakot a dalagorug na karul,

et siansian mankirkirmat.

5Lapud ganggan na Dios nagawa ray makapakelaw a bengatla

ya ag tayo ra natalusan.

6Igaganggan ton ompelag ed tapew na dalin iray kristal,

tan say maksil ya oran.

7Patotondaen toy pankikimey na saray totoo;

ipanengneng to ed sikara so nayarian ton gawaen.

8Saray ayayep ed katakelan oonla rad ayaman da.

9Manlalapud abalaten so mabiskeg a dagem,

tan manlalapud baybay so ambetebetel a dagem.

10Say ingas na Dios pakikigtelen toy danum tan pagmamaliwen ton yilo.

11Onggogolis so kirmat manlapud saray lorem,

12legan dan manaakar onung ed linawa na Dios.

Susumpalen da ray amin a ganggan na Dios diad amin a pasen ed intiron mundo.

13Ipepelag na Dios so oran a panalog ed dalin;

nayarin ipepelag to a panusa tod katoowan,

odino pangipanengneng tod sikara na panangaro to.

14Mandeen ka Job, ta dengel ka;

dalepdep mo ray makapakelaw a bengatlan gagawaen na Dios.

15Amtam no panoy pangigaganggan na Dios

tan no panoy pamapakirmat ton manlapud saray lorem?

16Amtam no panoy pampappataw na saray lorem ed tawen,

say gawa na makapakelaw a dunong na Dios?

17Ag mo amta; manirap ka labat lapud petang

no onsiplug ed dalin so dagem a manlalapud abalaten.

18Nayarian mo ta a tulongan so Dios ed pangipanat toy tawen

tan panggawa ton anawet a singa mital a pinasileng?

19Ibangat mo kami no antoy ibaga mid Dios;

anggapoy karga na kanunotan mi; anggapoy nayarian min ibaga.

20Ag ko kerewen a misalita ak ed Dios;

akin et itdan koy pankanawnawan maneral ed siak?

21Natan makaseleng so liwaway tawen,

maliwliwawan ag nayarin linggisen;

malinis so tawen lapud pinanisan na dagem.

22Nanenengneng ed baybay so binmalituk a liwawa,

tan papatakoten itayo na kagalangay Dios.

23Ontan lay kabaleg na pakapanyari na Dios,

kanyan ag itayo makaasingger ed sikato;

matonung tan maptek so pipiolup tod katoowan.

24Ag sirin pankelawan ya ontakot ed sikato iray amin a totoo,

tan saray palpaolyan to ray mankabatkabatan.